ಮಕ್ಕಳಿಗೆ ಪುಸ್ತಕ ಬಂತು: ಸಮವಸ್ತ್ರ ಮಾತ್ರ ಸಿಕ್ಕಿಲ್ಲ

ಮಂಗಳೂರು: ಸರ್ಕಾರದಿಂದ ನೀಡುವ ಪಠ್ಯಪುಸ್ತಕಗಳು ಶಾಲೆ ಸೇರಿದ್ದರೂ ಸಮವಸ್ತ್ರ ಮಾತ್ರ ಇನ್ನೂ ವಿದ್ಯಾರ್ಥಿಗಳ ಕೈ ಸೇರಿಲ್ಲ. ಈ ಶೈಕ್ಷಣಿಕ ವರ್ಷದ ಸರ್ಕಾರಿ ಮತ್ತು ಅನುದಾನಿತ ಶಾಲೆಗಳಲ್ಲಿ ಮೇ 29ರಂದು ತರಗತಿಗಳು ಆರಂಭವಾಗಿವೆ. ಶಾಲೆ ಆರಂಭದಂದೇ ವಿದ್ಯಾರ್ಥಿಗಳಿಗೆ ಕೆಲವು ಪಠ್ಯಪುಸ್ತಕಗಳನ್ನು ಮಾತ್ರ ವಿತರಿಸಲಾಗಿತ್ತು. ಆದರೆ, 2, 6, 9 ಮತ್ತು 10ನೇ ತರಗತಿಗೆ ಪಠ್ಯಪುಸ್ತಕ ತಲುಪದ ಹಿನ್ನೆಲೆಯಲ್ಲಿ ಸುಮಾರು ತಿಂಗಳ ಕಾಲ ವಿದ್ಯಾರ್ಥಿಗಳು ಪಠ್ಯಪುಸ್ತಕವಿಲ್ಲದೇ ಪಾಠ ಕೇಳುವಂತಾಗಿತ್ತು.

ಈಗ ಎಲ್ಲ ಪಠ್ಯಪುಸ್ತಕಗಳು ಶಾಲೆ ತಲುಪಿದ್ದು, ವಿದ್ಯಾರ್ಥಿಗಳಿಗೆ ವಿತರಿಸಲಾಗಿದೆ. ಆದರೆ ಸರ್ಕಾರದಿಂದ ನೀಡುವ ಶಾಲಾ ಸಮವಸ್ತ್ರಗಳು ಇನ್ನೂ ತಲುಪಿಲ್ಲ. ಸಮವಸ್ತ್ರ ಯಾವಾಗ ದೊರಕುತ್ತದೆ ಎಂಬುದು ಗೊತ್ತಿಲ್ಲ. ಸರ್ಕಾರದಿಂದ ಜಿಲ್ಲೆಗೆ ಸಮವಸ್ತ್ರ ಕಳುಹಿಸಿಕೊಟ್ಟ ತತ್‌ಕ್ಷಣ ಶಾಲೆಗಳಿಗೆ ಹಂಚಲಾಗುವುದು ಎಂದು ಶಿಕ್ಷಣ ಇಲಾಖೆ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.