ಕಿನ್ನಿಗೋಳಿ ಪಟ್ಟಣ ಪಂಚಾಯತ್‌ ಚರಂಡಿ ಹೂಳೆತ್ತುವಿಕೆ ಆರಂಭ

ಕಿನ್ನಿಗೋಳಿ: ಕೆಲವು ವರ್ಷ ಗಳಿಂಂದ ಕಿನ್ನಿಗೋಳಿ ಬಸ್‌ ನಿಲ್ದಾಣದ ಸುತ್ತಲೂ ಇರುವ ಚರಂಡಿಯಲ್ಲಿ ಹೂಳು ತುಂಬಿರುವುದರಿಂದ ಮಳೆಗಾಲದಲ್ಲಿ ನೀರು ರಸ್ತೆಯಲ್ಲಿ ಹರಿಯುತ್ತಿದ್ದು, ಈ ಬಗ್ಗೆ ಪ.ಪಂ. ಎಚ್ಚೆತ್ತು ಕಾಮಗಾರಿ ಆರಂಭಗೊಂಡಿದೆ. ಬಸ್‌ ನಿಲ್ದಾಣದ ಸೋಜಾ ಫರ್ನಿಚರ್‌ ಬಳಿಯಿಂದ ಕಾಮಗಾರಿ ಆರಂಭಗೊಂಡಿದ್ದು, ಬಸ್‌ ನಿಲ್ದಾಣದ ಸುತ್ತ ಚರಂಡಿಯ ಹೂಳು ತೆಗದೆ ನೀರು ಸರಾಗವಾಗಿ ಹರಿಯಬಹುದು ಎಂಬುದು ಸ್ಥಳೀಯರ ಅಭಿಪ್ರಾಯ.

ಚರಂಡಿಯಲ್ಲಿ ಕುಡಿಯುವ ನೀರಿನ ಎರಡು ಪೈಪ್‌ಗಳನ್ನು ಹಾಕಿರುವುದು ಚರಂಡಿ ಹೂಳು ತೆಗೆಯಲು ತೊಡಕು ಉಂಟಾಗಿದೆ. ಚರಂಡಿಗೆ ಕಾಂಕ್ರೀಟ್‌ ಚಪ್ಪಡಿ ಕಲ್ಲು ಹಾಸಿರುವುದರಿಂದ ಕೆಲವು ಚಪ್ಪಡಿ ಕಾಂಕ್ರೀಟ್‌ ಕಲ್ಲುಗಳು ಒಡೆದು ಹೋಗಿದ್ದು ಅಪಾಯಕಾರಿಯಾಗಿ ಪಾದಚಾರಿಗಳಿಗೆ ನಡೆದಾಡಲು ಕಷ್ಟಕರವಾಗಿದೆ.

ಸಹಕಾರ ಅಗತ್ಯ

ಕೆಲವು ವರ್ಷಗಳಿಂದ ಸಮರ್ಪಕವಾದ ರೀತಿಯಲ್ಲಿ ಬಸ್‌ ನಿಲ್ದಾಣದ ಬದಿಯ ಚರಂಡಿಯಲ್ಲಿ ಹೂಳು ತೆಗೆಯದೆ ಇರುವುದರಿಂದ ಕೆಲವೊಂದು ಕಡೆಗಳಲ್ಲಿ ಮಳೆ ನೀರು ರಸ್ತೆಯಲ್ಲಿ ಹರಿದು ಹೋಗುತ್ತಿದೆ. ಮೊದಲ ಹಂತದಲ್ಲಿ ಹೂಳು ತೆಗೆದು ಬಸ್‌ ನಿಲ್ದಾಣ ಭಾಗದಲ್ಲಿ ನೀರು ರಸ್ತೆಯಲ್ಲಿ ಹರಿಯದಂತೆ ವ್ಯವಸ್ಥೆ ಮಾಡಬೇಕಾಗಿದೆ. ಬಳಿಕ ಹಳೆಯ ಕಾಂಕ್ರೀಟ್‌ ಕಲ್ಲು ಚಪ್ಪಡಿಯನ್ನು ಬದಲಾಯಿಸಲಾಗುವುದು ಇದಕ್ಕೆ ಇಲ್ಲಿನ ಅಂಗಡಿ ಹಾಗೂ ಸಾರ್ವಜನಿಕರ ಸಹಕಾರ ಅಗತ್ಯವಿದೆ. -ಸಾಯೀಶ್‌ ಚೌಟ, ಮುಖ್ಯಾಧಿಕಾರಿ ಕಿನ್ನಿಗೋಳಿ ಪಟ್ಟಣ ಪಂಚಾಯತ್‌