ಸಾವಯವ ಸಂತೆಗೆ ಉತ್ತಮ ಸ್ಪಂದನೆ

ಕಡೂರು: ಸ್ವದೇಶಿ ಜಾಗರಣ ಮಂಚ್, ಸಾವಯವ ಕೃ ಮಹಾಮಂಡಳ ಮತ್ತು ನಮ್ಮ ಸಹಯೋಗದಲ್ಲಿ ತಾಲೂಕು ಕಚೇರಿ ಆವರಣದಲ್ಲಿ ನಡೆದ ಸಾವಯವ ಸಂತೆಯಲ್ಲಿ ಜನರು ಮುಗಿಬಿದ್ದು ಪದಾರ್ಥಗಳನ್ನು ಖರೀದಿಸಿದರು.

ಕಡೂರು: ತಾಲೂಕು ಕಚೇರಿ ಆವರಣದಲ್ಲಿ ಭಾನುವಾರ ನಡೆದ ಸಾವಯವ ಸಂತೆ ಎಲ್ಲರ ಗಮನ ಸೆಳೆಯಿತು. ಸಾವಯವ ಪದಾರ್ಥಗಳನ್ನು ಗ್ರಾಹಕರು ಮುಗಿಬಿದ್ದು ಖರೀದಿಸಿದರು.

ಸ್ವದೇಶಿ ಜಾಗರಣ ಮಂಚ್, ಸಾವಯವ ಮಹಾಮಂಡಳ ಮತ್ತು ನಮ್ಮ ಸಹಯೋಗದಲ್ಲಿ ಪ್ರತಿ ತಿಂಗಳ ಎರಡನೇ ಭಾನುವಾರ ನಡೆಯುವ ಸಾವಯವ ಸಂತೆಗೆ ಗ್ರಾಹಕರ ಅಪೂರ್ವ ಸ್ಪಂದನೆ ದೊರೆಯಿತು.

ಸಿರಿಧಾನ್ಯಗಳಾದ ಊದಲು, ಕೊರಲೆ, ಸಾಮೆ, ನವಣೆ, ಸಜ್ಜೆ ಮುಂತಾದ ಸಾವಯವ ಪದಾರ್ಥಗಳನ್ನು ಮಾರಾಟ ಮಾಡುವ ಈ ಸಂತೆಯಲ್ಲಿ ಮಾರಾಟದ ಜೊತೆ ಕೃಷಿ ವಿಚಾರ ವಿನಿಮಯಕ್ಕೂ ವೇದಿಕೆಯಾಯಿತು.

ಸಾವಯವ ಪದ್ದತಿಯ ಬೆಲ್ಲ, ತೆಂಗಿನೆಣ್ಣೆ, ಕಡಲೆಕಾಯಿ ಎಣ್ಣೆ, ಬೆಟ್ಟದನಲ್ಲಿ ಪುಡಿ, ಮೆಣಸು, ತರಕಾರಿಗಳಾದ ಕ್ಯಾರೆಟ್, ಜವಳೀಕಾಯಿ, ಬೀನ್ಸ್‌. ಬಹುಮುಖ್ಯವಾಗಿ ಮಧುಮೇಹ ರೋಗಿಗಳಿಗೆ ಉಪಯೋಗಕಾರಿಯಾದ ರಾಜಮುಡಿ ಅಕ್ಕಿಯನ್ನು ಜನರು ಹೆಚ್ಚು ಖರೀದಿಸಿದರು. ಇನ್ನುಳಿದಂತೆ ಕೆಂಪು ಅಕ್ಕಿ ಮತ್ತು ಅಮೃತ್‌ ಮಹಲ್‌ ಹಸುವಿನ ಹಾಲು ಖರೀದಿಸಲು ಜನರು ಮುಗಿಬಿದ್ದರು.

ಇದಲ್ಲದೆ ರೈತರೊಬ್ಬರು ತಯಾರಿಸಿ ತಂದಿದ್ದ ನವಣೆಯ ಬಿಸಿಬೇಳೆ ಬಾತ್‌ ಕೇವಲ ಅರ್ಧಗಂಟೆಯಲ್ಲಿಯೇ ಖಾಲಿಯಾಯಿತು. ಸಾವಯವ ಕೃಷಿಯಲ್ಲಿ ಬೆಳೆದ ಬಾಳೆಹಣ್ಣು, ತರೀಕೆರೆ ರೈತ ರುದ್ರಯ್ಯ ತಂದಿದ್ದ ಕಾಳು ಮೆಣಸು, ಗಿರಿಯಾಪುರದ ಚಂದ್ರಶೇಖರ್‌, ಕಡೂರಿನ ರಶ್ಮಿ ಮತ್ತು ತಂಡ ಅಚ್ಚುಕಟ್ಟಾಗಿ ವ್ಯಾಪರಕ್ಕಾಗಿ ವೇದಿಕೆ ಸಿದ್ದಪಡಿಸಿದ್ದರು. ಮಧ್ಯಾಹ್ನದೊಳಗೆ ಬಹುತೇಕ ಎಲ್ಲಾ ವಸ್ತುಗಳು ಮಾರಾಟವಾದವು. ಸಿರಿಧಾನ್ಯಗಳು ಬೆಂಗಳೂರಿನಲ್ಲಿ ಬಹು ತುಟ್ಟಿ. ಈ ಸಂತೆಯಲ್ಲಿ ಕಡಿಮೆ ಬೆಲೆಗೆ ಸಿಕ್ಕಿರುವುದು ತೃಪ್ತಿಯಾಗಿದೆ ಎಂದು ಬೆಂಗಳೂರಿನ ರೇಖಾ ರಂಗನಾಥ್‌ ತಿಳಿಸಿದರು.

ಸಾವಯವ ಕೃಷಿಯ ಬಗ್ಗೆ ರೈತರಲ್ಲಿ ಹೆಚ್ಚು ಆಸಕ್ತಿ ಮೂಡಬೇಕು. ಆರೋಗ್ಯ ಮತ್ತು ಆರ್ಥಿಕ ಅಭಿವೃದ್ಧಿಗೆ ಪೂರಕ ಸಾವಯವ ಕೃಷಿ. ಅದು ಅನಿವಾರ್ಯ. ರೈತರು ಇದನ್ನು ಅರಿಯಬೇಕು ಎಂದು ಕೃಷಿಕರಾದ ಬಿ.ಎಂ. ಕೊಪ್ಪಲು, ಧನಂಜಯ ತಿಳಿಸಿದರು.