BJP ಸೇರಲು ಒತ್ತಡ ಹೇಳಿಕೆ: ಆತಿಶಿಗೆ ಆಯೋಗ ನೋಟಿಸ್‌

ಹೊಸದಿಲ್ಲಿ: ಪಕ್ಷ ಸೇರ್ಪಡೆಗೆ ತಮ್ಮ ಮೇಲೆ ಬಿಜೆಪಿ ಒತ್ತಡ ಹೇರುತ್ತಿದೆ ಎಂದು ಆರೋಪಿಸಿದ್ದ ಆಪ್‌ ನಾಯಕಿಯೂ ಆಗಿರುವ ದಿಲ್ಲಿ ಶಿಕ್ಷಣ ಸಚಿವೆ ಆತಿಶಿ ಮರ್ಲೆನಾ ಅವರಿಗೆ ಕೇಂದ್ರ ಚುನಾವಣ ಆಯೋಗವು ಕಾರಣ ಕೇಳಿ ನೋಟಿಸ್‌ ಜಾರಿ ಮಾಡಿದೆ. ಆತಿಶಿ ಹೇಳಿಕೆಯ ವಿರುದ್ದ ಬಿಜೆಪಿಯು ಚುನಾವಣ ಆಯೋಗಕ್ಕೆ ದೂರು ನೀಡಿತ್ತು. ಈ ಹಿನ್ನೆಲೆಯಲ್ಲಿ ಆಯೋಗವು ನೋಟಿಸ್‌ ಜಾರಿ ಮಾಡಿ, ಸಾರ್ವಜನಿಕ ವೇದಿಕೆಗಳಲ್ಲಿ ಮಾಡಲಾಗಿರುವ ಆರೋಪಕ್ಕೆ ಸಾಕ್ಷ್ಯ ಒದಗಿಸುವಂತೆ ಸೂಚಿಸಿದೆ. ಹೇಳಿಕೆಗಳು ಪ್ರಚಾರದ ದಿಕ್ಕು ಬದಲಿಸುತ್ತದೆ ಎಂದಿದೆ. ಬಿಜೆಪಿಯ ಅಂಗ ಸಂಸ್ಥೆ ಎಂದ ಆತಿಶಿ: ನೋಟಿಸ್‌ ನೀಡಿದ ಬೆನ್ನಲ್ಲೇ ಚುನಾವಣ ಆಯೋಗವು ಬಿಜೆಪಿಯ ಅಂಗಸಂಸ್ಥೆ ಎಂದು ಆಪ್‌ ನಾಯಕಿ ಆತಿಶಿ ಮರ್ಲೆನಾ ಆರೋಪಿಸಿದ್ದಾರೆ.