ಕೋವಿಡ್ 19 ಕಳವಳ: ಎಪ್ರಿಲ್ 7 ರಿಂದ ಒಂದು ತಿಂಗಳು ಸಿಂಗಾಪುರ ಲಾಕ್ ಡೌನ್

ಸಿಂಗಾಪುರ: ಕೋವಿಡ್ 19 ವೈರಸ್ ಮತ್ತಷ್ಟು ವ್ಯಾಪಿಸದಂತೆ ತಡೆಯಲು ಏ.7ರಿಂದ ಒಂದು ತಿಂಗಳ ಕಾಲ ಲಾಕ್ ಡೌನ್ ಮಾಡಲು ಸಿಂಗಾಪುರ ಸರಕಾರ ನಿರ್ಧರಿಸಿದೆ. ಶಿಕ್ಷಣ ಸಂಸ್ಥೆಗಳು, ಕಚೇರಿಗಳು ಬಂದ್‌ ಆಗಿರಲಿವೆ. ಅಗತ್ಯ ವಸ್ತುಗಳು ಮತ್ತು ಸೇವೆಗಳನ್ನು ಯಥಾಸ್ಥಿತಿಯಲ್ಲಿ ಇರಿಸಲಾಗುತ್ತದೆ ಎಂದು ಶುಕ್ರವಾರ ಪ್ರಧಾನಿ ಲೀ ಹಿಸೆನ್‌ ಲೂಂಗ್‌ ತಿಳಿಸಿದ್ದಾರೆ.

‘ಸದ್ಯ ಇರುವ ಪರಿಸ್ಥಿತಿ ನೋಡಿದರೆ ಮುಂದಿನ ದಿನಗಳಲ್ಲಿ ಪರಿಸ್ಥಿತಿ ಭಾರಿ ಸವಾಲು ಇರುವಂತೆ ಕಾಣುತ್ತಿದೆ. ಜತೆಗೆ ಕೈಮೀರುವ ಹಂತ ಕಾಣುತ್ತಿದೆ. ಹೀಗಾಗಿ ಜನರು ಅಗತ್ಯ ವಸ್ತುಗಳನ್ನು ಖರೀದಿಸಲು ಮಾತ್ರ ಮನೆಯಿಂದ ಹೊರಗೆ ಬರಬೇಕು’ ಎಂದು ಮನವಿ ಮಾಡಿಕೊಂಡಿದ್ದಾರೆ. ಭಾನುವಾರದಿಂದ ಎಲ್ಲಾ ನಿವಾಸಿಗಳಿಗೂ ಮರು ಬಳಕೆ ಮಾಡಬಹುದಾದ ಮಾಸ್ಕ್ ಗಳನ್ನು ಸರ್ಕಾರದ ವತಿಯಿಂದಲೇ ನೀಡಲಾಗುತ್ತದೆ ಎಂದೂ ಪ್ರಧಾನಿ ಲೀ ಹಿಸೆನ್‌ ಲೂಂಗ್‌ ಹೇಳಿದ್ದಾರೆ.

ಸಿಂಗಾಪುರದಲ್ಲಿ ಎರಡು ವಾರಗಳ ಅವಧಿಯಲ್ಲಿ ಕೋರೊನಾ ಸೋಂಕು ವ್ಯಾಪಕವಾಗಿ ಹರಡಿದೆ. ಗುರುವಾರದವರೆಗಿನ ಮಾಹಿತಿಯಂತೆ 1,049 ಸೋಂಕಿನ ಪ್ರಕರಣಗಳು ಖಚಿತಪಟ್ಟಿವೆ ಮತ್ತು ಈ ಸೋಂಕಿಗೆ ಈಗಾಗಲೇ ದೇಶಾದ್ಯಂತ ಐವರು ಅಸುನೀಗಿದ್ದಾರೆ.