ಅತ್ಯಾಚಾರ ಆರೋಪಿಯ ಬಂಧನ

ಬೆಂಗಳೂರು: ಉದ್ಯೋಗ ಕೊಡಿಸುವುದಾಗಿ ಯುವತಿಯೊಬ್ಬಳನ್ನು ನೇಪಾಳದಿಂದ ಬೆಂಗಳೂರಿಗೆ ಕರೆಸಿಕೊಂಡು ಆತ್ಯಾಚಾರವೆಸಗಿದ ಆರೋಪಿಯನ್ನು ಬಾಣಸವಾಡಿ ಪೊಲೀಸರು ಬಂಧಿಸಿದ್ದಾರೆ. ನೇಪಾಳ ಮೂಲದ ಸುರೇಶ್‌ (30) ಬಂಧಿತ. ನೇಪಾಳ ಮೂಲದ ಯುವತಿಗೆ ಬೆಂಗಳೂರಿನಲ್ಲಿ ಕೆಲಸ ಕೊಡಿಸುವುದಾಗಿ ಫೆ.21ರಂದು ಕರೆಸಿಕೊಂಡು ಹೋಟೆಲ್‌ವೊಂದರಲ್ಲಿ ಕೃತ್ಯವೆಸಗಿದ್ದಾನೆ.

ಘಟನೆ ಬೆಳಕಿಗೆ ಬರುತ್ತಿದ್ದಂತೆ ಆರೋಪಿ ನೇಪಾಳಕ್ಕೆ ಪಾರಾರಿಯಾಗಲು ಯತ್ನಿಸಿದ್ದ. ಈ ಮಾಹಿತಿ ಪಡೆದ ವಿಶೇಷ ತಂಡ ಆರೋಪಿಯನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದೆ ಎಂದು ಹಿರಿಯ ಅಧಿಕಾರಿಯೊಬ್ಬರು “ಉದಯವಾಣಿ’ಗೆ ತಿಳಿಸಿದ್ದಾರೆ.

ನೇಪಾಳ ಮೂಲದ ಸುರೇಶ್‌ ಹಲವು ವರ್ಷಗಳ ಹಿಂದೆಯೇ ಬೆಂಗಳೂರಿಗೆ ಬಂದಿದ್ದು, ಸಂತ್ರಸ್ತೆ ಜತೆ ನಿರಂತರ ಸಂಪರ್ಕದಲ್ಲಿದ್ದ. ಇತ್ತೀಚೆಗೆ ಯುವತಿಗೆ ಕರೆ ಮಾಡಿ “ನೀನು ಬೆಂಗಳೂರಿಗೆ ಬಂದರೆ ಕೆಲಸ ಕೊಡಿಸುತ್ತೇನೆ. ಹಾಗೆಯೇ ಇಬ್ಬರು ಮದುವೆಯಾಗಬಹುದು’ ಎಂದು ನಂಬಿಸಿದ್ದಾನೆ.

ಇದನ್ನು ನಂಬಿದ ಸಂತ್ರಸ್ತೆ ಫೆ.21ರಂದು ನಗರಕ್ಕೆ ಬಂದಿದ್ದಳು. ಆಕೆಗೆ ತಾನೂ ಕೆಲಸ ಮಾಡುವ ಹೋಟೆಲ್‌ ಕೊಣೆಯಲ್ಲೇ ತಂಗಲು ಅವಕಾಶ ನೀಡಿದ್ದ. ಮರು ದಿನ  ಮದುವೆಯಾಗಿ ನಂಬಿಸಿ ಅತ್ಯಾಚಾರವೆಸಗಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಆರೋಪಿ ಸುರೇಶ್‌ ಕೃತ್ಯವೆಸಗಿದ ಬಳಿಕ ಮೊಬೈಲ್‌ ಸ್ವಿಚ್‌ ಆಫ್ ಮಾಡಿಕೊಂಡು ನಾಪತ್ತೆಯಾಗಿದ್ದ. ಇತ್ತ ಸಂತ್ರಸ್ತೆ ಕೃತ್ಯದ ಬಗ್ಗೆ ಬಾಣಸವಾಡಿ ಠಾಣೆಗೆ ದೂರು ನೀಡಿದ್ದಳು. ಈ ಹಿನ್ನೆಲೆಯಲ್ಲಿ ಆರೋಪಿ ಪತ್ತೆಗಾಗಿ ವಿಶೇಷ ತಂಡ ರಚಿಸಲಾಗಿತ್ತು.

ಈ ತಂಡ ನೇಪಾಳಿಯರು ಹೆಚ್ಚು ವಾಸಿಸುವ ಎಚ್‌ಆರ್‌ಬಿಆರ್‌ ಲೇಔಟ್‌, ಹೆಣ್ಣೂರು ಬಂಡೆ, ಮಾರುತಿ ಲೇಔಟ್‌ ಹಾಗೂ ಇತರೆಡೆ ಹುಡುಕಾಟ ನಡೆಸಿ, ಸುಮಾರು 50 ಮಂದಿಯನ್ನು ವಿಚಾರಣೆ ನಡೆಸಿದಾಗ ಆರೋಪಿ ನೇಪಾಳಕ್ಕೆ ಪಾರಾರಿಯಾಗಲು ರೈಲಿನಲ್ಲಿ ಹೋಗಿರವ ಮಾಹಿತಿ ಲಭಿಸಿತ್ತು. 

ಬಾತ್‌ರೂಮ್‌ನಲ್ಲಿದ್ದ ಆರೋಪಿ: ಆರೋಪಿ ಬೆನ್ನತ್ತಿದ್ದ ಒಂದು ತಂಡ ತಮಿಳುನಾಡಿನ ಸೇಲಂನಲ್ಲಿ ಮಾಹಿತಿದಾರನನ್ನು ವಿಚಾರಿಸಿದ್ದು, ಆರೋಪಿ ಸೇಲಂನಿಂದ ವಿವೇಕ ಎಕ್ಸ್‌ಪ್ರೆಸ್‌ ರೈಲಿನಲ್ಲಿ ಅಸ್ಸಾಂನ ಗುಹಾಟಿಗೆ ಹೋಗುತ್ತಿದ್ದಾನೆ ಎಂಬ ಮಾಹಿತಿ ಸಂಗ್ರಹಿಸಿತ್ತು. ಕೂಡಲೇ ವಿಶೇಷ ತಂಡ ವಿಮಾನದ ಮೂಲಕ ಒಡಿಶಾದ ಭುವನೇಶ್ವರ ರೈಲ್ವೆ ನಿಲ್ದಾಣ ತಲುಪಿತ್ತು.

ನಂತರ ರೈಲು ಬರುತ್ತಿದ್ದಂತೆ ಎಲ್ಲ ಬೋಗಿಗಳನ್ನು ಪರಿಶೀಲಿಸಿ, ಸಾಮಾನ್ಯ ದರ್ಜೆಯ ಕಂಪಾರ್ಟ್‌ಮೆಂಟ್‌ನ ಬಾತ್‌ ರೂಮ್‌ನಲ್ಲಿ ಅಡಗಿಕೊಂಡಿದ್ದ ಆರೋಪಿ ಸುರೇಶ್‌ನನ್ನು ಬಂಧಿಸುವಲ್ಲಿ ತಂಡ ಯಶಸ್ವಿಯಾಗಿದೆ ಎಂದು ಅಧಿಕಾರಿ ವಿವರಿಸಿದರು.