ಸುದೀಪ್‌ಗೆ ಪ್ರತಿಷ್ಠಿತ ನಂದಿ ಪ್ರಶಸ್ತಿ

ಅಮರಾವತಿ: “ಅಭಿನಯ ಚಕ್ರವರ್ತಿ’ ಸುದೀಪ್‌ ಅವರು ಆಂಧ್ರಪ್ರದೇಶ ಸರಕಾರದ ಪ್ರತಿಷ್ಠಿತ “ನಂದಿ ಪ್ರಶಸ್ತಿ’ಗೆ ಭಾಜನರಾಗಿದ್ದಾರೆ. “ಈಗ’ ಚಿತ್ರದಲ್ಲಿನ ವಿಲನ್‌ ನಟನೆಗೆ ಈ ಪುರಸ್ಕಾರ ಸಂದಿದ್ದು, 2012- 13ನೇ ಸಾಲಿನ “ಅತ್ಯುತ್ತಮ ಖಳನಟ’ ಗೌರವ ಕಿಚ್ಚನ ಮುಡಿಗೇರಿದೆ.

ಆಂಧ್ರಪ್ರದೇಶ ಮತ್ತು ತೆಲಂಗಾಣ ವಿಭಜನೆಯ ಹಿನ್ನೆಲೆಯಲ್ಲಿ ತಡವಾಗಿ ನಂದಿ ಪ್ರಶಸ್ತಿಯನ್ನು ಪ್ರಕಟಿಸಲಾಗಿದೆ. “ಈಗ’ ಚಿತ್ರಕ್ಕೆ ಅತ್ಯುತ್ತಮ ಚಿತ್ರ, ಅತ್ಯುತ್ತಮ ನಿರ್ದೇಶಕ, ಅತ್ಯುತ್ತಮ ಚಿತ್ರಕಥೆ ಪ್ರಶಸ್ತಿಗಳೂ ಸಂದಿವೆ. ನಾನಿ, ಸಮಂತಾ ನಾಯಕ ಹಾಗೂ ನಾಯಕಿ ಆಗಿ ನಟಿಸಿದ್ದ ಚಿತ್ರದಲ್ಲಿ ಸುದೀಪ್‌ ಖಳನಾಯಕರಾಗಿ ಅತ್ಯುತ್ತಮ ನಟನೆ ತೋರಿದ್ದರು. ನೊಣ ಸೇಡು ತೀರಿಸಿಕೊಳ್ಳುವ ಕತೆಯ “ಈಗ’ ಸುದೀಪ್‌ ಅವರಿಗೆ ಮೊದಲನೇ ತೆಲುಗು ಚಿತ್ರ. ಪ್ರಶಸ್ತಿ ಆಯ್ಕೆ ಸಮಿತಿ ಅಧ್ಯಕ್ಷೆ ಜಯಸುಧಾ ಈ ಗೌರವ ಪಟ್ಟಿಯನ್ನು ಪ್ರಕಟಿಸಿದ್ದಾರೆ.