ಗೂಗಲ್‌ ಪೇ, ಪೋನ್‌ ಪೇ ಇಲ್ಲ ಎಂದ ಮದ್ಯದ ಅಂಗಡಿ ಕ್ಯಾಶಿಯರ್‌ ಗೆ ಚಾಕು ಇರಿದ ದುಷ್ಕರ್ಮಿಗಳು

ಬೆಂಗಳೂರು: ಮದ್ಯ ಖರೀದಿ ಬಳಿಕ ಹಣ ಪಾವತಿಗೆ ಗೂಗಲ್‌ ಪೇ, ಫೋನ್‌ ಪೇ ವ್ಯಾಲೆಟ್‌ ಇಲ್ಲ ಎಂಬ ವಿಚಾರಕ್ಕೆ ಜಗಳ ತೆಗೆದ ನಾಲ್ವರು ದುಷ್ಕರ್ಮಿಗಳು ಬಾರ್‌ ಸಿಬ್ಬಂದಿ ಮೇಲೆ ಹಲ್ಲೆ ನಡೆಸಿ ಚಾಕುವಿನಿಂದ ಇರಿದು ಪರಾರಿಯಾಗಿದ್ದಾರೆ.

ಡಿ.28ರಂದು ರಾತ್ರಿ ನಾಯಪ್ಪನಹಳ್ಳಿಯಲ್ಲಿರುವ ಎಸ್‌ಎಲ್‌ಆರ್‌ ಸ್ಪಿರಿಟ್‌ ಹೆಸರಿನ ಎಂಆರ್‌ಪಿ ಬಾರ್‌ನಲ್ಲಿ ಘಟನೆ ನಡೆದಿದೆ. ಈ ಕುರಿತು ಹಲ್ಲೆಗೊಳಗಾಗಿರುವ ಕಾಂತರಾಜು ಬಿ.ಕೆ ಎಂಬುವವರು ಹುಳಿಮಾವು ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಿಸಿದ್ದು, ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ಹಲವು ಮಂದಿ ದುಷ್ಕರ್ಮಿಗಳನ್ನು ವಶಕ್ಕೆ ಪಡೆದು ತನಿಖೆ ಮುಂದುವರಿಸಿದ್ದಾರೆ.

ಡಿ.28ರಂದು ರಾತ್ರಿ 10 .30ರ ಸುಮಾರಿಗೆ ಮದ್ಯ ಖರೀದಿ ಮಾಡಲು ಬಂದಿದ್ದ ಇಬ್ಬರು ಗ್ರಾಹಕರು ಖರೀದಿ ಬಳಿಕ ಗೂಗಲ್‌ ಪೇ, ಫೋನ್‌ ಪೇ ಮೂಲಕ ಹಣ ಪಾವತಿಸುವುದಾಗಿ ಹೇಳಿದ್ದಾರೆ. ವ್ಯಾಲೆಟ್‌ಗಳ ಬಳಕೆಯಿಲ್ಲ ಕಾರ್ಡ್‌ ಇಲ್ಲವೇ ಕ್ಯಾಶ್‌ ನೀಡಿ ಎಂದು ಬಾರ್‌ ಸಿಬ್ಬಂದಿ ಹೇಳಿದ್ದಾರೆ.

ಇದೇ ವಿಚಾರಕ್ಕೆ ಗಲಾಟೆ ನಡೆದು ಅವರಿಬ್ಬರ ಜತೆ ಮತ್ತಿಬ್ಬರು ಸ್ನೇಹಿತರು ಸೇರಿಕೊಂಡು, ಬಾರ್‌ ಸಿಬ್ಬಂದಿ ಕಾಂತರಾಜು, ರಾಜಶೇಖರ್‌, ಕಾಂತರಾಜು ಮೇಲೆ ಹಲ್ಲೆ ನಡೆಸಿ ಚಾಕುವಿನಿಂದ ಬೆನ್ನಿಗೆ ಇರಿದಿದ್ದು, ಮದ್ಯದ ಬಾಟಲಿಗಳನ್ನು ಹೊಡೆದು ಹಾಕಿ ಪರಾರಿಯಾಗಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.