ನವರಾತ್ರಿ ಕಾರ್ಯಕ್ರಮದಿಂದ ಮನೆಗೆ ಮರಳುತ್ತಿದ್ದ ಬಾಲಕಿಯ ಅಪಹರಣ

ಥಾಣೆ, ಮಹಾರಾಷ್ಟ್ರ : ನವರಾತ್ರಿ ಉತ್ಸವದ ಅಂಗವಾಗಿ ನಡೆಯುತ್ತಿದ್ದ ಗಾರ್ಭಾ ನೃತ್ಯ ಕಾರ್ಯಕ್ರಮವನ್ನು ವೀಕ್ಷಿಸಿ ಮನೆಯವರೊಂದಿಗೆ ಮನೆಗೆ ಮರಳುತ್ತಿದ್ದ 17ರ ಹರೆಯದ ಬಾಲಕಿಯನ್ನು ಆಕೆಯ ಇಬ್ಬರು ನೆರೆಕರೆಯ ವ್ಯಕ್ತಿಗಳೇ ಬಲವಂತದಿಂದ ಕಾರಿನಲ್ಲಿ ತುಂಬಿ ಅಪಹರಿಸಿರುವ ಘಟನೆ ವರದಿಯಾಗಿದೆ. 

ಹುಡುಗಿಯು ಬದ್ಲಾಪುರ ಟೌನ್‌ಶಿಪ್‌ ನ ರಮೇಶ್‌ ವಾಡಿ ಪ್ರದೇಶದ ನಿವಾಸಿ. ಗಾರ್ಭಾ ನೃತ್ಯ ಕಾರ್ಯಕ್ರಮ ವೀಕ್ಷಿಸಿ ತನ್ನ ಚಿಕ್ಕಮ್ಮ ಮತ್ತು ಸೋದರಿಯೊಂದಿಗೆ ಮನೆಗೆ ಮರಳುತ್ತಿದ್ದ ವೇಳೆ ಕಾರಿನಲ್ಲಿ ಬಂದ ನರೆಕರೆಯ ವ್ಯಕ್ತಿಗಳಿಬ್ಬರು ಆಕೆಯನ್ನು ಬಲವಂತದಿಂದ ಕಾರಿಗೆ ಹಾಕಿ ಅಪಹರಿಸಿದರು. 

ಒಡನೆಯೇ ಹುಡುಗಿಯ ಚಿಕ್ಕಮ್ಮ ವಿಷಯವನ್ನು ಆಕೆಯ ಹೆತ್ತವರಿಗೆ ತಿಳಿಸಿದಳು. ಅಪಹರಣಕಾರರನ್ನು ಆಕೆ ನೆರೆಕರೆಯ ವ್ಯಕ್ತಿಗಳೆಂದು ಗುರುತಿಸಿರುವುದಾಗಿ ಕೇಸು ದಾಖಲಿಸಿಕೊಂಡು ತನಿಖೆ ನಡೆಸುತ್ತಿರುವ ಪೊಲೀಸರು ತಿಳಿಸಿದ್ದಾರೆ. 

ಪೊಲೀಸರೀಗ ಅಪಹೃತ ಬಾಲಕಿ ಮತ್ತು ಆಕೆಯ ಅಪಹರಣಕಾರರಿಗಾಗಿ ವ್ಯಾಪಕ ಶೋಧ ಕಾರ್ಯ ನಡೆಸುತ್ತಿದ್ದಾರೆ.