T20 match: 108 ರನ್‌ ಗಳಿಸಿಯೂ ಗೆದ್ದ ನ್ಯೂಜಿಲ್ಯಾಂಡ್‌

ಡಂಬುಲ: ಶ್ರೀಲಂಕಾ ವಿರುದ್ಧದ ದ್ವಿತೀಯ ಟಿ20 ಪಂದ್ಯದಲ್ಲಿ ಕೇವಲ 108 ರನ್‌ ಗಳಿಸಿಯೂ ಗೆದ್ದು ಬಂದ ನ್ಯೂಜಿಲ್ಯಾಂಡ್‌, ಸರಣಿಯನ್ನು 1-1 ಸಮಬಲದಲ್ಲಿ ಮುಗಿಸುವಲ್ಲಿ ಯಶಸ್ವಿಯಾಗಿದೆ.

ರವಿವಾರ ರಾತ್ರಿ “ಡಂಬುಲ ಇಂಟರ್‌ನ್ಯಾಶನಲ್‌ ಸ್ಟೇಡಿಯಂ’ನಲ್ಲಿ ಬೌಲರ್‌ಗಳದೇ ಮೇಲುಗೈ ಆಗಿತ್ತು. ನ್ಯೂಜಿಲ್ಯಾಂಡ್‌ 19.3 ಓವರ್‌ಗಳಲ್ಲಿ 108ಕ್ಕೆ ಆಲೌಟಾದರೆ, ಶ್ರೀಲಂಕಾ 19.5 ಓವರ್‌ಗಳಲ್ಲಿ 103ಕ್ಕೆ ಕುಸಿಯಿತು. ನ್ಯೂಜಿಲ್ಯಾಂಡ್‌ 5 ರನ್ನುಗಳ ಅಚ್ಚರಿಯ ಜಯ ಸಾಧಿಸಿತು.

ಅಂತಿಮ ಓವರ್‌ನಲ್ಲಿ ಶ್ರೀಲಂಕಾ ಜಯಕ್ಕೆ 8 ರನ್‌ ಅಗತ್ಯವಿತ್ತು. 3 ವಿಕೆಟ್‌ ಕೈಯಲ್ಲಿತ್ತು. ಆದರೆ ಗ್ಲೆನ್‌ ಫಿಲಿಪ್ಸ್‌ 5 ಎಸೆತಗಳ ಅಂತರದಲ್ಲಿ ಈ ಮೂರೂ ವಿಕೆಟ್‌ ಹಾರಿಸಿ ನ್ಯೂಜಿಲ್ಯಾಂಡ್‌ಗೆ ಗೆಲುವನ್ನು ತಂದಿತ್ತರು. ಫಿಲಿಪ್ಸ್‌ ಸಾಧನೆ 6 ರನ್ನಿಗೆ 3 ವಿಕೆಟ್‌.

ಫ‌ರ್ಗ್ಯುಸನ್‌ ಹ್ಯಾಟ್ರಿಕ್‌
ಲಾಕೀ ಫ‌ರ್ಗ್ಯುಸನ್‌ 7 ರನ್ನಿತ್ತು 3 ವಿಕೆಟ್‌ ಉರುಳಿಸಿದರು. ಇದೊಂದು ಹ್ಯಾಟ್ರಿಕ್‌ ಸಾಧನೆಯಾಗಿತ್ತು. ಪಂದ್ಯದ 6ನೇ ಓವರ್‌ನ ಕೊನೆಯ ಎಸೆತದಲ್ಲಿ ಕುಸಲ್‌ ಪೆರೆರ ಅವರನ್ನು ಔಟ್‌ ಮಾಡಿದ ಫ‌ರ್ಗ್ಯುಸನ್‌, 8ನೇ ಓವರ್‌ನ ಮೊದಲೆರಡು ಎಸೆತಗಳಲ್ಲಿ ಕಮಿಂಡು ಮೆಂಡಿಸ್‌ ಮತ್ತು ಚರಿತ ಅಸಲಂಕ ಅವರ ವಿಕೆಟ್‌ ಹಾರಿಸಿದರು. ಈ ಸಾಧನೆಗಾಗಿ ಅವರಿಗೆ ಪಂದ್ಯಶ್ರೇಷ್ಠ ಪ್ರಶಸ್ತಿ ಒಲಿಯಿತು. ವನಿಂದು ಹಸರಂಗ ಸರಣಿಶ್ರೇಷ್ಠ ಗೌರವಕ್ಕೆ ಪಾತ್ರರಾದರು.

ಸುದ್ದಿಗಳು