ಒಬ್ಬ ನಿರ್ದೇಶಕನಿಗೆ ಒಂದು ಸಿನಿಮಾ ಸಿಗೋದು ಕಷ್ಟ. ಹೀಗಿರುವಾಗ ಒಬ್ಬನೇ ನಿರ್ಮಾಪಕ, ನಿರ್ದೇಶಕನೊಬ್ಬನಿಗೆ ಬರೋಬ್ಬರಿ ಐದು ಸಿನಿಮಾಗಳನ್ನು ಕೊಟ್ಟರೆ!
ಖಂಡಿತಾ ನಂಬೋದು ಕಷ್ಟ ಆಗುತ್ತೆ ಅಲ್ವಾ? ನಂಬಲೇಬೇಕು. ಈಗಾಗಲೇ ಮೂರು ಸಿನಿಮಾಗಳನ್ನು ಆ ನಿರ್ದೇಶಕನ ಕೈಗಿಟ್ಟ ನಿರ್ಮಾಪಕ, ಮುಂದಿನ ದಿನಗಳಲ್ಲಿ ಮತ್ತೆರಡು ಸಿನಿಮಾಗಳನ್ನು ಕೊಡುವುದಾಗಿ ಹೇಳಿದ್ದಾರೆ. ಹೀಗೆ ಹೇಳಿದ ನಿರ್ಮಾಪಕ ದತ್ತಾತ್ರೇಯ ಬಚ್ಚೇಗೌಡ. ಭರ್ಜರಿ ಅವಕಾಶ ಪಡೆದುಕೊಂಡ ನಿರ್ದೇಶಕ ಮುಸ್ಸಂಜೆ ಮಹೇಶ್‌.
ಹೌದು, ಈಗಾಗಲೇ ಮಹೇಶ್‌ ನಿರ್ದೇಶನದಲ್ಲಿ “ಜಿಂದಾ’ ಎಂಬ ಚಿತ್ರ ತಯಾರಾಗಿದೆ. ಈ ಚಿತ್ರವನ್ನು ನಿರ್ಮಿಸುತ್ತಿರುವವರು ದತ್ತಾತ್ರೇಯ ಬಚ್ಚೇಗೌಡ. ಇತ್ತೀಚೆಗೆ ಒಂದೇ ದಿನ ಕಂಠೀರವ ಸ್ಟುಡಿಯೋದಲ್ಲಿ ಎರಡು ಚಿತ್ರಗಳಿಗೆ ಅದ್ಧೂರಿಯಾಗಿ ಮುಹೂರ್ತವಾಗಿದೆ. ಪ್ರೊಡಕ್ಷನ್‌ ನಂ 6 ಮತ್ತು 7 ಹೆಸರಿನಡಿ ಮುಹೂರ್ತವಾದ ಈ ಚಿತ್ರಗಳನ್ನು ಬಚ್ಚೇಗೌಡ ನಿರ್ಮಿಸಿದರೆ, ಮಹೇಶ್‌ ನಿರ್ದೇಶಿಸುತ್ತಿದ್ದಾರೆ. ಸಹಜವಾಗಿಯೇ ಮಹೇಶ್‌ ಖುಷಿಯಾಗಿದ್ದಾರೆ. “ಒಬ್ಬ ನಿರ್ಮಾಪಕ ಒಂದು ಸಿನಿಮಾ ರಿಲೀಸ್‌ ಮಾಡುವ ಹೊತ್ತಿಗೆ ಆ ತಂಡದ ಸಂಬಂಧ ಕಳೆದುಕೊಂಡಿರುತ್ತಾನೆ.
ಆದರೆ, ದತ್ತಾತ್ರೇಯ ಅವರು “ಜಿಂದಾ’ ರಿಲೀಸ್‌ಗೆ ಮುನ್ನವೇ, ನನಗೆ ಎರಡು ಸಿನಿಮಾ ನಿರ್ದೇಶಿಸುವ ಅವಕಾಶ ಕೊಟ್ಟಿದ್ದಾರೆ. ಮೊದಲ ಸಿನಿಮಾ ರಿಲೀಸ್‌ ಆಗದೆಯೇ ಎರಡು ಸಿನಿಮಾ ಕೊಟ್ಟಿದ್ದೀರಲ್ಲ ಅಂದಿದ್ದಕ್ಕೆ, ಆ ಬಗ್ಗೆ ತಲೆಕೆಡಿಸಿಕೊಳ್ಳಬೇಡಿ ಒಳ್ಳೇ ಸಿನಿಮಾ ಮಾಡಿ ಎಂದಷ್ಟೇ ಹೇಳಿದ್ದಾರೆ’ ಎನ್ನುತ್ತಾರೆ. ಅದಕ್ಕೆ ಪ್ರತಿಯಾಗಿ ನಿರ್ಮಾಪಕ ಬಚ್ಚೇಗೌಡ ಮತ್ತೆರಡು ಸಿನಿಮಾಗಳ ಆಫ‌ರ್‌ ನೀಡಿದ್ದಾರೆ. “ಮಹೇಶ್‌ ಅವರನ್ನು ಸದ್ಯಕ್ಕೆ ಬಿಡುವುದಿಲ್ಲ.
ಈ ಎರಡು ಸಿನಿಮಾಗಳು ಮುಗಿಯುತ್ತಿದ್ದಂತೆ ಅವರೊಂದಿಗೆ ಪ್ರೊಡಕ್ಷನ್‌ ನಂ. 8 ಮತ್ತು 9 ಸಿನಿಮಾ ಮಾಡುತ್ತೇನೆ’ ಎಂದು ಘೋಷಿಸಿದರು ದತ್ತಾತ್ರೇಯ. ಇತ್ತೀಚೆಗೆ ಮುಹೂರ್ತವಾದ ಪ್ರೊಡಕ್ಷನ್‌ ನಂ 6 ಮತ್ತು 7 ಚಿತ್ರಗಳಲ್ಲಿ ಆದಿತ್ಯ ನಾಯಕರಾಗಿ ನಟಿಸುತ್ತಿದ್ದು, ಪ್ರೊಡಕ್ಷನ್‌ ನಂ 6ರಲ್ಲಿ ರಾಗಿಣಿ ನಾಯಕಿ. ಶ್ರಾವ್ಯಾ ಕೂಡಾ ಪಾತ್ರವೊಂದರಲ್ಲಿ ಕಾಣಿಸುತ್ತಿದ್ದಾರೆ. ಉಳಿದಂತೆ ಹಿರಿಯ ನಟರಾದ ಶ್ರೀನಿವಾಸ ಮೂರ್ತಿ, ಸುಂದರರಾಜ್‌ ಸೇರಿದಂತೆ ಅನೇಕರು ನಟಿಸುತ್ತಿದ್ದಾರೆ.
