ತೆಲುಗಿನತ್ತ ಶ್ರದ್ಧಾ 

“ಯು ಟರ್ನ್’ ಮೂಲಕ ಕನ್ನಡ ಚಿತ್ರರಂಗಕ್ಕೆ ಎಂಟ್ರಿಕೊಟ್ಟಿರುವ ಶ್ರದ್ಧಾ ಶ್ರೀನಾಥ್‌ ನೋಡ ನೋಡುತ್ತಲೇ ಪರಭಾಷೆಯತ್ತ ಮುಖ ಮಾಡಿದ್ದು ನಿಮಗೆ ಗೊತ್ತೇ ಇದೆ. ಶ್ರದ್ಧಾ ಅದೃಷ್ಟ ಕೂಡಾ ಚೆನ್ನಾಗಿತ್ತು, ಪರಭಾಷೆಯಲ್ಲಿ ಒಂದಷ್ಟು ಅವಕಾಶಗಳ ಮೂಲಕ ಗುರುತಿಸಿಕೊಳ್ಳುತ್ತಾ ಹೋದ ಶ್ರದ್ಧಾಗೆ ತಮಿಳಿನ “ವಿಕ್ರಂ ವೇದ’ ಚಿತ್ರ ಒಳ್ಳೆಯ ಹೆಸರು ತಂದುಕೊಟ್ಟಿದ್ದು ಸುಳ್ಳಲ್ಲ.

ಈಗ ಶ್ರದ್ಧಾ ಶ್ರೀನಾಥ್‌ ತೆಲುಗು ಚಿತ್ರರಂಗಕ್ಕೂ ಕಾಲಿಡುತ್ತಿದ್ದಾರೆಂಬ ಸುದ್ದಿ ಜೋರಾಗಿ ಕೇಳಿಬರುತ್ತಿದೆ. ಅದು ಅಲ್ಲಿನ ಸ್ಟಾರ್‌ ನಟನ ಸಿನಿಮಾ ಮೂಲಕ. ಹೌದು, ತೆಲುಗಿನಲ್ಲಿ ವಿಭಿನ್ನ ಸಿನಿಮಾ ಮೂಲಕ ಯಶಸ್ಸನ್ನು ತಮ್ಮದಾಗಿಸಿಕೊಳ್ಳುತ್ತಿರುವ ನಾನಿ ನಾಯಕರಾಗಿರುವ ಹೊಸ ಚಿತ್ರಕ್ಕೆ ಶ್ರದ್ಧಾ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆಂಬ ಸುದ್ದಿ ಜೋರಾಗಿ ಓಡಾಡುತ್ತಿದೆ. ನಾನಿ “ಜೆರ್ಸಿ’ ಎಂಬ ಸಿನಿಮಾ ಒಪ್ಪಿಕೊಂಡಿದ್ದು, ಚಿತ್ರತಂಡ ನಾಯಕಿಯ ಹುಡುಕಾಟ ನಡೆಸುತ್ತಿದ್ದಾಗ ಅವರ ಕಣ್ಣಿಗೆ ಶ್ರದ್ಧಾ ಬಿದ್ದಿದ್ದಾರೆ.

ಶ್ರದ್ಧಾ ನಟನೆ ಇಷ್ಟವಾಗಿ ಅವರನ್ನು ನಾಯಕಿಯನ್ನಾಗಿ ಆಯ್ಕೆ ಮಾಡಿದ್ದಾರೆನ್ನಲಾಗಿದೆ. ಈ ಮೂಲಕ ಶ್ರದ್ಧಾ ತೆಲುಗು ಚಿತ್ರರಂಗಕ್ಕೆ ಕಾಲಿಟ್ಟಂತಾಗುತ್ತದೆ. ಇನ್ನು, “ಜೆರ್ಸಿ’ ಚಿತ್ರದಲ್ಲಿ ನಾನಿ ಕ್ರಿಕೆಟರ್‌ ಆಗಿ ಕಾಣಿಸಿಕೊಳ್ಳುತ್ತಿದ್ದ, ಈಗಾಗಲೇ ಅದಕ್ಕೆ ಬೇಕಾದ ತಯಾರಿ ಕೂಡಾ ನಡೆಸುತ್ತಿದ್ದಾರಂತೆ. ಚಿತ್ರದಲ್ಲಿ ಶ್ರದ್ಧಾ ಪಾತ್ರ ಏನು ಎಂಬುದರ ಬಗ್ಗೆ ಮಾಹಿತಿ ಇಲ್ಲ. ಸದ್ಯ ಶ್ರದ್ಧಾ ಕನ್ನಡದಲ್ಲಿ ಶಿವರಾಜಕುಮಾರ್‌ ಅವರ “ರುಸ್ತುಂ’ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ.