T20 series : ವೇಗಿ ಜೋಶ್‌ ಟಂಗ್‌ ಬದಲು ಜೋರ್ಡನ್‌

ಲಂಡನ್‌: ಗಾಯಾಳಾ ಗಿರುವ ಇಂಗ್ಲೆಂಡ್‌ನ‌ ವೇಗಿ ಜೋಶ್‌ ಟಂಗ್‌ ಪ್ರವಾಸಿ ನ್ಯೂಜಿಲ್ಯಾಂಡ್‌ ಎದುರಿನ ಟಿ20 ಸರಣಿಯಿಂದ ಹೊರಬಿದ್ದಿದ್ದಾರೆ. ಇವರ ಸ್ಥಾನಕ್ಕೆ ಅನುಭವಿ ಕ್ರಿಸ್‌ ಜೋರ್ಡನ್‌ ಅವರನ್ನು ಸೇರಿಸಿಕೊಳ್ಳಲಾಗಿದೆ.

ಜೋಶ್‌ ಟಂಗ್‌ ಇನ್ನೂ ಟಿ20 ಆಡಿಲ್ಲ. ಆದರೆ ಕಳೆದ ಆ್ಯಶಸ್‌ ಸರಣಿಯ ವೇಳೆ ಟೆಸ್ಟ್‌ ಕ್ರಿಕೆಟ್‌ಗೆ ಪದಾರ್ಪಣೆಗೈದು ಪರಿಣಾಮಕಾರಿ ಬೌಲಿಂಗ್‌ ಪ್ರದರ್ಶಿಸಿದ್ದರು. ಲಾರ್ಡ್ಸ್‌ ಟೆಸ್ಟ್‌ ಪಂದ್ಯದಲ್ಲಿ 10 ವಿಕೆಟ್‌ ಉರುಳಿಸಿದ ಸಾಹಸ ಇವರದಾಗಿತ್ತು. ಇವರಂತೆ ಮತ್ತೋರ್ವ “ಅನ್‌ ಕ್ಯಾಪ್ಡ್’ ಬೌಲರ್‌ ಜಾನ್‌ ಟರ್ನರ್‌ ಗಾಯದ ಕಾರಣ ಇಂಗ್ಲೆಂಡ್‌ ತಂಡದಿಂದ ಮೊದಲೇ ಬೇರ್ಪಟ್ಟಿದ್ದರು.

ಜೋಶ್‌ ಯಂಗ್‌ “ದಿ ಹಂಡ್ರೆಡ್‌’ ಟೂರ್ನಿಯ ಅಂತಿಮ ಹಂತದ ಪಂದ್ಯ ಗಳಿಂದಲೂ ಹೊರಗುಳಿಯಲಿದ್ದಾರೆ. ಇಲ್ಲಿ ಅವರು ಮ್ಯಾಂಚೆಸ್ಟರ್‌ ಒರಿಜಿನಲ್ಸ್‌ ತಂಡವನ್ನು ಪ್ರತಿನಿಧಿಸುತ್ತಿದ್ದಾರೆ. ಪ್ರವಾಸಿ ನ್ಯೂಜಿಲ್ಯಾಂಡ್‌ ಎದುರಿನ ಮೊದಲ ಟಿ20 ಪಂದ್ಯ ಆ. 30ರಂದು ಚೆಸ್ಟರ್‌ ಲೆ ಸ್ಟ್ರೀಟ್‌ನ “ರಿವರ್‌ಸೈಡ್‌ ಗ್ರೌಂಡ್‌’ನಲ್ಲಿ ನಡೆಯಲಿದೆ.