ಥಾಣೆ: ಬಿರುಕು ಬಿದ್ದು ವಾಲತೊಡಗಿದ ಐದಂತಸ್ತಿನ ಕಟ್ಟಡ ತೆರವು

ಥಾಣೆ : ಇಲ್ಲಿನ ಹಳೇ ಮಾರ್ಕೆಟ್‌ ಪ್ರದೇಶದಲ್ಲಿರುವ ಐದು ಮಹಡಿಗಳ ಕಟ್ಟಡದಲ್ಲಿ ತೀವ್ರ ಮಟ್ಟದ ಬಿರುಕುಗಳು ಕಾಣಿಸಿಕೊಂಡು ಕಟ್ಟಡವು ಒಂದು ಬದಿಗೆ ವಾಲಲು ಆರಂಭಿಸಿರುವುದನ್ನು ಪರಿಗಣಿಸಿ ಕಟ್ಟಡದಲ್ಲಿ ವಾಸವಾಗಿರುವ 9 ಕುಟುಂಬಗಳನ್ನು ಇಂದು ಮುನ್ನೆಚ್ಚರಿಕೆಯ ಕ್ರಮವಾಗಿ ಸ್ಥಳಾಂತರಿಸಲಾಗಿದೆ ಎಂದು ಥಾಣೆ ಮುನಿಸಿಪಲ್‌ ಕಾರ್ಪೋರೇಶನ್‌ ಅಧಿಕಾರಿಗಳು ತಿಳಿಸಿದ್ದಾರೆ.

ಹಳೇ ಮಾರ್ಕೆಟ್‌ ಪ್ರದೇಶದಲ್ಲಿನ ಸವೇರಾ ಅಪಾರ್ಟ್‌ಮೆಂಟ್‌ ಕಟ್ಟಡವು ಅತ್ಯಂತ ಅಪಾಯಕಾರಿ ಸ್ಥಿತಿಯಲ್ಲಿ ಇರುವುದನ್ನು ಗಮನಿಸಿ ಅದರೊಳಗಿನ ನಿವಾಸಿಗಳನ್ನು ಒಡನೆಯೇ ಸ್ಥಳಾಂತರಿಸಲಾಯಿತೆಂದು ಟಿಎಂಸಿ ಅಧಿಕಾರಿ ಸಂತೋಷ್‌ ಕದಮ್‌ ಹೇಳಿದರು.

ನೆಲ ಹಾಗೂ ಮೇಲಿನ ನಾಲ್ಕು ಅಂತಸ್ತುಗಳನ್ನು ಒಳಗೊಂಡ ಒಟ್ಟು ಐದು ಮಹಡಿಗಳ ಈ ಕಟ್ಟಡದಲ್ಲಿ ಗಂಭೀರ ಬಿರುಕುಗಳು ಕಾಣಿಸಿಕೊಂಡು ಕಟ್ಟಡವು ತನ್ನ ಒಂದು ಬದಿಯತ್ತ ವಾಲತೊಡಗಿದದೆ. ಕಟ್ಟಡಕ್ಕೆ ಕೂಡಲೇ ನೀರು ಮತ್ತು ವಿದ್ಯುತ್‌ ಪೂರೈಕೆಯನ್ನು ನಿಲ್ಲಿಸಲಾಗುವುದು ಎಂದು ಮುಖ್ಯ ಅಗ್ನಿ ಶಾಮಕ ದಳದ ಅಧಿಕಾರಿ ಶಶಿಕಾಂತ್‌ ಕಾಳೆ ತಿಳಿಸಿದ್ದಾರೆ. 

ಅತಿಕ್ರಮಣ ನಿಗ್ರಹ ಇಲಾಖೆಯ ಅಧಿಕಾರಿಗಳು ಈ ಕಟ್ಟಡವನ್ನು ಯಾವಾಗ ಧರಾಶಾಯಿ ಮಾಡಲಾಗುವುದೆಂಬುದನ್ನು ನಿರ್ಧರಿಸಲಿದ್ದಾರೆ ಎಂದವರು ಹೇಳಿದರು.