ಬತ್ತಿದ ಬೋರ್‌ವೆಲ್‌ನಲ್ಲಿ ಉಕ್ಕಿದ ನೀರು!

ಉಡುಪಿ: ನೀರಿಲ್ಲವೆಂದು 10 ವರ್ಷಗಳ ಹಿಂದೆ ಮುಚ್ಚಿದ ಬೋರ್‌ವೆಲ್‌ನಲ್ಲಿ ಅಚ್ಚರಿ ಎಂಬಂತೆ ಕಳೆದ ಮೂರು ದಿನಗಳಿಂದ ನೀರು ಹೊರಬರಲಾರಂಭಿಸಿದೆ.

ಅಲೆವೂರಿನ ಪ್ರಗತಿನಗರದಲ್ಲಿ ಈ ಘಟನೆ ಸಂಭವಿಸಿದೆ. ದಿನದಿಂದ ದಿನಕ್ಕೆ ನೀರಿನ ಒರತೆ ಹೆಚ್ಚುತ್ತಿದ್ದು, ಸ್ಥಳೀಯರಲ್ಲಿ ಕುತೂಹಲ ಮೂಡಿಸಿದೆ. ಈ ಬಗ್ಗೆ ಉದಯವಾಣಿಗೆ ಪ್ರತಿಕ್ರಿಯಿಸಿದ ಅಲೆವೂರು ಗ್ರಾ.ಪಂ. ಅಧ್ಯಕ್ಷ ಶ್ರೀಕಾಂತ್‌ ನಾಯಕ್‌ ಕಳೆದ 15 ವರ್ಷಗಳ ಹಿಂದೆ ಈ ಕೊಳವೆಬಾವಿ ತೋಡಿದ್ದು, ನೀರಿನ ಮಟ್ಟ ಕಡಿಮೆ ಇತ್ತು. 10 ವರ್ಷಗಳ ಹಿಂದೆ ಪಂಪ್‌ ಅಳವಡಿಸುವಾಗ ಸಮಸ್ಯೆ ಉಂಟಾಗಿತ್ತು. ಆ ಬಳಿಕ ಇದರಿಂದ ನೀರು ತೆಗೆಯುವುದನ್ನು ನಿಲ್ಲಿಸಿ ಮುಚ್ಚಲಾಗಿತ್ತು. ಇದು ಇಳಿಜಾರು ಪ್ರದೇಶವಾಗಿದ್ದರಿಂದ ಮಳೆ ನೀರೆಲ್ಲ ಇದಕ್ಕೆ ಹರಿದು ಬಿಡಲಾಗಿತ್ತು.

ಅದರಿಂದ ನೀರು ಮೇಲೆ ಬಂದಿರುವ ಸಾಧ್ಯತೆ ಇದೆ. ಆದರೆ ಈ ಬಿರುಬೇಸಗೆಯಲ್ಲಿ ಇಷ್ಟು ದಿನ ಇಲ್ಲದ ನೀರು ಕಾಣಿಸಿಕೊಂಡಿರುವುದು ಅಚ್ಚರಿ ಮೂಡಿಸಿದೆ.