ಗರಡಿ ಮನೆಯಲ್ಲಿ ಹೊಸ ಬದಲಾವಣೆ: ರಚಿತಾ ರಾಮ್‌ ಜಾಗಕ್ಕೆ ಸೋನಾಲ್‌ ಎಂಟ್ರಿ

ಯೋಗರಾಜ್‌ ಭಟ್‌ ನಿರ್ದೇಶನದಲ್ಲಿ “ಗರಡಿ’ ಚಿತ್ರ ಆರಂಭವಾಗಿದ್ದು ನಿಮಗೆ ಗೊತ್ತಿರಬಹುದು. ನಟ ಮತ್ತು ಸಚಿವ ಬಿ. ಸಿ ಪಾಟೀಲ್‌ ನಿರ್ಮಾಣದಲ್ಲಿ ಮೂಡಿಬರುತ್ತಿರುವ “ಗರಡಿ’ ಚಿತ್ರದಲ್ಲಿ ಯಶಸ್‌ ಸೂರ್ಯ ನಾಯಕನಾಗಿ ಅಭಿನಯಿಸುತ್ತಿದ್ದು, ನಾಯಕಿಯಾಗಿ ರಚಿತಾ ರಾಮ್‌ ಅವರನ್ನು ಚಿತ್ರತಂಡ ಆಯ್ಕೆ ಮಾಡಿತ್ತು.

ಚಿತ್ರತಂಡ ಕೂಡ ರಚಿತಾ ರಾಮ್‌ ಅವರ ಆಯ್ಕೆಯನ್ನು ಅಧಿಕೃತವಾಗಿ ಘೋಷಿಸಿತ್ತು. ಇನ್ನೇನು “ಗರಡಿ’ ಚಿತ್ರದ ಶೂಟಿಂಗ್‌ಗೆ ಹೊರಡಬೇಕು ಎನ್ನುವಷ್ಟರಲ್ಲಿ, “ಗರಡಿ’ ಮನೆಯಲ್ಲಿ ಮಹತ್ವದ ಬದಲಾವಣೆಯಾಗಿದೆ.

ಹೌದು, ಚಿತ್ರದಲ್ಲಿ ನಾಯಕಿಯಾಗಿ ರಚಿತಾ ರಾಮ್‌ ಅವರ ಜಾಗಕ್ಕೆ ಸೋನಾಲ್‌ ಮಾಂತೇರೊ ಅವರನ್ನು ಕರೆತಂದಿದೆ ಚಿತ್ರತಂಡ. ಸದ್ಯ ರಚಿತಾ ರಾಮ್‌ ಬ್ಯಾಕ್‌ ಟು ಬ್ಯಾಕ್‌ ಸಿನಿಮಾಗಳಲ್ಲಿ ಬಿಝಿಯಾಗಿರುವುದರಿಂದ, ಡೇಟ್ಸ್‌ ಸಮಸ್ಯೆಯಿಂದಾಗಿ ಚಿತ್ರತಂಡ ಸೋನಾಲ್‌ ಅವರನ್ನು ನಾಯಕಿಯಾಗಿ ಕರೆತಂದಿದೆ ಎನ್ನಲಾಗುತ್ತಿದ್ದು, ಚಿತ್ರತಂಡ ಮಾತ್ರ ನಾಯಕಿಯ ಬದಲಾವಣೆಯ ಬಗ್ಗೆ ಕಾರಣ ಬಿಚ್ಚಿಟ್ಟಿಲ್ಲ.

ಇದನ್ನೂ ಓದಿ:ಕರ್ನಾಟಕ ರಣಜಿ ತಂಡಕ್ಕೆ ಮನೀಷ್‌ ಪಾಂಡೆ ನಾಯಕ

ಸದ್ಯ ಸರಳವಾಗಿ ಮುಹೂರ್ತವನ್ನು ನೆರವೇರಿಸಿರುವ “ಗರಡಿ’ ಚಿತ್ರತಂಡ ಶೀಘ್ರದಲ್ಲಿಯೇ ಚಿತ್ರದ ಚಿತ್ರೀಕರಣಕ್ಕೆ ಹೊರಡುವ ಯೋಚನೆಯಲ್ಲಿದೆ.