ಭಿಕ್ಷುಕರ ತಾಣವಾದ ಹೆಬ್ರಿ ಮೂರು ರಸ್ತೆ ಬಸ್‌ ತಂಗುದಾಣ

ಹೆಬ್ರಿ: ಹೆಬ್ರಿ ಸಮೀಪ ಮೂರು ರಸ್ತೆ ಲಯನ್‌ ಸರ್ಕಲ್‌ ಬಳಿ ಇರುವ ಬಸ್ಸು ತಂಗುದಾಣ ಇದೀಗ ಭಿಕ್ಷುಕರ ವಾಸಸ್ಥಾನವಾಗಿದೆ. ಬಸ್ಸು ತಂಗುದಾಣದ ಮೇಲೆ ಮರಗಿಡಗಳು ಬೆಳೆದು ಪ್ರಯಾಣಿಕರು ಒಳಗೆ ಹೋಗಲಾರದ ಪರಿಸ್ಥಿತಿ ನಿರ್ಮಾಣಗೊಂಡಿದೆ.

ಈ ಭಾಗದಲ್ಲಿ ಸ.ಪ.ಪೂ. ಕಾಲೇಜು, ಸರಕಾರಿ ಪ್ರೌಢಶಾಲೆ, ಸ.ಪ್ರ.ದ.ಕಾಲೇಜು ಹಾಗೂ ಸಮುದಾಯ ಆರೋಗ್ಯ ಕೇಂದ್ರಕ್ಕೆ ಹೋಗುವ ನೂರಾರು ವಿದ್ಯಾರ್ಥಿಗಳು ಹಾಗೂ ಸಾರ್ವಜನಿಕರು ದಿನಾ ಇದೇ ತಂಗುದಾಣದ ಬಳಿ ನಿಲ್ಲುವ ಬಸ್ಸು ಏರಿ ಹೋಗಬೇಕಾಗುತ್ತದೆ. ಆದರೆ ತಂಗುದಾಣವೇ ಭಿಕ್ಷುಕರ ತಾಣವಾಗಿ, ಒಳಗೆ ಕಸಕಡ್ಡಿ, ಪೊದೆ ತುಂಬಿ ಕೊಂಡಿದೆ. ಪ್ರಯಾಣಿಕರಿಗೆ ನಿಲ್ಲಲು ಅನುಕೂಲವಾಗುವಂತೆ ನಿರ್ಮಿಸಿದ ತಂಗುದಾಣದಲ್ಲಿ ನಿಲ್ಲಲಾರದೆ ಮರದಡಿಯಲ್ಲಿ ನಿಂತು ಆಶ್ರಯ ಪಡೆಯುವ ಪರಿಸ್ಥಿತಿ ಪ್ರಯಾಣಿಕರರಿಗೆ ಬಂದೊದಗಿದೆ.

ಪಂ. ಗಮನಕ್ಕೆ ತಂದರೂ ಪ್ರಯೋಜನವಿಲ್ಲ: ಈ ಬಗ್ಗೆ  ಈಗಾಗಲೇ ಹಲವಾರು ಬಾರಿ ಪಂಚಾಯತ್‌ ಗಮನಕ್ಕೆ ತಂದಿದ್ದು ಅಲ್ಲದೆ ಗ್ರಾಮ ಸಭೆಯಲ್ಲಿ ಪ್ರಸ್ತಾವ ಮಾಡಲಾಗಿತ್ತು. ಮಳೆಗಾಲವಾದ್ದರಿಂದ ದಿನನಿತ್ಯ ನೂರಾರು ಪ್ರಯಾಣಿಕರು, ಶಾಲಾ ವಿದ್ಯಾರ್ಥಿಗಳು ಬಸ್‌ ತಂಗುದಾಣದ ಒಳಗೆ ಹೋಗಲಾಗದೆ ಮರದಡಿ ನಿಂತು ಬಸ್ಸನ್ನು ಕಾಯುತ್ತಾರೆ ಇನ್ನದರೂ ಸಂಬಂಧಪಟ್ಟವರು ಈ ಬಗ್ಗೆ ಗಮನ ಹರಿಸಿ ಕೂಡಲೇ ಸೂಕ್ತ ಕ್ರಮ ಕೈಗೊಳ್ಳುವಂತೆ ಗ್ರಾಮಸ್ಥರಾದ ಸದಾಶಿವ ಪ್ರಭು ಆಗ್ರಹಿಸಿದ್ದಾರೆ.

ಬದಲಿ ಬಸ್‌ ತಂಗುದಾಣ 
ಬಸ್‌ ತಂಗುದಾಣದ ಬಗ್ಗೆ ನಮಗೆ ದೂರು ಬಂದಿದೆ. ಈ ಬಸ್‌ ತಂಗು ದಾಣದಲ್ಲಿ ಕುಳಿತರೆ ಬಸ್‌ಗಳು ಬರುವುದು ಕಾಣುವುದಿಲ್ಲವಾದ್ದರಿಂದ ಬದಲಿ ತಂಗುದಾಣದ ವ್ಯವಸ್ಥೆಯನ್ನು ಮಾಡಲಾಗುವುದು. ಗ್ರಾ.ಪಂ. ಅನುದಾನದಿಂದ  ಈಗಾಗಲೇ ಇರುವ ಬಸ್‌ ತಂಗುದಾಣದ ಎದುರು ನೂತನ ಬಸ್‌ ತಂಗುದಾಣ ಶೀಘ್ರದಲ್ಲಿ ಆಗಲಿದ್ದು  ಸಮಸ್ಯೆ ಬಗೆಹರಿಯಲಿದೆ.
-ಸುಧಾಕರ ಹೆಗ್ಡೆ, ಅಧ್ಯಕ್ಷರು, ಗ್ರಾ.ಪಂ. ಹೆಬ್ರಿ