ದೀಪಿಕಾಳ ರಾಜಕೀಯ ಸಂಬಂಧ ಯಾವ ಪಕ್ಷದ ಜತೆಗಿದೆ ಎಂಬುದು ಗೊತ್ತು: ಸ್ಮೃತಿ ಇರಾನಿ

ನವದೆಹಲಿ: ಇತ್ತೀಚೆಗೆ ಜೆಎನ್ ಯು ವಿದ್ಯಾರ್ಥಿಗಳು ಮತ್ತು ಕೆಲ ವಿದ್ಯಾರ್ಥಿ ಸಂಘಟನೆಗಳು ನಡೆಸಿದ್ದ ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದ ಬಾಲಿವುಡ್ ನಟಿ ದೀಪಿಕಾ ಪಡುಕೋಣೆ ವಿರುದ್ಧ ತೀವ್ರ ಟೀಕೆ ವ್ಯಕ್ತವಾಗುತ್ತಿರುವ ನಡುವೆ ದೀಪಿಕಾ ನಟನೆಯ ಛಪಾಕ್ ಸಿನಿಮಾ ನಿಷೇಧಿಸಿಬೇಕೆಂದು ಕೆಲವರು ಒತ್ತಾಯಿಸುತ್ತಿದ್ದಾರೆ. ಏತನ್ಮಧ್ಯೆ ಕೇಂದ್ರ ಸಚಿವೆ ಸ್ಮೃತಿ ಇರಾನಿ ಪಡುಕೋಣೆ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ.

ದೀಪಿಕಾ ಜೆಎನ್ ಯುನಲ್ಲಿ ನಡೆಯುತ್ತಿದ್ದ ಪ್ರತಿಭಟನೆಯಲ್ಲಿ ಪಾಲ್ಗೊಂಡಿರುವ ಬಗ್ಗೆ ತಿರುಗೇಟು ನೀಡಿರುವ ಸ್ಮೃತಿ ಇರಾನಿ, ಯಾರಾದರೂ ಈ ಸುದ್ದಿಯನ್ನು(ಜೆಎನ್ ಯು ಭೇಟಿ) ಓದಿದರೆ ಅವರ ನಿಲುವು ಏನು ಎಂಬುದು ತಿಳಿಯುತ್ತದೆ. ಯಾರು ದೇಶವನ್ನು ಒಡೆಯುವ ಜನರಿದ್ದಾರೋ ಅವರ ಜತೆ ಕೈಜೋಡಿಸಲು ಮುಂದಾಗಿದ್ದಾರೆ. ಗಡಿಯಲ್ಲಿ, ದೇಶದಲ್ಲಿ ಸಿಆರ್ ಪಿಎಫ್ ಯೋಧರನ್ನು ಹತ್ಯೆಗೈದಾಗ ಪ್ರತಿ ಬಾರಿ ಸಂಭ್ರಮಿಸುವ ಜನರ ಪರವಾಗಿದ್ದೀರಿ ಎಂಬುದು ತಿಳಿದಿದೆ. ಯಾರು ಯುವತಿಯರ ಖಾಸಗಿ ಭಾಗಗಳಿಗೆ ಲಾಠಿಯಿಂದ ಹೊಡೆಯುತ್ತಾರೋ ಅಂತಹವರ ಬೆಂಬಲಕ್ಕೆ ನಿಂತಿದ್ದಾರೆ ಎಂಬುದಾಗಿ ವಾಗ್ದಾಳಿ ನಡೆಸಿದರು.

ಆಕೆಯ ಬೆಂಬಲ ಆಕೆಯ ಹಕ್ಕು. ನಾನು ಆಕೆಯ ಹಕ್ಕನ್ನು ನಿರಾಕರಿಸಲಾರೆ. ಈ ನಟಿಯ (ದೀಪಿಕಾ) ರಾಜಕೀಯ ಸಂಬಂಧ ಯಾರ ಜತೆಗಿದೆ ಎಂಬುದು 2011ರಲ್ಲಿ ತಿಳಿದಿತ್ತು. ಆಕೆ ಕಾಂಗ್ರೆಸ್ ಪಕ್ಷದ ಬೆಂಬಲಿಗಳಾಗಿದ್ದಾಳೆ. ರಾಹುಲ್ ಗಾಂಧಿ ಪ್ರಧಾನಿಯಾಗಬೇಕೆಂಬ ಧ್ವನಿಗೆ ದೀಪಿಕಾ ಬೆಂಬಲ ಸೂಚಿಸಿದ್ದರು ಎಂದು ಸ್ಮೃತಿ ಇರಾನಿ ದ ನ್ಯೂ ಇಂಡಿಯನ್ ಎಕ್ಸ್ ಪ್ರೆಸ್ ಚೆನ್ನೈನಲ್ಲಿ ಆಯೋಜಿಸಿದ್ದ ಸಮಾರಂಭದಲ್ಲಿ ಈ ಪ್ರತಿಕ್ರಿಯೆ ನೀಡಿದ್ದಾರೆ.