ಬಾಕ್ಸಿಂಗ್ ಡೇ ಕದನ ಗೆದ್ದ ಭಾರತ

ಮೆಲ್ಬೋರ್ನ್: ಆತಿಥೇಯ ಆಸ್ಟ್ರೇಲಿಯಾ ವಿರುದ್ದದ ಮೂರನೇ ಟೆಸ್ಟ್ ಪಂದ್ಯವನ್ನು ಭಾರತ 137 ರನ್ ಗಾಲ ಅಂತರದಿಂದ ಗೆದ್ದು ಇದೇ ಮೊದಲ ಬಾರಿಗೆ ಬಾಕ್ಸಿಂಗ್ ಡೇ ಪಂದ್ಯ ಗೆದ್ದ ಐತಿಹಾಸಿಕ ಸಾಧನೆ ಮಾಡಿದೆ. ಈ ಮೂಲಕ ಭಾರತ ಬಾರ್ಡರ್ – ಗಾವಸ್ಕರ್ ಸರಣಿಯಲ್ಲಿ 2-1 ಅಂತರದಿಂದ ಮುನ್ನಡೆ ಸಾಧಿಸಿದೆ. 

ನಾಲ್ಕನೇ ದಿನದಾಟದ ಅಂತ್ಯಕ್ಕೆ 8 ವಿಕೆಟ್ ಕಳೆದುಕೊಂಡು 258 ರನ್ ಮಾಡಿದ್ದ ಆಸ್ಟ್ರೇಲಿಯಾ ರವಿವಾರದ ಆಟದಲ್ಲಿ  ಕೇವಲ 3  ರನ್ ಸೇರಿಸಿ ಸೋಲೊಪ್ಪಿಕೊಂಡಿತು. ದಿನದಾಟದ ಆರಂಭದಲ್ಲಿ ಕಾಣಿಸಿಕೊಂಡ ಮಳೆ ಭಾರತದ ಗೆಲುವಿಗೆ ಅಡ್ಡಲಾಗಿತ್ತು. ಆದರೆ ಭೋಜನ ಸಮಯದ ನಂತರ ನಿಂತ ಮಳೆಯಿಂದಾಗಿ ಮತ್ತೆ ಆರಂಭವಾದ ಆಟದಲ್ಲಿ ಭಾರತ ಕೇವಲ 4.3 ಓವರ್ ನಲ್ಲಿ ಆಸೀಸ್ ನ ಕೊನೆಯ ಎರಡು ವಿಕೆಟ್ ಪಡೆದು ಮೆಲ್ಬೋರ್ನ್ ಅಂಗಳದಲ್ಲಿ ವಿಜಯ ಪತಾಕೆ ಹರಿಸಿತು. 

ಪಂದ್ಯದಲ್ಲಿ ಒಟ್ಟು 9 ವಿಕೆಟ್ ಪಡೆದು ಭಾರತದ ಗೆಲುವಿಗೆ ಕಾರಣರಾದ ಜಸ್ಪ್ರೀತ್ ಬುಮ್ರಾಹ್ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜರಾದರು.

ಸಂಕ್ಷಿಪ್ತ ಸ್ಕೊರ್ : ಭಾರತ ಪ್ರಥಮ ಇನ್ನಿಂಗ್ಸ್; 7 ವಿಕೆಟ್ ಗೆ 443 ಡಿಕ್ಲೇರ್ 
ಆಸ್ಟ್ರೇಲಿಯಾ ಪ್ರಥಮ ಇನ್ನಿಂಗ್ಸ್ : 151
ಭಾರತ ದ್ವಿತೀಯ ಇನ್ನಿಂಗ್ಸ್: 8 ವಿಕೆಟ್ ಗೆ 106 ಡಿಕ್ಲೇರ್ 
ಆಸ್ಟ್ರೇಲಿಯಾ ದ್ವಿತೀಯ ಇನ್ನಿಂಗ್ಸ್; 261  

