ನವಾಜ್‌ ಷರೀಫ್ ಪಿಮ್ಸ್‌ಗೆ ದಾಖಲು; ಸಬ್‌ ಜೈಲಾದ ಆಸ್ಪತ್ರೆ ವಾರ್ಡ್‌

ಇಸ್ಲಾಮಾಬಾದ್‌ : ಭ್ರಷ್ಟಾಚಾರ ಪ್ರಕರಣದಲ್ಲಿ ಹತ್ತು ವರ್ಷಗಳ ಜೈಲು ಶಿಕ್ಷೆಗೆ ಗುರಿಯಾಗಿರುವ ಪಾಕ್‌ ಪದಚ್ಯುತ ಪ್ರಧಾನಿ ನವಾಜ್‌ ಷರೀಫ್ ಅವರ ಆರೋಗ್ಯ ತೀವ್ರವಾಗಿ ಹದಗೆಟ್ಟಿರುವ ಕಾರಣ ಅವರನ್ನು ಪಾಕಿಸ್ಥಾನ್‌ ಇನ್‌ಸ್ಟಿಟ್ಯೂಟ್‌ ಆಫ್ ಮೆಡಿಕಲ್‌ ಸಯನ್ಸಸ್‌ ಗೆ ಸೇರಿಸಲಾಗಿದೆ. ಅಂತೆಯೇ ಅದನ್ನು ಸಬ್‌ ಜೈಲಾಗಿ ಘೋಷಿಸಲಾಗಿದೆ.

68ರ ಹರೆಯದ ಷರೀಫ್ ಅವರ ಆರೋಗ್ಯ ಹದಗೆಟ್ಟ ಕಾರಣ ನಿನ್ನೆ ಭಾನುವಾರ ಅವರನ್ನು ಇಸ್ಲಾಮಾಬಾದ್‌ ನಲ್ಲಿನ ದೇಶದ ಉನ್ನತ ಹೃದ್ರೋಗ ಚಿಕಿತ್ಸಾಲಯಕ್ಕೆ ಸೇರಿಸಲಾಗಿತ್ತು. ಅಲ್ಲಿಯ ವರೆಗೂ ಷರೀಫ್ ಅವರು ರಾವಲ್ಪಿಂಡಿಯ ಅದಿಯಾಲಾ ಜೈಲಿನಲ್ಲಿದ್ದರು. 

ಷರೀಫ್ ಅವರ ದೇಹಾರೋಗ್ಯ ಈಗ ಸ್ಥಿರವಾಗಿದೆ ಎಂದು ಆಸ್ಪತ್ರೆಯ  ಅಧಿಕಾರಿಗಳು ತಿಳಿಸಿದ್ದಾರೆ.