ಸುರಕ್ಷಾ ಕ್ರಮಗಳೊಂದಿಗೆ ಪರೀಕ್ಷೆ ಬರೆದ ವಿದ್ಯಾರ್ಥಿಗಳು

ಕೈರೋ: ಕೋವಿಡ್‌ ಸೋಂಕಿಗೆ ಭಯ ಪಟ್ಟು ಹೆಚ್ಚಿನ ಎಲ್ಲ ದೇಶಗಳು ಶಾಲಾ ಕಾಲೇಜುಗಳನ್ನು ಸ್ಥಗಿತಗೊಳಿಸಿದ್ದವು. ಕೆಲವು ಕಡೆ ಪರೀಕ್ಷೆ ಬರೆಯದೆಯೇ ವಿದ್ಯಾರ್ಥಿಗಳನ್ನು ಉತ್ತೀರ್ಣರನ್ನಾಗಿ ಮಾಡಲಾಗಿತ್ತು. ಈಜಿಪ್ಟ್ನಲ್ಲಿ ಲಾಕ್‌ಡೌನ್‌ ತೆರವು ಬಳಿಕ ಇದೀಗ ಮೊಟಕುಗೊಂಡಿದ್ದ ಪರೀಕ್ಷೆಗಳು ಮತ್ತೆ ಆರಂಭವಾಗಿವೆ.

ಸುಮಾರು 65 ಸಾವಿರ ಈಜಿಪ್ಟ್ ವಿದ್ಯಾರ್ಥಿಗಳು ತಮ್ಮ ಪರೀಕ್ಷೆಗಳನ್ನು ಈ ವಾರಾಂತ್ಯದಲ್ಲಿ ಬರೆದು ಮುಗಿಸಿದ್ದಾರೆ. ಸರಕಾರ ಈ ಬಗ್ಗೆ ಹಲವು ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಂಡು ಪರೀಕ್ಷೆಯನ್ನು ನಡೆಸಿತ್ತು. ಸುಮಾರು 100 ಮಿಲಿಯನ್‌ ವೈಯಕ್ತಿಕ ಸುರಕ್ಷಾ ಕಿಟ್‌ಗಳನ್ನು ಪೂರ್ವ ಯೋಜನೆಯಾಗಿ ವಿತರಿಸಲಾಗಿತ್ತು. ಫೇಸ್‌ ಮಾಸ್ಕ್ ಹಾಗೂ ಗ್ಲೌಸ್‌ ಧರಿಸಿ ವಿದ್ಯಾರ್ಥಿಗಳು ತರಗತಿಗೆ ಹಾಜರಾಗಿದ್ದರು. ಶಾಲೆಗೆ ಪ್ರವೇಶಿಸುವದಕ್ಕೆ ಮೊದಲು ಟೆಂಪರೇಚರ್‌ ಪರೀಕ್ಷೆ ಮಾಡಲಾಗಿತ್ತು. ತರಗತಿಯ ಒಳಗಡೆ ಸಾಮಾಜಿಕ ಅಂತರ ಪಾಲಿಕೆ ಹಾಗೂ ಸ್ಯಾನಿಟೈಸೇಶನ್‌ ಮಾಡಲಾಗಿತ್ತು. ಜಾನ್‌ ಹಾಪಿRನ್ಸ್‌ ಯುನಿವರ್ಸಿಟಿಯ ಮಾಹಿತಿಯ ಪ್ರಕಾರ ಈಜಿಪ್ಟ್ನಲ್ಲಿ 55,233 ಕೋವಿಡ್‌ ಸೋಂಕಿತರಿದ್ದಾರೆ. ಹಾಗೂ 2,193 ಮಂದಿ ಸೋಂಕಿನಿಂದ ಮೃತಪಟ್ಟಿದ್ದಾರೆ.