ಹೈದರಾಬಾದ್: ಕಾಲಿವುಡ್‌ನಲ್ಲಿ
ದಳಪತಿ ವಿಜಯ್ ((Thalapathy Vijay) ಹಾಗೂ ಟಾಲಿವುಡ್‌ನಲ್ಲಿ ಅಲ್ಲು ಅರ್ಜುನ್ (Allu Arjun) ಇಬ್ಬರಿಗೂ ದೊಡ್ಡ ಫ್ಯಾನ್‌ ಫಾಲೋವರ್ಸ್‌ ಗಳಿದ್ದಾರೆ.
ಈ ಸೂಪರ್‌ ಸ್ಟಾರ್‌ಗಳ ಸಿನಿಮಾಗಳು ಬಾಕ್ಸಾಫೀಸ್‌ ನಲ್ಲಿ ಚಿನ್ನದ ಮೊಟ್ಟಯಿಡುವ ಕೋಳಿಯಂತೆ ಆರಾಮವಾಗಿ ಕೋಟಿ ಕೋಟಿ ಗಳಿಸುತ್ತವೆ. ಫ್ಯಾನ್‌ ಫಾಲೋವರ್ಸ ಗಳ ಜತೆ ಇಬ್ಬರ ಮಾರ್ಕೆಟ್‌ ವ್ಯಾಲ್ಯೂ ಅಷ್ಟೇ ದೊಡ್ಡದಾಗಿದೆ.
ಇತ್ತೀಚೆಗಿನ ವರ್ಷದಲ್ಲಿ ಅಲ್ಲು ಅರ್ಜುನ್ – ವಿಜಯ್ ಅವರ ಸಿನಿಮಾಗಳು ಪ್ಯಾನ್‌ ಇಂಡಿಯಾದಲ್ಲಿ ರಿಲೀಸ್ ಆಗಿ ಸದ್ದು ಮಾಡುತ್ತಿವೆ. ಅಲ್ಲು , ವಿಜಯ್ ಅವರ ಸಂಭಾವನೆ ವಿಚಾರ ಸೌತ್‌ ಸಿನಿ ಗಲ್ಲಿಯಲ್ಲಿ ಸದ್ದು ಮಾಡಿದೆ.
ದಳಪತಿ ವಿಜಯ್ 2026ರ ತಮಿಳುನಾಡು ಚುನಾವಣೆಗೆ ಸ್ಪರ್ಧಿಸಲಿದ್ದಾರೆ. ಇದಕ್ಕೂ ಮುನ್ನ ಅವರು ಒಂದು ಸಿನಿಮಾ ಮಾಡಲಿದ್ದಾರೆ. ಈ ಸಿನಿಮಾಕ್ಕೆ ಕನ್ನಡದ ಪ್ರತಿಷ್ಠಿತ ‘ಕೆವಿಎನ್ ಪ್ರೊಡಕ್ಷನ್ಸ್’ (Kvn Productions) ಬಂಡವಾಳ ಹಾಕಲಿದೆ.
ಈ ಸಿನಿಮಾಕ್ಕೆ ʼThalapathy 69’ ಎಂದು ಟೈಟಲ್‌ ಇಡಲಾಗಿದೆ. ಸಿನಿಮಾವನ್ನು ಎಚ್ ವಿನೋದ್ (H. Vinoth) ಅವರು ನಿರ್ದೇಶನ ಮಾಡಲಿದ್ದಾರೆ. ಈ ಸಿನಿಮಾಕ್ಕೆ ವಿಜಯ್ ಬರೋಬ್ಬರಿ 275 ಕೋಟಿ ರೂ. ಸಂಭಾವನೆ ಪಡೆಯಲಿದ್ದಾರೆ ಎನ್ನಲಾಗಿದೆ. ಆ ಮೂಲಕ ಅವರು ಅತೀ ಹೆಚ್ಚು ಸಂಭಾವನೆ ಪಡೆಯುವ ಭಾರತೀಯ ನಟ ಆಗಲಿದ್ದಾರೆ. ಶಾರುಖ್‌ ಖಾನ್‌, ರಜಿನಿಕಾಂತ್‌ ಅವರನ್ನೂ ಮೀರಿಸಲಿದ್ದಾರೆ ಎಂದು ವರದಿಯಾಗಿತ್ತು.
