ಬಾಂಗ್ಲಾ ಟಿ20 ತಂಡಕ್ಕೆ ಮರಳಿದ ಶಕೀಬ್‌

ಢಾಕಾ: ಶ್ರೀಲಂಕಾ  ವಿರುದ್ಧ ಟಿ20 ಸರಣಿಗೆ ಬಾಂಗ್ಲಾ ತಂಡ ಸಾಕಷ್ಟು ಬದಲಾವಣೆಗಳಾಗಿದ್ದು, ಗಾಯದಿಂದ ಚೇತರಿಸಿಕೊಂಡಿರುವ ಆಲ್‌ರೌಂಡರ್‌ ಶಕೀಬ್‌ ಉಲ್‌ ಹಸನ್‌ ತಂಡಕ್ಕೆ ಮರಳಿದ್ದಾರೆ.

ಇನ್ನಷ್ಟೇ ಟಿ20 ಪಂದ್ಯ ಆಡಬೇಕಿರುವ ಐವರು ಆಟಗಾರರಾದ ವಿಕೆಟ್‌ ಕೀಪರ್‌ ಜಾಕಿರ್‌ ಹಸನ್‌, ವೇಗಿ ಅಬು ಜಾಯೇದ್‌, ಅರಿಫ‌ುಲ್‌ ಹಕ್‌, ಮೆಹೆದಿ ಹಸನ್‌ ಮತ್ತು ಅಫಿಫ್ ಹೊಸೈನ್‌ ಸೇರಿದಂತೆ 15 ಆಟಗಾರರ ಬಾಂಗ್ಲಾ ತಂಡ ಪ್ರಕಟವಾಗಿದೆ.

2016ರಲ್ಲಿ ಭಾರತದಲ್ಲಿ ನಡೆದ ಐಸಿಸಿ ವರ್ಲ್ಡ್ ಟಿ20ಯಲ್ಲಿ ಆಡಿದ್ದ ವೇಗಿ ಅಬು ಹೈದರ್‌ ಅವರನ್ನು ಮತ್ತೆ ತಂಡಕ್ಕೆ ಕರೆತರಲಾಗಿದೆ. ಕಳೆದ ಅಕ್ಟೋಬರ್‌ನಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಟಿ20 ಸರಣಿಯ 2 ಪಂದ್ಯಗಳನ್ನು ಕಳೆದುಕೊಂಡಿದ್ದ ತಮಿಮ್‌ ಇಕ್ಬಾಲ್‌ ಮತ್ತು ಮುಸ್ತಫಿಜರ್‌ ರೆಹಮಾನ್‌ ಅವರೂ ತಂಡಕ್ಕೆ ಮರಳಿದ್ದಾರೆ.

ದಕ್ಷಿಣ ಆಫ್ರಿಕಾ ಟಿ20 ಸರಣಿ ತಂಡದಲ್ಲಿದ್ದ ಮೊಮಿನುಲ್‌ ಹಕ್‌, ಇಮ್ರುಲ್‌ ಕಯೆಸ್‌, ಲಿಟನ್‌ ದಾಸ್‌, ನಾಸಿರ್‌ ಹೊಸೈನ್‌, ಶಫಿ ಉಲ್‌ ಇಸ್ಲಾಮ್‌ ಮತ್ತು ತಸ್ಕಿನ್‌ ಅಹ್ಮದ್‌ ಅವರನ್ನು ಕೈಬಿಡಲಾಗಿದೆ.