ಸಿಡ್ನಿ : ಅಡಿಲೇಡ್ ಸ್ಟ್ರೈಕರ್ಸ್ ವಿರುದ್ಧದ ಪಂದ್ಯದಲ್ಲಿ ಸಿಡ್ನಿ ಥಂಡರ್ ಕೇವಲ 15 ರನ್‌ಗಳಿಗೆ ಔಟಾಯಿತು, ಬಿಬಿಎಲ್ ನಲ್ಲಿ 124 ರನ್‌ಗಳ ಅಂತರದಿಂದ ಸೋತಿತು. ಇದು ತಂಡವೊಂದು ಟಿ 20 ನಲ್ಲಿ ಗಳಿಸಿದ ಅತ್ಯಂತ ಕಡಿಮೆ ಸ್ಕೋರ್ ಆಗಿದೆ.
ಆಘಾತಕಾರಿ ಬ್ಯಾಟಿಂಗ್ ಪ್ರದರ್ಶನದಲ್ಲಿ, ಥಂಡರ್ ವಿಶ್ವದ ಅತ್ಯುತ್ತಮ ಬ್ಯಾಟರ್‌ಗಳನ್ನು ಒಳಗೊಂಡಿದ್ದೂ ಹೀನಾಯ ನಿರ್ವಹಣೆ ನೀಡಿ ಸುದ್ದಿಯಾಗಿದೆ. ಅಲೆಕ್ಸ್ ಹೇಲ್ಸ್, ರಿಲೀ ರೊಸೌವ್ ಅವರು ವಿಶ್ವದ ಕೆಲವು ಅಗ್ರ ಟಿ 20 ತಾರೆಗಲಾಗಿದ್ದು, ಅವರ ಉಪಸ್ಥಿತಿಯ ಹೊರತಾಗಿಯೂ, ತಂಡವು ಕೇವಲ 15 ರನ್‌ಗಳಿಗೆ ಆಲೌಟಾಗಿದೆ.
ಹೆನ್ರಿ ಥಾರ್ಟನ್ ಅವರು ಸ್ಟ್ರೈಕರ್ಸ್ ಪರ ಐದು ವಿಕೆಟ್‌ಗಳನ್ನು ಕಬಳಿಸಿದರು, ವೆಸ್ ಅಗರ್ 4 ವಿಕೆಟ್ ಪಡೆದರೆ, ಮ್ಯಾಥ್ಯೂ ಶಾರ್ಟ್ ಒಂದು ವಿಕೆಟ್ ಪಡೆದರು.
ಥಂಡರ್ ಪರ ಫಝಲ್ಹಕ್ ಫಾರೂಕಿ 3 ವಿಕೆಟ್ ಪಡೆದರು, ಗುರಿಂದರ್ ಸಂಧು, ಡೇನಿಯಲ್ ಸಾಮ್ಸ್ ಮತ್ತು ಬ್ರೆಂಡನ್ ಡೊಗೆಟ್ ತಲಾ 2 ವಿಕೆಟ್ ಪಡೆದರು, ಸ್ಟ್ರೈಕರ್ಸ್ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ನಂತರ 20 ಓವರ್‌ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ 139 ರನ್ ಗಳನ್ನು ಕಲೆ ಹಾಕಿತ್ತು.
ಥಂಡರ್ ಅನಿರೀಕ್ಷಿತ, ಅನಗತ್ಯ ದಾಖಲೆಯನ್ನು ಬರೆದ ನಂತರ, ಸಾಮಾಜಿಕ ಮಾಧ್ಯಮಗಳಲ್ಲಿ ಕ್ರಿಕೆಟ್ ಪ್ರೇಮಿಗಳ ಪ್ರತಿಕ್ರಿಯೆಗಳಿಂದ ತುಂಬಿ ಹೋಗಿದ್ದು, ವ್ಯಾಪಕವಾಗಿ ಟ್ರೋಲ್ ಮಾಡಲಾಗುತ್ತಿದೆ.
