ನೂತನ ಟೆನಿಸ್‌ ರ್‍ಯಾಂಕಿಂಗ್‌: 4ನೇ ಸ್ಥಾನಕ್ಕೆ ಜಿಗಿದ ಸ್ವಿಟೋಲಿನಾ

ಪ್ಯಾರಿಸ್‌: ಉಕ್ರೇನ್‌ನ ಎಲಿನಾ ಸ್ವಿಟೋಲಿನಾ ನೂತನ ಟೆನಿಸ್‌ ರ್‍ಯಾಂಕಿಂಗ್‌ನಲ್ಲಿ 3 ಸ್ಥಾನಗಳ ಭಡ್ತಿ ಪಡೆದು 4ಕ್ಕೆ ಏರಿದ್ದಾರೆ. ರವಿವಾರ ಸಿಂಗಾಪುರದಲ್ಲಿ ಅಮೆರಿಕದ ಸ್ಲೋನ್‌ ಸ್ಟೀಫ‌ನ್ಸ್‌ ಅವರನ್ನು ಸೋಲಿಸಿದ ಎಲಿನಾ, ಯುಎಸ್‌ ಓಪನ್‌ ಚಾಂಪಿಯನ್‌ ನವೋಮಿ ಒಸಾಕಾ ಅವರನ್ನು ಹಿಂದಿಕ್ಕಿದರು. ನವೋಮಿ 5 ಸ್ಥಾನಕ್ಕಿಳಿದಿದ್ದಾರೆ. ಸಿಮೋನಾ ಹಾಲೆಪ್‌ ಅಗ್ರ ಸ್ಥಾನದಲ್ಲಿಯೇ ಇದ್ದು, ಪೆಟ್ರಾ ಕ್ವಿಟೋವಾ 7ಕ್ಕೆ ಇಳಿದಿದ್ದಾರೆ.

ಆ್ಯಂಡ ರ್ಸನ್‌ಗೆ 6ನೇ ಸ್ಥಾನ
ಪ್ರಸ್ತಕ ಋತುವಿನ ಅಂತಿಮ ಟೂರ್ನಿಯಾದ “ಎ ಟಿಪಿ ಫೈನಲ್ಸ್‌’ ಪ್ರವೇಶಿಸಿರುವ ಕೆವಿನ್‌ ಆ್ಯಂಡರ್ಸನ್‌ ಪುರುಷರ ರ್‍ಯಾಂಕಿಂಗ್‌ನಲ್ಲಿ 2 ಸ್ಥಾನಗಳ ಪ್ರಗತಿಯೊಂದಿಗೆ 6ನೇ ಸ್ಥಾನಕ್ಕೆ ಬಂದಿದ್ದಾರೆ. ರಫೆಲ್‌ ನಡಾಲ್‌ ಅಗ್ರಸ್ಥಾನ ಕಾಯ್ದುಕೊಂಡಿದ್ದರೂ ಇದಕ್ಕೀಗ ಆಪತ್ತು ಎದುರಾಗಿದೆ. ಮುಂಬರುವ “ಪ್ಯಾರಿಸ್‌ ಮಾಸ್ಟರ್’ನಲ್ಲಿ ಒಂದು ವೇಳೆ ನೊವಾಕ್‌ ಜೊಕೋವಿಕ್‌ ಪ್ರಶಸ್ತಿ ಗೆದ್ದರೆ ಅವರು ಅಗ್ರ ಸ್ಥಾನಕ್ಕೇರಲಿದ್ದಾರೆ.