ಶ್ರೀಲಂಕಾ ತಂಡದಲ್ಲಿ ಲಕ್ಮಲ್‌, ಪ್ರದೀಪ್‌

ಕೊಲಂಬೊ: ವೇಗಿಗಳಾದ ನುವಾನ್‌ ಪ್ರದೀಪ್‌ ಮತ್ತು ಸುರಂಗ ಲಕ್ಮಲ್‌ ಶ್ರೀಲಂಕಾ ಟಿ20 ತಂಡಕ್ಕೆ ಮರಳಿದ್ದಾರೆ. ಮಾ. 6ರಿಂದ ಮಾ. 18ರ ತನಕ ಕೊಲಂಬೋದಲ್ಲಿ ನಡೆಯಲಿರುವ ಭಾರತ, ಬಾಂಗ್ಲಾದೇಶ ತಂಡಗಳನ್ನೊಳಗೊಂಡ ತ್ರಿಕೋನ ಸರಣಿಗಾಗಿ ಪ್ರಕಟಿಸಲಾದ ತಂಡದಲ್ಲಿ ಇವರಿಬ್ಬರಿಗೆ ಅವಕಾಶ ನೀಡಲಾಗಿದೆ.

ಆದರೆ ವಿಕೆಟ್‌ ಕೀಪರ್‌-ಬ್ಯಾಟ್ಸ್‌ಮನ್‌ ನಿರೋಷನ್‌ ಡಿಕ್ವೆಲ್ಲ ಅವರನ್ನು ಕೈಬಿಡಲಾಗಿದೆ. ಡಿಕ್ವೆಲ್ಲ ಸ್ಥಾನದಲ್ಲಿ ಧನಂಜಯ ಡಿ ಸಿಲ್ವ ಕಾಣಿಸಿಕೊಂಡಿದ್ದಾರೆ.

ಕಳೆದ ಬಾಂಗ್ಲಾದೇಶ ಸರಣಿಯಲ್ಲಿ ಆಡಿದ್ದ ಲೆಗ್‌ಸ್ಪಿನ್ನರ್‌ ಜೆಫ್ರಿ ವಾಂಡರ್ಸೆ ಕೂಡ ಗೇಟ್‌ಪಾಸ್‌ ಪಡೆದಿದ್ದಾರೆ. ಲಂಕಾ ತಂಡವೀಗ ಕೇವಲ ಇಬ್ಬರು ಸ್ಪೆಷಲಿಸ್ಟ್‌ ಸ್ಪಿನ್ನರ್‌ಗಳನ್ನಷ್ಟೇ ಹೊಂದಿದೆ. ಇವರೆಂದರೆ ಅಖೀಲ ಧನಂಜಯ ಮತ್ತು ಅಮಿಲ ಅಪೊನ್ಸೊ. ಲೆಗ್‌ಸ್ಪಿನ್ನಿಂಗ್‌ ಆಲ್‌ರೌಂಡರ್‌ ಜೀವನ್‌ ಮೆಂಡಿಸ್‌ ಕೂಡ ತಂಡದಲ್ಲಿದ್ದಾರೆ.

ಶ್ರೀಲಂಕಾ ತಂಡ: ದಿನೇಶ್‌ ಚಂಡಿಮಾಲ್‌ (ನಾಯಕ), ಉಪುಲ್‌ ತರಂಗ, ದನುಷ್ಕ ಗುಣತಿಲಕ, ಕುಸಲ್‌ ಮೆಂಡಿಸ್‌, ದಸುನ್‌ ಶಣಕ, ಕುಸಲ್‌ ಪೆರೆರ, ತಿಸರ ಪೆರೆರ, ಜೀವನ್‌ ಮೆಂಡಿಸ್‌, ಸುರಂಗ ಲಕ್ಮಲ್‌, ಇಸುರು ಉದಾನ, ಅಖೀಲ ಧನಂಜಯ, ಅಮಿಲ ಅಪೊನ್ಸೊ, ನುವಾನ್‌ ಪ್ರದೀಪ್‌, ದುಷ್ಮಂತ ಚಮೀರ, ಧನಂಜಯ ಡಿ ಸಿಲ್ವ.