Tamil Nadu; ಸ್ಟಾಲಿನ್‌ ಪುತ್ರ ಉದಯನಿಧಿ ಶೀಘ್ರ ಉಪಮುಖ್ಯಮಂತ್ರಿ?

ಚೆನ್ನೈ: ತಮಿಳುನಾಡಿನ ಡಿಎಂಕೆ ಸರಕಾರವು ಶೀಘ್ರ ದಲ್ಲೇ ಕ್ರೀಡಾ ಸಚಿವ ಉದಯನಿಧಿ ಸ್ಟಾಲಿನ್‌ ಅವರನ್ನು ಉಪ ಮುಖ್ಯಮಂತ್ರಿ ಯಾಗಿ ನೇಮಕಗೊಳಿಸಲಿದೆ ಎಂದು ಮೂಲಗಳು ತಿಳಿಸಿವೆ. 2009ರ ಲೋಕಸಭೆ ಚುನಾವಣೆ ಬಳಿಕ ಇದೇ ರೀತಿ ಉದಯನಿಧಿ ಅವರ ತಂದೆ, ಸಿಎಂ ಎಂ.ಕೆ.ಸ್ಟಾಲಿನ್‌ ಕೂಡ ಆಗಿನ ಉಪ ಮುಖ್ಯಮಂತ್ರಿಯಾಗಿ ನೇಮಕಗೊಂಡಿದ್ದರು. ಇದೀಗ ಉದಯನಿಧಿಗೂ ಅದೇ ಅವಕಾಶ ಸಿಗುವ ಸಾಧ್ಯತೆಗಳಿವೆ ಎನ್ನಲಾಗಿದೆ.

ಈ ಹಿಂದೆಯೂ ಉದಯನಿಧಿಯನ್ನು ಡಿಸಿಎಂ ಮಾಡುವ ಪ್ರಸ್ತಾವಗಳಿದ್ದವು. ಜನವರಿಯಲ್ಲಿ ಸನಾತನ ಧರ್ಮದ ಕುರಿತು ಉದಯನಿಧಿ ನೀಡಿದ್ದ ಹೇಳಿಕೆ ವಿವಾದಕ್ಕೀಡಾದ ಹಿನ್ನೆಲೆಯಲ್ಲಿ ವಿಚಾರ ಕೈಬಿಡಲಾಯಿತು. ಅನಂತರ ಮತ್ತೂಮ್ಮೆ ಅವರನ್ನು ಡಿಸಿಎಂ ಆಗಿಸಲು ಪ್ರಸ್ತಾವಗಳು ಶುರುವಾದವು. ಅಷ್ಟರಲ್ಲೇ ಕಲ್ಲುಕುರಿಚಿ ಅಕ್ರಮ ಮದ್ಯ ದುರಂತದಿಂದಾಗಿ ಸರಕಾರವು ಪ್ರಸ್ತಾವ ಕೈಬಿಟ್ಟಿತು. ಇದೀಗ 3ನೇ ಬಾರಿಗೆ ಸರಕಾರ ಈ ನಿರ್ಣಯ ತೆಗದುಕೊಂಡಿದೆ. ಈಗಾಗಲೇ ಬಹುತೇಕ ಚರ್ಚೆಗಳೂ ಪೂರ್ಣಗೊಂಡಿದ್ದು, ಉದಯನಿಧಿ ಸ್ಟಾಲಿನ್‌ರನ್ನು ತಮಿಳುನಾಡಿನ ಉಪ ಮುಖ್ಯಮಂತ್ರಿಯಾಗಿ ನೇಮಿಸಲು ಸಿದ್ಧತೆಗಳು ನಡೆಯುತ್ತಿವೆ ಎನ್ನಲಾಗಿದೆ.