ಶೆಟ್ಟರ್‌ ಯಾವ ಕಾರಣಕ್ಕೂ ಗೆಲ್ಲುವಂತಿಲ್ಲ: ಶಾ

ಹುಬ್ಬಳ್ಳಿ: ಮಾಜಿ ಸಿಎಂ ಜಗದೀಶ ಶೆಟ್ಟರ್‌ ಅವರಿಗೆ ಸೋಲುಣಿಸಲೇಬೇಕೆಂದು ಬಿಜೆಪಿ ವರಿಷ್ಠರು-ನಾಯಕರು ಜಿದ್ದಿಗೆ ಬಿದ್ದಿದ್ದು, ಕೇಂದ್ರ ಗೃಹ ಸಚಿವ ಅಮಿತ್‌ ಶಾ ನಗರದಲ್ಲಿ ಒಂದು ದಿನ ತಂಗಿ ಶೆಟ್ಟರ್‌ ಅವರನ್ನು ಸೋಲಿಸಲು ತಂತ್ರಗಾರಿಕೆ ಹೆಣೆದಿದ್ದಾರೆ.

ಕೇಂದ್ರ ಸಚಿವ ಪ್ರಹ್ಲಾದ ಜೋಶಿ, ಸಿಎಂ ಬಸವರಾಜ ಬೊಮ್ಮಾಯಿ ಹಾಗೂ ಶಾಸಕ ಅರವಿಂದ ಬೆಲ್ಲದ ಅವರೊಂದಿಗೆ ಸುದೀರ್ಘ‌ ಸಭೆ ನಡೆಸಿದ್ದು, ಶೆಟ್ಟರ್‌ರನ್ನು ಸೋಲಿಸಿಯೇ ತೀರಬೇಕೆಂಬ ಫರ್ಮಾನು ಹೊರಡಿಸಿದ್ದಾರೆ. ಸೋಮವಾರ ಸಂಜೆಯೇ ಹುಬ್ಬಳ್ಳಿಗೆ ಆಗಮಿಸಿದ್ದ ಅಮಿತ್‌ ಶಾ ಮಂಗಳವಾರ ಮಧ್ಯಾಹ್ನದವರೆಗೂ ಇಲ್ಲಿಯೇ ಉಳಿದು ತಂತ್ರಗಾರಿಕೆ ರೂಪಿಸಿದ್ದಾರೆ. ಬೆಳಗ್ಗೆ 9 ಗಂಟೆಗೆ ಹುಬ್ಬಳ್ಳಿಯಿಂದ ಹೊರಡಬೇಕಿದ್ದ ಅವರು 11.30ರ ವರೆಗೂ ಇಲ್ಲಿಯೇ ಉಳಿದು ರಹಸ್ಯ ಸಭೆಯಲ್ಲಿ ನಡೆಸಿದರು.

ಹೊರಡುವ ನಿಗದಿತ ಸಮಯಕ್ಕಿಂತ ಸುಮಾರು ಎರಡೂವರೆ ತಾಸಿಗಿಂತ ಅಧಿಕ ಸಮಯ ಇಲ್ಲಿಯೇ ಕಳೆದಿರುವುದು ಗಮನಾರ್ಹ. ಶಾ ಅವರು ಪಕ್ಷದ ಪರವಾಗಿ ನಗರದಲ್ಲಿ ರೋಡ್‌ ಶೋ, ಸಾರ್ವಜನಿಕ ಸಮಾರಂಭದಲ್ಲಿ ಪಾಲ್ಗೊಳ್ಳುವ ಕಾರ್ಯಕ್ರಮ ಹಾಕಿಕೊಳ್ಳದೆ ತಂತ್ರಗಾರಿಕೆ, ಮಾಹಿತಿ ಸಂಗ್ರಹಿಸುವಿಕೆ, ರಹಸ್ಯ ಚರ್ಚೆ ಹಾಗೂ ಅಗತ್ಯ ಸೂಚನೆಗಳ ನೀಡಿಕೆ ಮಾಡಿರುವುದು ನೋಡಿದರೆ, ಶೆಟ್ಟರ ಅವರನ್ನು ಬಿಜೆಪಿ ಹೈಕಮಾಂಡ್‌ ಎಷ್ಟು ಗಂಭೀರವಾಗಿ ಪರಿಗಣಿಸಿದೆ ಎಂಬುದರ ಸಂಕೇತವಾಗಿದೆ.