ಎಕ್ಸ್ಟ್ರಾ ಇನ್ನಿಂಗ್ಸ್
*ವಿರಾಟ್ ಕೊಹ್ಲಿ ವಿದೇಶಿ ನೆಲದಲ್ಲಿ ಅತೀ ಹೆಚ್ಚು ಟೆಸ್ಟ್ ಗೆಲುವು ಕಂಡ ಭಾರತೀಯ ನಾಯಕನೆಂಬ ಗಂಗೂಲಿ ದಾಖಲೆ ಸರಿದೂಗಿಸಿದರು . ಕೊಹ್ಲಿ ಒಟ್ಟು 24 ಪಂದ್ಯಗಳಿಂದ 11 ಗೆಲುವು. ಗಂಗೂಲಿ 28 ಪಂದ್ಯಗಳಿಂದ 11 ಗೆಲುವು. 
*  ಈ ಕ್ಯಾಲೆಂಡರ್ ವರ್ಷದಲ್ಲಿ ಭಾರತ ಅತೀ ಹೆಚ್ಚು ಅಂದರೆ 4 ವಿದೇಶಿ ಗೆಲುವು ಕಂಡಿತು. ( ಜೋಹಾನ್ಸ್ ಬರ್ಗ್, ಟ್ರೆಂಟ್ ಬ್ರಿಜ್, ಅಡಿಲೇಡ್, ಮೆಲ್ಬೋರ್ನ್ ) ಈ ಹಿಂದೆ 1968ರಲ್ಲಿ ಭಾರತ 3 ವಿದೇಶಿ ಗೆಲುವು ದಾಖಲಿಸಿತ್ತು. 
* ನಾಯಕ ಕೊಹ್ಲಿಯ ‘ ಟಾಸ್ ವಿನ್ ಮ್ಯಾಚ್ ವಿನ್ ‘ ಮತ್ತೆ ಮುಂದುವರಿಯಿತು. ಕೊಹ್ಲಿ ನಾಯಕನಾಗಿ ಒಟ್ಟು21 ಪಂದ್ಯಗಳಲ್ಲಿ ಟಾಸ್ ಗೆದ್ದಿದ್ದು 18 ಪಂದ್ಯಗಳಲ್ಲಿ ಜಯ ಸಾಧಿಸಿದ್ದಾರೆ. 3 ಪಂದ್ಯಗಳು ಡ್ರಾನಲ್ಲಿ ಅಂತ್ಯವಾಗಿವೆ. ವಿದೇಶದಲ್ಲಿ9 ಪಂದ್ಯದಲ್ಲಿ ಟಾಸ್ ಗೆದ್ದಿದ್ದು ಅದರಲ್ಲಿ 8 ರಲ್ಲಿ ಭಾರತ ವಿಜಯಿಯಾಗಿದೆ. ಬಾಂಗ್ಲಾದೇಶ ವಿರುದ್ದದ ಒಂದು ಪಂದ್ಯ ಡ್ರಾ ಆಗಿದೆ. 
* ಜಸ್ಪ್ರೀತ್ ಬುಮ್ರಾಹ್ ಪಾದಾರ್ಪಣೆ ಮಾಡಿದ ವರ್ಷದಲ್ಲಿ ಅತೀ ಹೆಚ್ಚು ವಿಕೆಟ್ ಪಡೆದ ಭಾರತೀಯ ದಾಖಲೆ ಬರೆದರು. (48 ವಿಕೆಟ್ ) ಬುಮ್ರಾಹ್ ಇದುವರೆಗೆ ಭಾರತದ  ನೆಲದಲ್ಲಿ ಒಂದೂ ಟೆಸ್ಟ್ ಪಂದ್ಯ ಆಡಿಲ್ಲ ಎನ್ನುವುದನ್ನು ಗಮನಿಸಬೇಕು.  
* ಬುಮ್ರಾಹ್ ಆಸ್ಟ್ರೇಲಿಯಾದಲ್ಲಿ ಒಂದು ಪಂದ್ಯದಲ್ಲಿ ಅತಿ ಹೆಚ್ಚು ವಿಕೆಟ್ ಪಡೆದ ಭಾರತದ ವೇಗದ ಬೌಲರ್ ಆಗಿ ಮೂಡಿಬಂದರು. ( 9) ಈ ಹಿಂದೆ ಕಪಿಲ್ ದೇವ್ ಮತ್ತು ಅಜಿತ್ ಅಗರ್ಕರ್ ತಲಾ 8 ವಿಕೆಟ್ ಪಡೆದ ಸಾಧನೆ ಮಾಡಿದ್ದರು. 
* ರಿಷಭ್ ಪಂಥ್ ಪಾದಾರ್ಪಣೆ ವರ್ಷದಲ್ಲಿ ವಿಕೆಟ್ ಹಿಂದೆ  ಅತೀ  ಹೆಚ್ಚು ಬಳಿ ಪಡೆದ ಬ್ರಾಡ್ ಹ್ಯಾಡಿನ್ ದಾಖಲೆಯನ್ನು ಸರಿದೂಗಿಸಿದರು ( 42)
*ಇಶಾಂತ್ ಶರ್ಮ ಟೆಸ್ಟ್ ಕ್ರಿಕೆಟ್ ನಲ್ಲಿ ಅತಿ ಹೆಚ್ಚು ವಿಕೆಟ್ ಪಡೆದ 6ನೇ ಬೌಲರ್ ಎಂದೆನಿಸಿದರು( 267) ಇಶಾಂತ್  ಆಸ್ಟ್ರೇಲಿಯಾ ನಾಥನ್ ಲಿಯೋನ್ ವಿಕೆಟ್ ಪಡೆಯುದರೊಂದಿಗೆ ಬಿಷನ್ ಸಿಂಗ್ ಬೇಡಿಯವರ ದಾಖಲೆ ಮುರಿದರು. (ಬೇಡಿ 266)