“ಕಿಕಿ’ಬಳಿಕ “ನಿಲ್ಲ್ ನಿಲ್ಲ್’ಕ್ರೇಜ್‌

ತಿರುವನಂತಪುರ: ಇದೇ ವರ್ಷದ ಮಧ್ಯ ಭಾಗದಲ್ಲಿ ಜಗತ್ತಿನಾದ್ಯಂತ “ಕಿ ಕಿ ಚಾಲೆಂಜ್‌’ ವೈರಲ್‌ ಆಗಿದ್ದು ಎಲ್ಲರಿಗೂ ಈಗ ಮರೆತ ವಿಚಾರ. ಅದರ ಗುಂಗು ಮಾಸಿ ಹೋಗಿ ಕೆಲವು ತಿಂಗಳುಗಳು ಕಳೆಯುವ ಹೊತ್ತಿಗೆ ಕೇರಳ ದಲ್ಲಿ ಕೆಲ ದಿನಗಳಿಂದ “ನಿಲ್ಲ್ ನಿಲ್ಲ್’ (ನಿಲ್ಲು, ನಿಲ್ಲು) ಎಂಬ ಹೊಸತೊಂದು ಚಾಲೆಂಜ್‌ ಶುರುವಾಗಿದೆ. ಇದು ಕಿ ಕಿ ಗಿಂತಲೂ ಅಪಾಯಕಾರಿಯಾಗಿದ್ದು, ಯುವಕ ರಿಗೆ ಪೊಲೀಸರು ಈ ಬಗ್ಗೆ ಎಚ್ಚರಿಕೆ ಸಂದೇಶ ರವಾನಿಸಿದ್ದಾರೆ. 

ವ್ಯತ್ಯಾಸವೇನು?: ಚಲಿಸುತ್ತಿರುವ ವಾಹನದಿಂದ ಕೆಳಗಿಳಿದು ವಾಹನದ ಜತೆಗೇ ನೃತ್ಯ ಮಾಡುತ್ತಾ ಹೋಗಿ ಆನಂತರ ಪುನಃ ವಾಹನವನ್ನೇರಿ ಮುಂದೆ ಹೋಗುವುದು “ಕಿ ಕಿ’ ಚಾಲೆಂಜ್‌ನ ವಿಶೇಷತೆಯಾಗಿತ್ತು. ಈಗ ಶುರುವಾಗಿರುವ “ನಿಲ್ಲ್ ನಿಲ್ಲ್’ ಪ್ರಕಾರ, ಈ ಸವಾಲನ್ನು ಸ್ವೀಕರಿಸಿದವರು ವೇಗವಾಗಿ ಸಂಚರಿಸುತ್ತಿರುವ ಯಾವುದಾದರೂ ವಾಹನದ ಮುಂದೆ ಏಕಾಏಕಿ ಜಿಗಿದು, ಅದು ನಿಂತ ಕೂಡಲೇ ನೃತ್ಯಗೈಯ್ಯುವುದು. 

ಯಾರಿದರ ರೂವಾರಿ?: ಈ ಸವಾಲನ್ನು ಅಂತ ರ್ಜಾಲದಲ್ಲಿ ಮೊದಲು ತೇಲಿಬಿಟ್ಟಿದ್ದು “ಟಿಕ್‌ ಟಾಕ್‌’ ಎಂಬ ವಿಡಿಯೋ ಪ್ರಸರಣ ಖಾಸಗಿ ಸಂಸ್ಥೆ. ಆನಂತರ ಇದು ಫೇಸ್‌ಬುಕ್‌, ಟ್ವಿಟರ್‌, ವಾಟ್ಸ್‌ಆ್ಯಪ್‌ಗ್ಳಲ್ಲಿ ಜನಪ್ರಿಯವಾಯಿತು. ಆರಂಭದಲ್ಲಿ, ಗೆಳೆಯರೇ ಸೇರಿ ಇಂಥ ವಿಡಿಯೋಗಳನ್ನು ಮಾಡಿ ಹರಿಯ ಬಿಡುತ್ತಿದ್ದರು. ಆದರೆ, ಈಗ ಸವಾಲು ಸ್ವೀಕರಿ ಸು ವವರ ಸಂಖ್ಯೆ ಹೆಚ್ಚುತ್ತಿದ್ದು, ದಾರಿಯಲ್ಲಿ ಸಂಚರಿಸುವ ವಾಹನಗಳ ಮುಂದೆ ಏಕಾಏಕಿ ನೃತ್ಯ ಮಾಡುವುದು ಅತ್ಯಂತ ಅಪಾಯಕಾರಿಯಾಗಿ ಪರಿಣಮಿಸಿದೆ. 

ಪೊಲೀಸರ ಎಚ್ಚರಿಕೆ: ಯುವ ಜನರ ಈ ಹೊಸ ಅಮಲಿನ ಬಗ್ಗೆ ಕೆಂಗಣ್ಣು ಬೀರಿರುವ ಕೇರಳ ಪೊಲೀಸ್‌, ಈ ಚಾಲೆಂಜ್‌ ಹೆಸರಲ್ಲಿ ಅಪಾಯಕ್ಕೆ ಎಡೆ ಮಾಡುವವರು ಹಾಗೂ ಟ್ರಾಫಿಕ್‌ ಜಾಮ್‌ ಮಾಡುವವರ ವಿರುದ್ಧ ಕ್ರಮ ಕೈಗೊಳ್ಳುವುದಾಗಿ ತಿಳಿಸಿದ್ದಾರೆ.