ಬಾಲ್ ಬದಲು ವಿಕೆಟ್ ಗೆ ಹೊಡೆದ ಪಾಕ್ ಬ್ಯಾಟ್ಸಮನ್

ಟ್ರೆಂಟ್ ಬ್ರಿಡ್ಜ್: ಕ್ರಿಕೆಟ್ ಎನ್ನುವುದು ಚೆಂಡು ಮತ್ತು ಬ್ಯಾಟಿನ ನಡುವೆ ನಡೆಯುವ ಹೋರಾಟ. ಬೌಲರ್ ಎಸೆದ ಚೆಂಡನ್ನು ಬ್ಯಾಟ್ಸಮನ್ ಮೈದಾನದ ಮೂಲೆ ಮೂಲೆಗೆ ಬಾರಿಸುತ್ತಾರೆ. ಆದರೆ ಈ ಪಾಕ್ ಬ್ಯಾಟ್ಸ್ ಮನ್ ಬಾಲ್ ಗೆ ಹೊಡೆಯುವ ಬದಲು ವಿಕೆಟ್ ಗೆ ಹೊಡೆದಿದ್ದಾರೆ. ಹೀಗೆ ವಿಚಿತ್ರವಾಗಿ ಔಟಾದ ಬ್ಯಾಟ್ಸಮನ್ ಪಾಕಿಸ್ಥಾನದ ಅನುಭವಿ ಆಟಗಾರ ಶೋಯೇಬ್ ಮಲಿಕ್.

ಶುಕ್ರವಾರ ಇಂಗ್ಲೆಂಡ್ ನ ಟ್ರೆಂಟ್ ಬ್ರಿಡ್ಜ್ ಅಂಗಳದಲ್ಲಿ ನಡೆದ ಆತಿಥೇಯ ಇಂಗ್ಲೆಂಡ್ ಮತ್ತು ಪಾಕಿಸ್ಥಾನ ನಡುವಿನ ಪಂದ್ಯದ ವೇಳೆ ಮಲಿಕ್ ಈ ರೀತಿ ಔಟ್ ಆಗಿ ಅವಮಾನ ಅನುಭವಿಸಿದರು.

ಪಾಕ್ ಮಾಜಿ ನಾಯಕ ಶೋಯೇಬ್ ಮಲಿಕ್ 26 ಎಸೆತಗಳಲ್ಲಿ 41 ರನ್ ಹೊಡೆದು ಉತ್ತಮವಾಗೇ ಆಡುತ್ತಿದ್ದರು. ಇನ್ನಿಂಗ್ಸ್ ನ 47ನೇ ಓವರ್ ಎಸೆಯಲು ಬಂದ ಮಾರ್ಕ್ ವುಡ್ ಎಸೆತವನ್ನು ಲೇಟ್ ಕಟ್ ಮಾಡುವ ಪ್ರಯತ್ನದಲ್ಲಿ ಮಲಿಕ್ ಬಾಲ್ ಗೆ ಹೊಡೆಯುವ ಬದಲು ಸ್ಟಂಪ್ ಗೆ ಬ್ಯಾಟ್ ನಿಂದ ಬಡಿದು ಬಿಟ್ಟರು. ಕ್ರಿಕೆಟ್ ನಿಯಮಗಳ ಪ್ರಕಾರ ಇದು ಔಟ್. ಹೀಗಾಗಿ ಶೋಯೇಬ್ ಮಲಿಕ್ ಭಾರವಾದ ಹೆಜ್ಜೆಯಿಟ್ಟು ಪೆವಿಲಿಯನ್ ಗೆ ನಡೆದರು.