Haryana: ಜಿಲೇಬಿ ಕೊಟ್ಟು ರಾಹುಲ್‌ರನ್ನು ಲೇವಡಿ ಮಾಡಿದ ಬಿಜೆಪಿಗರು!

“ಮಾತುರಾಮ್‌ ಜಂಬೋ ಜಿಲೇಬಿ’ ವಿಚಾರವಿಟ್ಟು ಬಿಜೆಪಿ ವಿರುದ್ಧ ಹರಿಹಾಯ್ದಿದ್ದ ರಾಹುಲ್‌ ಗಾಂಧಿ ಅವರಿಗೆ ತಿರುಗೇಟು ನೀಡಲು ಬಿಜೆಪಿ ಕಾರ್ಯಕರ್ತರು ಪಕ್ಷದ ಗೆಲುವಿನ ಸಿಹಿಯಾಗಿ ಅದೇ ಜಿಲೇಬಿಗಳನ್ನು ಕಾಂಗ್ರೆಸ್‌ ಕಚೇರಿಗೆ ತಲುಪಿಸಿದ್ದಾರೆ.

ಫ‌ಲಿತಾಂಶದ ಬೆನ್ನಲ್ಲೇ ಸಾಮಾಜಿಕ ಜಾಲತಾಣಗಳಲ್ಲೂ ರಾಹುಲ್‌ ಅವರ ಜಂಬೋ ಜಿಲೇಬಿ ಹೇಳಿಕೆಗಳನ್ನು ಲೇವಡಿ ಮಾಡಲಾಗುತ್ತಿದೆ. ಗೋಹಾನಾ ಮಾರುಕಟ್ಟೆಯಲ್ಲಿ ಮಾತುರಾಮ್‌ ಎಂಬವರಿಂದ ತಯಾರಿಸಲ್ಪಡುವ ಜಿಲೇಬಿಗಳ ವಿಚಾರವನ್ನು ರಾಹುಲ್‌ ಚುನಾವಣಾ ಪ್ರಚಾರದಲ್ಲಿ ಬಳಸಿದ್ದರು. ಈ ಜಿಲೇಬಿಗಳನ್ನು ದೇಶಾದ್ಯಂತ, ವಿದೇಶಗಳಿಗೂ ಮಾರಿದರೆ ಮುಂದೊಂದು ದಿನ ಮಾತುರಾಮ್‌ ಜಿಲೇಬಿ ಫ್ಯಾಕ್ಟರಿ ತೆರೆಯಬಹುದು. ಆದರೆ, ಜಿಎಸ್‌ಟಿ ಎಂಬ ಚಕ್ರವ್ಯೂಹದಲ್ಲಿ ಬಿಜೆಪಿ ಅವರನ್ನು ಸಿಲುಕಿಸಿದೆ ಎಂದಿದ್ದರು.

ಮೋದಿ ಕೂಡ ಇದೇ ಜಿಲೇಬಿ ಉಲ್ಲೇಖೀಸಿ, ಕಾಂಗ್ರೆಸ್‌ ವರ್ಷಕ್ಕೆ ಒಬ್ಬ ಪ್ರಧಾನಿಯನ್ನು ತರಲು ಯೋಜಿಸಿದೆ ಕಾಂಗ್ರೆಸ್‌ಗೆ ಕೇಳಿ ಪ್ರಧಾನಿ ಹುದ್ದೆ ಏನು ಮಾತುರಾಮ್‌ ಜಿಲೇಬಿಯಾ? ಎಂದಿದ್ದರು.