T 20 WC; ಸೂಪರ್‌-8 ಗಡಿಯಲ್ಲಿ ಬಾಂಗ್ಲಾ: ನೇಪಾಲ ಕೊನೆಯ ಎದುರಾಳಿ

ಕಿಂಗ್ಸ್‌ಟೌನ್‌: ಟಿ20 ವಿಶ್ವಕಪ್‌ ಪಂದ್ಯಾವಳಿಯ ಸೂಪರ್‌-8 ಹಂತದ ಚಿತ್ರಣ ಒಂದು ಹಂತಕ್ಕೆ ಬಂದಿದೆ. ಆದರೆ “ಡಿ’ ವಿಭಾಗದಿಂದ 2ನೇ ತಂಡ ಯಾರು ಎಂಬುದು ಇನ್ನೂ ಇತ್ಯರ್ಥ ವಾಗಿಲ್ಲ. ಸೋಮವಾರದ ಪಂದ್ಯ ಗಳು ಈ ಕುತೂಹಲವನ್ನು ತಣಿಸಲಿವೆ.

“ಡಿ’ ವಿಭಾಗದಿಂದ ದಕ್ಷಿಣ ಆಫ್ರಿಕಾ ಈಗಾಗಲೇ ತೇರ್ಗಡೆಯಾಗಿದೆ. ನಾಲ್ಕನ್ನೂ ಗೆದ್ದ ಅಜೇಯ ಸಾಧನೆ ಹರಿಣ ಗಳದ್ದು. ಮೂರರಲ್ಲಿ 2 ಪಂದ್ಯ ಗೆದ್ದ ಬಾಂಗ್ಲಾದೇಶ ದ್ವಿತೀಯ ಸ್ಥಾನದಲ್ಲಿದೆ. ಸೋಮವಾರ ಅದು ನೇಪಾಲ ವಿರುದ್ಧ ಅಂತಿಮ ಲೀಗ್‌ ಪಂದ್ಯವಾಡಲಿದ್ದು, ಗೆದ್ದರೆ ದ್ವಿತೀಯ ಸ್ಥಾನದೊಂದಿಗೆ ಸೂಪರ್‌-8 ಹಂತಕ್ಕೆ ಏರಲಿದೆ.
ಒಂದು ಗಂಟೆ ಅಂತರದಲ್ಲಿ ಶ್ರೀಲಂಕಾ- ನೆದರ್ಲೆಂಡ್ಸ್‌ ಕೂಡ ಎದು ರಾಗಲಿವೆ. ಇಲ್ಲಿ ಲಂಕಾ ಹೊರಬಿದ್ದಾ ಗಿದೆ. ನೆದರ್ಲೆಂಡ್ಸ್‌ ಒಂದನ್ನಷ್ಟೇ ಜಯಿ ಸಿದ್ದು, 2 ಅಂಕ ಹೊಂದಿದೆ. ರನ್‌ರೇಟ್‌ ಮೈನಸ್‌ನಲ್ಲಿದೆ (-0.408). ಒಂದು ವೇಳೆ ನೇಪಾಲ ವಿರುದ್ಧ ಬಾಂಗ್ಲಾ ದೊಡ್ಡ ಸೋಲನುಭವಿಸಿದರೆ, ನೆದರ್ಲೆಂಡ್ಸ್‌ ಭಾರೀ ಅಂತರದಿಂದ ಲಂಕಾ ವಿರುದ್ಧ ಜಯ ಸಾಧಿಸಿದರೆ… ಎಂಬೆಲ್ಲ ಲೆಕ್ಕಾ ಚಾರವಿದೆ. ಈ ಪಂದ್ಯಾವಳಿ ಅನೇಕ ಅಚ್ಚರಿ ಹಾಗೂ ಏರುಪೇರಿಗೆ ಸಾಕ್ಷಿ ಯಾಗಿರುವ ಕಾರಣ ಏನೂ ಸಂಭವಿ ಸಬಹುದು ಎನ್ನಲಡ್ಡಿಯಿಲ್ಲ. ಆದರೆ ಈಗಿನ ಲೆಕ್ಕಾಚಾರದಂತೆ ಬಾಂಗ್ಲಾ ಮುನ್ನ ಡೆಯನ್ನು ತಡೆಯುವುದು ಅಸಾಧ್ಯ.

ಶ್ರೀಲಂಕಾ ವಿರುದ್ಧ ಲಭಿಸಿದ 2 ವಿಕೆಟ್‌ ಗೆಲುವಿನಿಂದಾಗಿ ಬಾಂಗ್ಲಾಕ್ಕೆ ಅದೃಷ್ಟ ಕೈಹಿಡಿಯಿತು. ಅನಂತರ ದಕ್ಷಿಣ ಆಫ್ರಿಕಾ ವಿರುದ್ಧ ಎಡವಿದರೆ, ನೆದರ್ಲೆಂಡ್ಸ್‌ಗೆ 25 ರನ್‌ ಸೋಲುಣಿಸಿತು.

ಇತ್ತ ನೇಪಾಲ ಮೂರರಲ್ಲಿ 2 ಸೋಲನುಭವಿಸಿದೆ. ಒಂದು ಪಂದ್ಯ ರದ್ದಾಗಿದೆ. ದಕ್ಷಿಣ ಆಫ್ರಿಕಾ ವಿರುದ್ಧದ ಐತಿಹಾಸಿಕ ಗೆಲುವು ಕೂದಲೆಳೆಯ ಅಂತರದಿಂದ ಕೈತಪ್ಪಿದೆ. ಅಂತರ ಕೇವಲ ಒಂದು ರನ್‌. ಬಾಂಗ್ಲಾವನ್ನು ಮಣಿಸಿದರೆ ಹಿಮಾಲಯದ ತಪ್ಪಲಿನ ದೇಶಕ್ಕೆ ದೊಡ್ಡದೊಂದು ಗೌರವ ಒಲಿಯುವುದರಲ್ಲಿ ಅನುಮಾನವಿಲ್ಲ. ಅದು ಸಣ್ಣ ಗೆಲುವಾದರೂ ಸಾಕು!