ಗುಡಿ ನವೀಕರಣ 12 ನಿಮಿಷ ಟ್ರಿಮ್‌ ಆಗಿದೆ ದ್ವಿತೀಯಾರ್ಧ ಬದಲಾಗಿದೆ

“ಮಾಸ್ತಿಗುಡಿ’ ಚಿತ್ರಕ್ಕೆ ಮಿಶ್ರಪ್ರತಿಕ್ರಿಯೆ ವ್ಯಕ್ತವಾದ ಹಿನ್ನೆಲೆಯಲ್ಲಿ ಚಿತ್ರತಂಡ ಈಗ ಚಿತ್ರದಲ್ಲಿ ಒಂದಷ್ಟು ಬದಲಾವಣೆ ಮಾಡಿದೆ. ಅದು ಟ್ರಿಮ್‌ ಹಾಗೂ ಒಂದಷ್ಟು ನಿರೂಪಣೆಯಲ್ಲಿ. ಹೌದು, “ಮಾಸ್ತಿಗುಡಿ’ ಚಿತ್ರಕ್ಕೆ ಸಿಕ್ಕ ವಿಮರ್ಶೆ ಹಾಗೂ ಜನರ ಪ್ರತಿಕ್ರಿಯೆಯನ್ನು ಪರಿಗಣಿಸಿರುವ ಚಿತ್ರತಂಡ ಈಗ ಚಿತ್ರವನ್ನು 12 ನಿಮಿಷ ಟ್ರಿಮ್‌ ಮಾಡಿದೆ.

ಜೊತೆಗೆ ಚಿತ್ರದ ದ್ವಿತೀಯಾರ್ಧದ ನಿರೂಪಣಾ ಶೈಲಿ ಹಾಗೂ ಕ್ಲೈಮ್ಯಾಕ್ಸ್‌ನಲ್ಲಿ ಕೊಂಚ ಬದಲಾವಣೆ ಮಾಡಲಾಗಿದೆ. ಈ ಮೂಲಕ ಈಗ ಹೊಸ ವರ್ಷನ್‌ನಲ್ಲಿ “ಮಾಸ್ತಿಗುಡಿ’ ಚಿತ್ರ ಪ್ರದರ್ಶನ ಕಾಣುತ್ತಿದೆ. ಮುಂದಿನ ದಿನಗಳಲ್ಲಿ ಹೊಸ ವರ್ಷನ್‌ “ಮಾಸ್ತಿಗುಡಿ’ಯನ್ನು ಇಷ್ಟಪಡುತ್ತಾರೆಂಬ ವಿಶ್ವಾಸ ಚಿತ್ರತಂಡಕ್ಕಿದೆ.

ಇನ್ನು, ಚಿತ್ರವನ್ನು ಯಾರಧ್ದೋ ಒತ್ತಡಕ್ಕಾಗಿ ಮಾಡಲಾಗಿದೆ ಎಂದು ಹಬ್ಬಿದ ವದಂತಿಗೆ ಪ್ರತಿಕ್ರಿಯಿಸುವ ನಿರ್ದೇಶಕ ನಾಗಶೇಖರ್‌, “ಯಾರ ಒತ್ತಡಕ್ಕೂ ಮಣಿದು ಈ ಸಿನಿಮಾ ಮಾಡಿಲ್ಲ. ವಿಜಯ್‌ ಅವರ ಕತೆ ಚೆನ್ನಾಗಿತ್ತು. ಈ ಕತೆಯನ್ನು ಹೇಗೆ ಬೇಕಾದರೂ ಬಳಸಿಕೊಳ್ಳಿ ಎಂದು ವಿಜಯ್‌ ಸಂಪೂರ್ಣ ಸಹಕಾರ ಕೊಟ್ಟರು.

ಜನರ ಹಾಗೂ ಮಾಧ್ಯಮದ ಅಭಿಪ್ರಾಯವನ್ನು ನಾವು ಗೌರವಿಸಲೇಬೇಕು’ ಎನ್ನುತ್ತಾರೆ ನಾಗಶೇಖರ್‌. “ನಿರ್ದೇಶಕ ನಾಗಶೇಖರ್‌ ಭಿನ್ನವಾಗಿ ಕನಸು ಕಂಡು, ಅದೇ ರೀತಿ ಸಿನಿಮಾ ಮಾಡುವವರು. ಈ ಬಾರಿಯೂ ಆ ತರಹ ಮಾಡಿದ್ದಾರೆ. ಉತ್ತರ ಕರ್ನಾಟಕ ಸೇರಿದಂತೆ ಹಲವು ಕಡೆ ಚಿತ್ರದ ಕಲೆಕ್ಷನ್‌ ಚೆನ್ನಾಗಿದೆ’ ಎನ್ನುತ್ತಾರೆ ರಂಗಾಯಣ ರಘು.