ಟೋಕಿಯೊ: ಟೇಬಲ್‌ ಟೆನಿಸ್‌ನಲ್ಲಿ ಭಾರತದ ಮಣಿಕಾ ಬಾತ್ರಾ ಗ್ರೇಟ್‌ ಕಮ್‌ಬ್ಯಾಕ್‌

ಟೋಕಿಯೊ: ಟೇಬಲ್‌ ಟೆನಿಸ್‌ನಲ್ಲಿ ಭಾರತದ ಸ್ಟಾರ್‌ ಆಟಗಾರ್ತಿ ಮಣಿಕಾ ಬಾತ್ರಾ ಹಿನ್ನಡೆಯ ಬಳಿಕ ಅಮೋಘ ಚೇತರಿಕೆ ಕಂಡು ಗೆಲುವು ಸಾಧಿಸಿದರೆ, ಜಿ. ಸಥಿಯನ್‌ ಅಮೋಘ ಮುನ್ನಡೆಯ ಹೊರತಾಗಿಯೂ ಸೋಲಿನ ಸುಳಿಗೆ ಸಿಲುಕಿದ್ದಾರೆ.

ದ್ವಿತೀಯ ಸುತ್ತಿನಲ್ಲಿ 32ನೇ ರ್‍ಯಾಂಕಿಂಗ್‌ನ ಉಕ್ರೇನಿಯನ್‌ ಮಾರ್ಗರಿಟಾ ಪೆಸೋಟ್ಸ್‌ಕಾ ವಿರುದ್ಧ ಸೆಣಸುತ್ತಿದ್ದ 62ನೇ ರ್‍ಯಾಂಕಿಂಗ್‌ನ ಮಣಿಕಾ ಬಾತ್ರಾ ಮೊದಲೆರಡು ಗೇಮ್‌ ಕಳೆದುಕೊಂಡ ಬಳಿಕವೂ ನೀಡಿದ ಹೋರಾಟ ಪ್ರಶಂಸೆಗೆ ಪಾತ್ರವಾಯಿತು. 2-2 ಸಮಬಲ ಸಾಧಿಸಿದ ಬಳಿಕ 5ನೇ ಗೇಮ್‌ ಕೂಡ ಕಳಕೊಂಡರು. ಕೊನೆಯ 2 ಗೇಮ್‌ಗಳಲ್ಲಿ ಮತ್ತೆ ತಿರುಗೇಟು ನೀಡಿ 4-3 ಅಂತರದ ರೋಚಕ ಗೆಲುವು ಸಾಧಿಸಿದರು (4-11, 4-11, 11-7, 12-10, 8-11, 11-5, 11-7).

3ನೇ ಸುತ್ತಿನಲ್ಲಿ ಮಣಿಕಾ ಬಾತ್ರಾ ಆಸ್ಟ್ರಿಯಾದ ಸೋಫಿಯಾ ಪೊಲ್ಕನೋವಾ ಅವರನ್ನು ಎದುರಿಸಲಿದ್ದಾರೆ. ಇದು ಕೂಡ ಕಠಿನ ಸವಾಲೇ ಆಗಿದೆ. ಆದರೆ ದ್ವಿತೀಯ ಸುತ್ತಿನ ಗೆಲುವು ತುಂಬಿಸಿರುವ ಆತ್ಮವಿಶ್ವಾಸ ಎನ್ನುವುದು ಮಣಿಕಾಗೆ ಲಾಭ ತರಲಿದೆ ಎಂಬುದು ಎಲ್ಲರ ನಿರೀಕ್ಷೆ.

ಇದನ್ನೂ ಓದಿ :ಟೋಕಿಯೊ ಒಲಿಂಪಿಕ್ಸ್‌ : ಬ್ಯಾಡ್ಮಿಂಟನ್‌ ತಾರೆ ಪಿ.ವಿ.ಸಿಂಧು ಶುಭಾರಂಭ

ಸಥಿಯನ್‌ಗೆ ಸೋಲು
ಜಿ. ಸಥಿಯನ್‌ ಅವರದು ಇದಕ್ಕೆ ವಿರುದ್ಧವಾದ ಫ‌ಲಿ ತಾಂಶವಾಗಿತ್ತು. 38ನೇ ರ್‍ಯಾಂಕಿಂಗ್‌ನ ಅವರು ಹಾಂಕಾಂಗ್‌ನ ಲಾಮ್‌ ವಿರುದ್ಧ 3-0 ಮುನ್ನಡೆ ಹೊಂದಿದ್ದರು. ಆದರೆ ಸತತ 4 ಗೇಮ್‌ಗಳನ್ನು ಕಳೆದುಕೊಂಡು ನಿರಾಸೆ ಮೂಡಿಸಿದರು. ಈ ಪಂದ್ಯವನ್ನು ಅವರು 3-4ರಿಂದ ಕಳೆದುಕೊಂಡರು.