ಈ ನಡುವೆ ಅಲ್ಲು ಅರ್ಜುನ್ ಸಂಭಾವನೆ ವಿಚಾರದಲ್ಲಿ ವಿಜಯ್ ಅವರನ್ನು ಮೀರಿಸಿದ್ದಾರೆ ಎಂದು ʼಟ್ರ್ಯಾಕ್‌ ಟಾಲಿವುಡ್‌ʼ ವರದಿ ತಿಳಿಸಿದೆ.
ʼಪುಷ್ಪ-2ʼಗೆ ಅಲ್ಲು ಅರ್ಜುನ್ ಪಡೆದ ಸಂಭಾವನೆ ಎಷ್ಟು? : ಈ ವರ್ಷದ ಬಹುನಿರೀಕ್ಷಿತ ಪ್ಯಾನ್‌ ಇಂಡಿಯಾ ಸಿನಿಮಾಗಳಲ್ಲಿ ಒಂದಾಗಿರುವ ʼಪುಷ್ಪ-2ʼ ಸಿನಿಮಾ ರಿಲೀಸ್‌ಗೆ ಸಿದ್ದವಾಗಿದೆ. ಮೊದಲ ಭಾಗಕ್ಕೆ ಸಿಕ್ಕ ದೊಡ್ಡ ಗೆಲುವು ಎರಡನೇ ಭಾಗದ ಮೇಲಿನ ನಿರೀಕ್ಷೆಯನ್ನು ದುಪ್ಪಟ್ಟು ಮಾಡಿದೆ.
ʼಪುಷ್ಪರಾಜ್‌ʼ ಪಾತ್ರಕ್ಕಾಗಿ ಅಲ್ಲು ಅರ್ಜುನ್ ಬರೋಬ್ಬರಿ 300 ಕೋಟಿ ರೂ. ಸಂಭಾವನೆ ಪಡೆಯಲಿದ್ದಾರೆ ಎಂದು ವರದಿಯಾಗಿದೆ. ಆ ಮೂಲಕ ವಿಜಯ್ ಅವರ ಸಂಭಾವನೆ ದಾಖಲೆಯನ್ನು ಮುರಿಯಲಿದ್ದಾರೆ ಎನ್ನಲಾಗುತ್ತಿದೆ.
ಒಂದು ವೇಳೆ ಅಲ್ಲು ಅರ್ಜುನ್ ಈ ಸಂಭಾವನೆಯನ್ನು ಪಡೆದುಕೊಂಡರೆ ಭಾರತದ ಅತ್ಯಂತ ದುಬಾರಿ ಸಂಭಾವನೆ ಪಡೆಯುವ ನಟನಾಗಲಿದ್ದಾರೆ.
ಯಾವುದಕ್ಕೂ ಚಿತ್ರತಂಡವೇ ಮುಂದಿನ ದಿನಗಳಲ್ಲಿ ಈ ಬಗ್ಗೆ ಅಧಿಕೃತ ಮಾಹಿತಿ ನೀಡಬೇಕಿದೆ.
ಸುಕುಮಾರ್‌ ನಿರ್ದೇಶನದ ʼಪುಷ್ಪ-2ʼ ಇದೇ ಡಿಸೆಂಬರ್‌ 5 ರಂದು ವರ್ಲ್ಡ್‌ ವೈಡ್‌ ರಿಲೀಸ್ ಆಗಲಿದೆ. ಸಿನಿಮಾದಲ್ಲಿ ಅಲ್ಲು ಅರ್ಜುನ್ ಜತೆ ರಶ್ಮಿಕಾ ಮಂದಣ್ಣ, ಫಾಹದ್ ಫಾಸಿಲ್‌ ಮುಂತಾವರು ನಟಿಸಿದ್ದಾರೆ.
