ಆರಡಿ ಟಕ್ಕರ್‌

ಕನ್ನಡ ಚಿತ್ರರಂಗದಲ್ಲಿ ಇರುವ ಆರಡಿ ಹೀರೋಗಳು ಕೆಲವೇ ಕೆಲವರು. ಅದೇ ಕಾರಣದಿಂದ ಉದ್ದದ ಹೀರೋಗಳ ಸಂಖ್ಯೆ ನಮ್ಮಲ್ಲಿ ಕಡಿಮೆ ಇದ್ದಾರೆ ಎಂಬ ಮಾತು ಕೇಳಿಬರುತ್ತಲೇ ಇರುತ್ತದೆ. ಈಗ ಕನ್ನಡ ಚಿತ್ರರಂಗಕ್ಕೊಬ್ಬ ಆರಡಿ ಹೀರೋ ಎಂಟ್ರಿಕೊಟ್ಟಿದ್ದಾರೆ. ಅದು ಮನೋಜ್‌. ಮನೋಜ್‌ ಎಂಬ ಯುವ ನಟ “ಟಕ್ಕರ್‌’ ಎಂಬ ಸಿನಿಮಾ ಮೂಲಕ ಕನ್ನಡ ಚಿತ್ರರಂಗಕ್ಕೆ ನಾಯಕರಾಗಿ ಎಂಟ್ರಿಕೊಟ್ಟಿದ್ದಾರೆ. ಈಗಾಗಲೇ ಈ ಚಿತ್ರಕ್ಕೆ ಮುಹೂರ್ತವಾಗಿದೆ. 

ಈ ಮನೋಜ್‌, ನಟ ದರ್ಶನ್‌ ಅವರ ಸಂಬಂಧಿ. ದರ್ಶನ್‌ ನಾಯಕರಾಗಿದ್ದ “ಅಂಬರೀಶ’, “ಚಕ್ರವರ್ತಿ’ ಸಿನಿಮಾಗಳಲ್ಲೂ ಮನೋಜ್‌ ನಟಿಸಿದ್ದಾರೆ. ತಾನು ಕೂಡಾ ಹೀರೋ ಆಗಬೇಕೆಂದು ಕನಸು ಕಂಡಿದ್ದ ಮನೋಜ್‌ ಅವರ ಕನಸು ಈಗ “ಟಕ್ಕರ್‌’ ಮೂಲಕ ಈಡೇರಿದೆ. ಹೆಸರಿಗೆ ತಕ್ಕಂತೆ ಇದು ಔಟ್‌ ಅಂಡ್‌ ಔಟ್‌ ಆ್ಯಕ್ಷನ್‌ ಸಿನಿಮಾ. ಒಬ್ಬ ಹೊಸ ಹೀರೋನಾ ಲಾಂಚ್‌ಗೆ ಏನೆಲ್ಲಾ ಬೇಕೋ ಆ ಎಲ್ಲಾ ಅಂಶಗಳು ಈ ಚಿತ್ರದಲ್ಲಿವೆಯಂತೆ. 

ಈ ಹಿಂದೆ “ರನ್‌ ಆ್ಯಂಟನಿ’ ಸಿನಿಮಾ ನಿರ್ದೇಶಿಸಿದ್ದ ರಘು ಶಾಸಿ ಈ ಸಿನಿಮಾದ ನಿರ್ದೇಶಕರು. ಚಿತ್ರವನ್ನು ನಾಗೇಶ್‌ ಕೋಗಿಲು ನಿರ್ಮಿಸುತ್ತಿದ್ದಾರೆ. ಮನೋಜ್‌ಗೆ ನಾಯಕಿಯಾಗಿ ರಂಜನಿ ನಟಿಸುತ್ತಿದ್ದಾರೆ. “ಟಕ್ಕರ್‌’ ಮೂಲಕ ನಾಯಕರಾಗುತ್ತಿರುವ ಮನೋಜ್‌ಗೆ ಮುಂದೆ ಕನ್ನಡ ಚಿತ್ರರಂಗದಲ್ಲಿ ಹೊಸ ಹೊಸ ಪಾತ್ರಗಳ, ಚಿತ್ರಗಳ ಮೂಲಕ ಬೆಳೆಯುವ ಆಸೆ ಇದೆ.