ಸಿಬುಲ್ಕೋವಾ ಫೈನಲಿಗೆ

ನ್ಯೂ ಹವೆನ್‌: ದ್ವಿತೀಯ ಶ್ರೇಯಾಂಕದ ಡೊಮಿನಿಕಾ ಸಿಬುಲ್ಕೋವಾ ಮತ್ತು ದರಿಯಾ ಗಾವ್ರಿಲೋವಾ ಅವರು ಕನೆಕ್ಟಿಕಟ್‌ ಓಪನ್‌ ಟೆನಿಸ್‌ ಕೂಟದ ಪ್ರಶಸ್ತಿಗಾಗಿ ಪರಸ್ಪರ ಹೋರಾಡಲಿದ್ದಾರೆ. 

ಇಲ್ಲಿನ ಹೊರಾಂಗಣ ಹಾರ್ಡ್‌ಕೋರ್ಟ್‌ ಅಂಗಣದಲ್ಲಿ ನಡೆದ ಈ ಪಂದ್ಯದಲ್ಲಿ ಸಿಬುಲ್ಕೋವಾ ಬೆಲ್ಜಿಯಂನ ಎಲಿಸ್‌ ಮಾರ್ಟೆನ್ಸ್‌ ಅವರನ್ನು 6-1, 6-3 ನೇರ ಸೆಟ್‌ಗಳಿಂದ ಸೋಲಿಸಿ ಫೈನಲಿಗೇರಿದರೆ ಗಾವ್ರಿಲೋವಾ ಅಗ್ರ ಶ್ರೇಯಾಂಕದ ಅಗ್ನಿàಸ್ಕಾ ರಾದ್ವಂಸ್ಕಾ ಅವರನ್ನು 6-4, 6-4 ಸೆಟ್‌ಗಳಿಂದ ಕೆಡಹಿ ಪ್ರಶಸ್ತಿ ಸುತ್ತಿಗೇರಿದರು. 23ರ ಹರೆಯದ ಗಾವ್ರಿಲೋವಾ ಅವರು ತನ್ನ ಬಾಳ್ವೆಯ ಮೊದಲ ಪ್ರಶಸ್ತಿ ಗೆಲುವಿನ ನಿರೀಕ್ಷೆಯಲ್ಲಿದ್ದಾರೆ. 

ವಿಶ್ವದ 11ನೇ ರ್‍ಯಾಂಕಿನ ಸಿಬುಲ್ಕೋವಾ ತನ್ನ ಬಾಳ್ವೆಯಲ್ಲಿ ಎಂಟು ಪ್ರಶಸ್ತಿ ಗೆದ್ದಿದ್ದಾರೆ. ಕಳೆದ ವರ್ಷ ನಾಲ್ಕು ಪ್ರಶಸ್ತಿ ಗೆದ್ದಿರುವ ಸಿಬುಲ್ಕೋವಾ ಈ ಬಾರಿ ಮೊದಲ ಪ್ರಶಸ್ತಿಯ ನಿರೀಕ್ಷೆಯಲ್ಲಿದ್ದಾರೆ. ಈ ವರ್ಷ ಅವರು ಇದೇ ಮೊದಲ ಸಲ ಕೂಟವೊಂದರಲ್ಲಿ ಫೈನಲಿಗೇರಿದ್ದಾರೆ.