ಲವ್‌ ಮಾಕ್ಟೇಲ್‌ ಮೊದಲ ಟಿಕೆಟ್‌ಗೆ ಕಿಚ್ಚ ಸ್ಪರ್ಶ

ಮದರಂಗಿ ಕೃಷ್ಣ ಚೊಚ್ಚಲ ಬಾರಿಗೆ ನಿರ್ದೇಶಿಸಿ, ನಾಯಕ ನಟನಾಗಿ ಕಾಣಿಸಿಕೊಂಡಿರುವ “ಲವ್‌ ಮಾಕ್ಟೇಲ್‌’ ಚಿತ್ರದ ಮೊದಲ ಟಿಕೆಟ್‌ ಅನ್ನು ನಟ ಕಿಚ್ಚ ಸುದೀಪ್‌ ಖರೀದಿಸಲಿದ್ದಾರೆ. ಹೌದು, ಆರಂಭದಿಂದಲೂ “ಲವ್‌ ಮಾಕ್ಟೇಲ್‌’ ಚಿತ್ರ ತಂಡಕ್ಕೆ ಸಾಥ್‌ ನೀಡುತ್ತ ಬಂದಿರುವ ಸುದೀಪ್‌, ಚಿತ್ರದ ಟ್ರೇಲರ್‌ಗೂ ತಮ್ಮ ಧ್ವನಿ ನೀಡುವ ಮೂಲಕ ಮದರಂಗಿ ಕೃಷ್ಣ ಆ್ಯಂಡ್‌ ಟೀಮ್‌ಗೆ ಬೆನ್ನುತಟ್ಟಿದ್ದರು. ಇದೀಗ “ಲವ್‌ ಮಾಕ್ಟೇಲ್‌’ ಚಿತ್ರದ ಮೊದಲ ಟಿಕೆಟ್‌ ಅನ್ನು ಕೂಡ ತಾನೇ ಖರೀದಿಸುವುದಾಗಿ ಸುದೀಪ್‌ ಘೋಷಿಸಿದ್ದಾರೆ.

ಸದ್ಯ ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸಗಳನ್ನು ಪೂರ್ಣಗೊಳಿಸಿ, ತೆರೆಗೆ ಬರಲು ತಯಾರಿ ನಡೆಸುತ್ತಿರುವ “ಲವ್‌ ಮಾಕ್ಟೇಲ್‌’ ಚಿತ್ರತಂಡ, ಇತ್ತೀಚೆಗೆ ಚಿತ್ರದ ಆಡಿಯೋವನ್ನು ಅದ್ಧೂರಿಯಾಗಿ ಹೊರತಂದಿದೆ. ಆಡಿಯೋ ಬಿಡುಗಡೆ ಸಮಾರಂಭಕ್ಕೆ ಮುಖ್ಯ ಅತಿಥಿಗಳಾಗಿ ಆಗಮಿಸಿದ್ದ ಕಿಚ್ಚ ಸುದೀಪ್‌ ಹಾಡುಗಳನ್ನು ಬಿಡುಗಡೆಗೊಳಿಸಿ, ಚಿತ್ರದ ಮೊದಲ ಟಿಕೆಟ್‌ ಅನ್ನು ಕೂಡ ತಾನೇ ಖರೀದಿಸುವುದಾಗಿ ಘೋಷಿಸಿದ್ದಾರೆ. “ಕೃಷ್ಣ ನನ್ನ ಸೋದರನಿದ್ದಂತೆ. ಎಲ್ಲದಕ್ಕಿಂತ ಹೆಚ್ಚಾಗಿ ಒಳ್ಳೆಯ ಮನಸ್ಸಿನ ಹುಡುಗ.

ಸಿನಿಮಾದದಲ್ಲಿ ಏನಾದ್ರೂ ಸಾಧಿಸಬೇಕೆಂಬ ಛಲ ಅವರಲ್ಲಿದೆ. ಸಿನಿಮಾದ ಕಡೆಗೆ ಅವರಿಗಿರುವ ಪ್ಯಾಷನ್‌ ನನಗೆ ಇಷ್ಟವಾಯ್ತು. ಒಂದೊಳ್ಳೆಯ ಸಿನಿಮಾ ಮಾಡಿದ್ದಾರೆ ಅನ್ನೋ ನಂಬಿಕೆ ನನಗಿದೆ. ಟ್ರೇಲರ್‌, ಹಾಡುಗಳು ಎಲ್ಲವೂ ಪ್ರಾಮಿಸಿಂಗ್‌ ಆಗಿದೆ’ ಎಂದಿರುವ ಸುದೀಪ್‌, “ಒಂದು ಒಳ್ಳೆಯ ಸಿನಿಮಾ ಮಾಡೋದಷ್ಟೆ ನಮ್ಮ ಕೆಲಸ. ಅದರ ಗೆಲುವು-ಸೋಲು ಯಾವುದು ನಮ್ಮ ಕೈಯಲ್ಲಿ ಇಲ್ಲ. ಜನರಿಗೆ ಇಷ್ಟವಾದ್ರೆ, ಜನ ಇಷ್ಟಪಟ್ಟರೆ ಸಿನಿಮಾ ಖಂಡಿತಯ ಗೆಲ್ಲುತ್ತದೆ. ಇಡೀ ಸಿನಿಮಾ ಟೀಮ್‌ಗೆ ಒಳ್ಳೆಯದಾಗಲಿ’ ಎಂದು “ಲವ್‌ ಮಾಕ್ಟೇಲ್‌’ ಚಿತ್ರತಂಡಕ್ಕೆ ಶುಭ ಕೋರಿದ್ದಾರೆ.