ಬಿಗ್ ಆನ್ ಲೈನ್ ಶಾಪಿಂಗ್ Flipkart ಜೊತೆ ಸ್ನ್ಯಾಪ್ ಡೀಲ್ ವಿಲೀನ?

ನವದೆಹಲಿ: ಐಡಿಯಾ ಮತ್ತು ವೋಡಾಪೋನ್ ಇಂಡಿಯಾ ಕಂಪನಿ ವಿಲೀನಗೊಂಡ ಬೆನ್ನಲ್ಲೇ ಜನಪ್ರಿಯ ಆನ್ ಲೈನ್ ಶಾಪಿಂಗ್ ತಾಣವಾದ ಸ್ನ್ಯಾಪ್ ಡೀಲ್ ಫ್ಲಿಪ್ ಕಾರ್ಟ್ ಜೊತೆ ವಿಲೀನವಾಗಲಿದೆ ಎಂಬ ಬಗ್ಗೆ ವರದಿಯಾಗಿದೆ. ಇದು ಭಾರತದ ಇ ಕಾಮರ್ಸ್ ನಲ್ಲೇ ಅತೀ ದೊಡ್ಡ ವಿಲೀನವಾಗಲಿದೆ ಎಂದು ಹೇಳಲಾಗುತ್ತಿದೆ.

ಸ್ನ್ಯಾಪ್ ಡೀಲ್ ಮತ್ತು ಫ್ಲಿಪ್ ಕಾರ್ಟ್ ವಿಲೀನಕ್ಕೆ ಜಪಾನ್ ನ ಪ್ರಸಿದ್ಧ ಸಾಫ್ಟ್ ಬ್ಯಾಂಕ್ ಕಂಪನಿ ಹಣ ಹೂಡಿಕೆ ಮಾಡಲಿದೆ ಎಂದು ವರದಿ ಹೇಳಿದೆ.

ಭಾರತದ ಅತಿ ದೊಡ್ಡ ಆನ್ ಲೈನ್ ರೀಟೇಲರ್ ಫ್ಲಿಪ್ ಕಾರ್ಟ್ ಸಂಸ್ಥೆ, ಸ್ನ್ಯಾಪ್ ಡೀಲ್ ಪ್ರಮುಖ ಪ್ರತಿಸ್ಪರ್ಧಿ ಆನ್ ಲೈನ್ ಶಾಪಿಂಗ್ ತಾಣವಾಗಿದೆ. ಈ ಎರಡು ಸಂಸ್ಥೆಗಳ ವಿಲೀನದಿಂದ ಜನರಿಗೆ ಮತ್ತಷ್ಟು ಜನಸ್ನೇಹಿಯಾಗಲು ಸಹಕಾರಿಯಾಗಲಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.

ಸಾಫ್ಟ್ ಬ್ಯಾಂಕ್ ಹಣ ಹೂಡಿಕೆ:
ವಿಲೀನ ಪ್ರಕ್ರಿಯೆಗಾಗಿ ಜಪಾನಿನ ಪ್ರಸಿದ್ಧ ಟೆಲಿಕಾಂ ಮತ್ತು ಇಂಟರ್ನೆಟ್ ಗ್ರೂಫ್ ಸಂಸ್ಥೆಯಾಗಿರುವ ಸಾಫ್ಟ್ ಬ್ಯಾಂಕ್ ಸ್ನ್ಯಾಪ್ ಡೀಲ್ ಮತ್ತು ಫ್ಲಿಪ್ ಕಾರ್ಟ್ ಸಂಸ್ಥೆಯ ಪ್ರಾಥಮಿಕ ಮತ್ತು 2ನೇ ಶೇರು ಖರೀದಿಗಾಗಿ ಅಂದಾಜು 1.5 ಬಿಲಿಯನ್ ಡಾಲರ್ ಹೂಡಿಕೆ ಮಾಡಲಿದೆಯಂತೆ.

ಸಾಫ್ಟ್ ಬ್ಯಾಂಕ್ ಸಂಸ್ಥೆ ಫ್ಲಿಪ್ ಕಾರ್ಟ್ ಸ್ನ್ಯಾಪ್ ಡೀಲ್ ವಿಲೀನಕ್ಕಾಗಿ ಶೇ.15ರಷ್ಟು ಶೇರು ಹೂಡಿಕೆ ಮಾಡಲಿದೆ.  ಸ್ನ್ಯಾಪ್ ಡೀಲ್ ನಲ್ಲಿ ಶೇ.30ರಷ್ಟು ಶೇರನ್ನು ಹೂಡಿಕೆ ಮಾಡುವ ಮೂಲಕ ಸ್ನ್ಯಾಪ್ ಡೀಲ್ ನಲ್ಲಿ ಅತೀ ಹೆಚ್ಚಿನ ಮೊತ್ತ ಹೂಡಿಕೆ ಮಾಡಿದಂತಾಗಲಿದೆ ಎಂದು ವರದಿ ಹೇಳಿದೆ.

ಈ ಒಪ್ಪಂದದ ಬಗ್ಗೆ ಸಾಫ್ಟ್ ಬ್ಯಾಂಕ್ ಮತ್ತು ಫ್ಲಿಪ್ ಕಾರ್ಟ್ ಸಹಮತಕ್ಕೆ ಬಂದಿರುವುದಾಗಿ ವರದಿ ತಿಳಿಸಿದೆ. ಈ ಬಗ್ಗೆ ಏಪ್ರಿಲ್ ಅಂತ್ಯದೊಳಗೆ ಮಾತುಕತೆ ಮುಕ್ತಾಯವಾಗುವ ಸಾಧ್ಯತೆ ಇರುವುದಾಗಿ ಮೂಲಗಳು ತಿಳಿಸಿರುವುದಾಗಿ ವರದಿ ವಿವರಿಸಿದೆ. ಫೆಬ್ರುವರಿಯಿಂದ ಈ ಪ್ರಸ್ತಾಪ ಇದ್ದು, ಕಳೆದ 15 ದಿನಗಳಿಂದ ಸಾಫ್ಟ್ ಬ್ಯಾಂಕ್ ಸಂಸ್ಥಾಪಕ ಮಸಾಯೋಶಿ ಸನ್ ಅವರು ಖುದ್ದಾಗಿ ವಿಲೀನ ಪ್ರಕ್ರಿಯೆ ಡೀಲ್ ಗೆ ಮುಂದಾಗಿರುವುದಾಗಿ ವರದಿ ತಿಳಿಸಿದೆ.