ಭಯೋತ್ಪಾದನೆಯು ಬಹುತಲೆಯ ರಾಕ್ಷಸ: ಸೇನಾ ಮುಖ್ಯಸ್ಥ ರಾವತ್‌

ಹೊಸದಿಲ್ಲಿ : ಭಯೋತ್ಪಾದನೆಯ ಪಿಡುಗು ಬಹುತಲೆಯ ರಾಕ್ಷಸನಂತೆ ಹರಡುತ್ತಿದೆ ಎಂದು ಸೇನಾ ಮುಖ್ಯಸ್ಥ ಬಿಪಿನ್‌ ರಾವತ್‌ ಎಚ್ಚರಿಸಿದ್ದಾರೆ.

ದೇಶಗಳು ತಮ್ಮ ಸರಕಾರದ ನೀತಿ ಎಂಬಂತೆ ಭಯೋತ್ಪಾದನೆ ಬೆಂಬಲಿಸುವುದನ್ನು ಮುಂದುವರಿಸುವ ತನಕ ಉಗ್ರವಾದವನ್ನು ಆಮೂಲಾಗ್ರವಾಗಿ ಮಟ್ಟಹಾಕಲು ಸಾಧ್ಯವಿಲ್ಲ ಎಂದು ಜನರಲ್‌ ರಾವತ್‌ ಹೇಳಿದರು. 

ರಾಷ್ಟ್ರ ರಾಜಧಾನಿಯಲ್ಲಿ ಏರ್ಪಟ್ಟ ರೈಸಿನಾ ಡಯಲಾಗ್‌ ನಲ್ಲಿ ಚರ್ಚಾ ಗೋಷ್ಠಿಯಲ್ಲಿ ಮಾತನಾಡುತ್ತಿದ್ದ ಅವರು ಭಯೋತ್ಪಾದನೆಯು ಹೊಸ ರೂಪದ ಸಮರವಾಗಿ ಪರಿವರ್ತಿತವಾಗುತ್ತಿದೆ; ಇದರಿಂದಾಗಿ ಭಯೋತ್ಪಾದನೆಯು ಬಹುತಲೆಗಳ ರಾಕ್ಷಸನಂತೆ ಎಲ್ಲೆಡೆ ಹರಡುತ್ತಿದೆ ಎಂದು ಹೇಳಿದರು. 

ಜನರಲ್‌ ರಾವತ್‌ ಅವರು ಪಾಕಿಸ್ಥಾನವನ್ನು ನೇರವಾಗಿ ಹೆಸರಿಸದೆ, ಭೀತಿವಾದವನ್ನು ಸರಕಾರದ ನೀತಿಯಂತೆ ಕೆಲವು ದೇಶಗಳು ಪ್ರೋತ್ಸಾಹಿಸುತ್ತಿರುವುದನ್ನು  ನಿಲ್ಲಿಸುವ ತನಕ ಭಯೋತ್ಪಾದನೆಯನ್ನು ಆಮೂಲಾಗ್ರವಾಗಿ ಮಟ್ಟಹಾಕಲಾರೆವು ಎಂದು ಹೇಳಿದರು.