ಸಿಎಎ ವಿರೋಧಿಸಿ ಏಕಾಂಗಿ ಹೋರಾಟ

ಸಾಗರ: ಸಿಎಎ ಹಾಗೂ ಎನ್‌ಆರ್‌ಸಿ ಜಾರಿ ವಿರೋ ಧಿಸಿ ಕಲಾವಿದೆ ಹಾಗೂ ಸಾಮಾಜಿಕ ಹೋರಾಟಗಾರ್ತಿ ಪೂರ್ಣಿಮಾ ಎಲ್‌.ಕೆ. ಅವರು ತಾಳಗುಪ್ಪದ ರಾಷ್ಟ್ರೀಯ ಹೆದ್ದಾರಿ-206ರ ಪಕ್ಕದಲ್ಲಿ ಒಂಟಿಯಾಗಿ ಫಲಕ ಹಿಡಿದು ಕೂತು ಶನಿವಾರ ಪ್ರತಿಭಟನೆ ನಡೆಸಿದರು.

ಈ ಬಗ್ಗೆ ಪತ್ರಿಕೆಯೊಂದಿಗೆ ಮಾತನಾಡಿದ ಅವರು, ಈ ಶಾಸನಗಳು ಮೇಲ್ನೋಟಕ್ಕೆ ಅಲ್ಪಸಂಖ್ಯಾತರ ವಿರೋಧಿ ಎಂಬಂತೆ ಬಿಂಬಿತವಾಗಿವೆ. ವಾಸ್ತವವಾಗಿ ಆದಿವಾಸಿಗಳ, ಅಲೆಮಾರಿಗಳ, ದಲಿತರ, ಮಹಿಳೆಯರ ವಿರೋ ಧಿಯೂ ಆಗಿದೆ. ಮುಗ್ಧರಾದ ಈ ಜನರಿಗೆ ತಮಗಿರುವ ಮೂಲಭೂತ ಹಕ್ಕುಗಳೇನು ಎಂಬುದರ ಅರಿವೂ ಇಲ್ಲ.

ಈ ಕಾಯ್ದೆ ತಿದ್ದುಪಡಿ ಮಾಡಿ ಜಾರಿಗೊಳಿಸುವುದರಿಂದ ಹುಟ್ಟಿ ಬೆಳೆದ ಸ್ಥಳದಲ್ಲಿಯೇ ಅವರು ಪರದೇಶಿಗಳಾಗುವ ಅಪಾಯವಿದೆ. ಸಂವಿಧಾನದ ಆಶಯಕ್ಕೆ ವಿರೋಧಿಯಾದ ಈ ಶಾಸನದ ಕರಾಳತೆಯನ್ನು ಜನರಿಗೆ ಮನವರಿಕೆ ಮಾಡಿಕೊಡಲು ಈ ಮಾದರಿಯಲ್ಲಿ ಪ್ರತಿಭಟನೆ ನಡೆಸುತ್ತಿರುವುದಾಗಿ ಹೇಳಿದರು.

ಸ್ಥಳಕ್ಕಾಗಮಿಸಿದ ಪೊಲೀಸ್‌ ಅಧಿಕಾರಿಗಳು ನಿಷೇಧಾಜ್ಞೆ ಹಿನ್ನೆಲೆಯಲ್ಲಿ ಪ್ರತಿಭಟನೆಗೆ ಅವಕಾಶವಿಲ್ಲ ಎಂದು ಸೂಚಿಸಿ ಎಚ್ಚರಿಕೆ ನೀಡಿದರು. ನಂತರ, ಪೂರ್ಣಿಮಾ ತಮ್ಮ ಹೋರಾಟವನ್ನು ಅರ್ಧಕ್ಕೆ ಮೊಟಕುಗೊಳಿಸಿದರು.