ಮುಗುಳು ನಗೆಗೆ ನೀ ಹೇಳು ಸೇರಿದೆ

“ಮುಗುಳು ನಗೆ’ ಚಿತ್ರವನ್ನು ನೋಡಿ ಬಂದ ಪ್ರೇಕ್ಷಕ ಹೇಳಿದ್ದೊಂದೇ ಮಾತು. ಚಿತ್ರದಲ್ಲಿ ಎಲ್ಲಾ ಇದೆ, ಟೈಟಲ್‌ ಸಾಂಗ್‌ ಒಂದು ಮಿಸ್‌ ಆಗಿದೆ ಎಂದು. ಏಕೆಂದರೆ, “ಮುಗುಳು ನಗೆ’ ಚಿತ್ರಕ್ಕಾಗಿ ವಿ. ಹರಿಕೃಷ್ಣ  ಸಂಯೋಜಿಸಿದ ಹಾಡುಗಳ ಪೈಕಿ ಅತ್ಯಂತ ಜನಪ್ರಿಯವಾದ ಹಾಡೆಂದರೆ ಅದು ಸೋನು ನಿಗಮ್‌ ಹಾಡಿದ “ಮುಗುಳು ನಗೆಯೇ ನೀ ಹೇಳು …’ ಹಾಡು.

ಚಿತ್ರ ಬಿಡುಗಡೆಯಾದ ಸಂದರ್ಭದಲ್ಲಿ ಕಾರಣಾಂತರಗಳಿಂದ ಈ ಹಾಡನ್ನು ಚಿತ್ರದಲ್ಲಿ ಸೇರಿಸಲಾಗಿರಲಿಲ್ಲ. ಆದರೆ, ಪ್ರೇಕ್ಷಕರ ಒತ್ತಾಯದ ಮೇರೆಗೆ ಇದೀಗ, ಆ ಹಾಡನ್ನು ಸೇರಿಸಲಾಗಿದೆ. ಹೌದು, “ಮುಗುಳು ನಗೆ’ ಚಿತ್ರ ಬಿಡುಗಡೆಯಾದಾಗ “ಮುಗುಳು ನಗೆಯೇ ನೀ ಹೇಳು …’ ಹಾಡು ಇರಲಿಲ್ಲ. ಚಿತ್ರ ನೋಡಿ ಬಂದ ಪ್ರೇಕ್ಷಕರು, ಆ ಹಾಡು ಇರದ ಬಗ್ಗೆ ತಮ್ಮ ಬೇಸರ ಹೊರಹಾಕಿದ್ದರು.

ಇದನ್ನು ಗಂಭೀರವಾಗಿ ಪರಿಗಣಿಸಿರುವ ಚಿತ್ರತಂಡದವರು, ಇದೀಗ ಚಿತ್ರಕ್ಕೆ ಆ ಹಾಡನ್ನು ಸೇರಿಸಿದ್ದಾರೆ. ಹಾಗಾಗಿ ಇನ್ನು ಮುಂದೆ, ಚಿತ್ರದಲ್ಲಿ ಆ ಹಾಡು ಮಿಸ್‌ ಆಗುವುದಿಲ್ಲ ಎಂಬುದು ನಿಮ್ಮ ಗಮನದಲ್ಲಿರಲಿ. “ಮುಗುಳು ನಗೆ’ ಚಿತ್ರದ ಮೂಲಕ ಗಣೇಶ್‌ ಮತ್ತು ಯೋಗರಾಜ್‌ ಭಟ್‌, ಸುಮಾರು 10 ವರ್ಷಗಳ ನಂತರ ಒಟ್ಟಿಗೆ ಕೆಲಸ ಮಾಡಿದ್ದಾರೆ.

ಇನ್ನು ಈ ಚಿತ್ರದಲ್ಲಿ ಗಣೇಶ್‌ ಎದುರು ಆಶಿಕಾ, ಅಪೂರ್ವ ಅರೋರಾ, ನಿಖೀತಾ ನಾರಾಯಣ್‌ ಮತ್ತು ಅಮೂಲ್ಯ ನಾಯಕಿಯರಾಗಿ ನಟಿಸಿದ್ದಾರೆ ನಿರ್ದೇಶನದ ಜೊತೆಗೆ ಯೋಗರಾಜ್‌ ಭಟ್‌ ಕಥೆ, ಚಿತ್ರಕಥೆ, ಸಂಭಾಷಣೆ ಮತ್ತು ಸಾಹಿತ್ಯವನ್ನೂ ಬರೆದಿದ್ದು, ವಿ. ಹರಿಕೃಷ್ಣ ಸಂಗೀತ ಸಂಯೋಜಿಸಿದ್ದಾರೆ. ಇನ್ನು ಚಿತ್ರವನ್ನು ಸೈಯದ್‌ ಸಲಾಂ ನಿರ್ಮಿಸಿದ್ದು, ಮೈಸೂರ್‌ ಟಾಕೀಸ್‌ ಮೂಲಕ ಜಾಕ್‌ ಮಂಜು ಚಿತ್ರವನ್ನು ಬಿಡುಗಡೆ ಮಾಡಿದ್ದಾರೆ.