ಫಿಫಾ ವಿಶ್ವಕಪ್ನ ನಕಲಿ ಪಾರಿತೋಷಕಗಳಲ್ಲಿ ಡ್ರಗ್ಸ್ ತುಂಬಿ ಮಾರಾಟ ಮಾಡಲಾರಂಭಿಸಿದ್ದ ಜಾಲವೊಂದನ್ನು ಆರ್ಜೆಂಟೀನಾದ ಪೊಲೀಸರು ಬಯಲುಗೊಳಿಸಿದ್ದಾರೆ.
Advertisement
ಆರ್ಜೆಂಟೀನಾದ ಭದ್ರತಾ ಸಚಿವ ಕ್ರಿಸ್ಟಿಯನ್ ರಿಟೊಂಡೊ ಈ ವಿಷಯ ಪ್ರಕಟಿಸಿದ್ದು, ಈ ಕಳ್ಳಸಾಗಾಣಿಕೆದಾರರ ತಂಡದ ಇಬ್ಬರು ಮಹಿಳೆಯರು, ನಾಲ್ವರು ಪುರುಷರನ್ನು ಬಂಧಿಸಿದ್ದಾರೆ. ಅವರಲ್ಲಿದ್ದ ಕೆಲವು ಪಾರಿತೋಷಕಗಳಲ್ಲಿ ಅಡಗಿಸಿಟ್ಟಿದ್ದ ಸುಮಾರು 20 ಕೆಜಿ ಗಾಂಜಾ, 1,800 ಕೊಕೇನ್ ಪ್ಯಾಕೆಟ್ಗಳು ಪತ್ತೆಯಾಗಿವೆ. ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಇವುಗಳ ಮೌಲ್ಯ ಸುಮಾರು 10 ಲಕ್ಷ ರೂ.ಗಳಷ್ಟಿದೆ.
ಬ್ಯೂನಸ್ ಐರೆಸ್ನಲ್ಲಿ ಸಿಕ್ಕಿರುವ ಕಳ್ಳರು ನಕಲಿ ಪಾರಿತೋಷಕಗಳಲ್ಲಿ ಕಳ್ಳಸಾಗಣೆ ಮಾಡುವ ದಾರಿ ಹಿಡಿದಿದ್ದರೆ, ಕೊಲಂಬಿಯಾದ ಕಳ್ಳ ಸಾಗಣೆದಾರರು ಅದಕ್ಕಿಂತ ಒಂದು ಹೆಜ್ಜೆ ಮುಂದೆ ಹೋಗಿದ್ದಾರೆ. ಕ್ರಮ ಬದ್ಧ ರಾಸಾಯನಿಕ ವಿಧಾನಗಳಿಂದ ಕರಗಿಸಿದರೆ ಅವು ಕೊಕೇನ್ ಆಗಿ ಪರಿವರ್ತನೆಯಾಗುವಂಥ ಜೆರ್ಸಿಗಳನ್ನು ತಯಾರಿಸಿ ಅವುಗಳನ್ನು ತಲುಪಬೇಕಾದ ಕಡೆ ಕಳಿಸುತ್ತಿದ್ದ ಜಾಲ ವೊಂದನ್ನು ಕೊಲಂಬಿಯಾ ಪೊಲೀಸರು ಭೇದಿಸಿದ್ದಾರೆ. ಈ ತಂಡದಿಂದ 14 ವಿವಿಧ ರಾಷ್ಟ್ರೀಯ ಫುಟ್ಬಾಲ್ ತಂಡಗಳ ಜೆರ್ಸಿಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು “ಗ್ಲೋಬಲ್ ನ್ಯೂಸ್’ ವರದಿ ಮಾಡಿದೆ.