Dunki: ಕ್ರಿಸ್ಮಸ್‌ ಗೆ ʼಡಂಕಿʼ ರಿಲೀಸ್ ಪಕ್ಕಾ; ಹ್ಯಾಟ್ರಿಕ್‌ ಹಿಟ್‌ ಕೊಡ್ತಾರ ಶಾರುಖ್?

ಮುಂಬಯಿ: ಕಿಂಗ್‌ ಖಾನ್‌ ಶಾರುಖ್‌ ಖಾನ್‌ ಅಭಿನಯದ ʼಜವಾನ್‌ʼ ಸಿನಿಮಾ ಭರ್ಜರಿ ಆಗಿ ಪ್ರದರ್ಶನ ಕಾಣುತ್ತಿದೆ. ಬಾಕ್ಸ್‌ ಆಫೀಸ್‌ ನಲ್ಲಿ ವರ್ಲ್ಡ್‌ ವೈಡ್‌ 700 ಕೋಟಿಗೂ ಅಧಿಕ ಗಳಿಕೆ ಕಂಡಿದೆ.

ʼಪಠಾಣ್‌ʼ ಸಿನಿಮಾದ ಬಳಿಕ ಶಾರುಖ್‌ ಖಾನ್‌ ʼಜವಾನ್‌ʼ ಮೂಲಕ ಮತ್ತೊಮ್ಮೆ ಬಾಕ್ಸ್‌ ಆಫೀಸ್‌ ಕಿಂಗ್‌ ಆಗಿದ್ದಾರೆ. ಸಿನಿಮಾ ಬಿಗ್‌ ಹಿಟ್‌ ಆಗುವ ಮೂಲಕ ಕಾಲಿವುಡ್‌  ಸ್ಟಾರ್‌ ಡೈರೆಕ್ಟರ್‌ ಅಟ್ಲಿ ಕುಮಾರ್‌ ಬಾಲಿವುಡ್‌ ನಲ್ಲಿ ಮಿಂಚಿದ್ದಾರೆ.

ಇತ್ತೀಚೆಗೆ ಅಟ್ಲಿ ಶಾರುಖ್‌ ಅವರೊಂದಿಗೆ ಮತ್ತೆ ಸಿನಿಮಾ ಮಾಡುವುದಾಗಿ ಹೇಳಿದ್ದಾರೆ. ʼಜವಾನ್‌ʼ ಸಿನಿಮಾ ತಂಡ ಚಿತ್ರ ಯಶಸ್ಸಾದ ಖುಷಿಯಲ್ಲಿ ಸಕ್ಸಸ್‌ ಮೀಟ್‌ ಆಯೋಜಿಸಿ ಪ್ರೇಕ್ಷಕರಿಗೆ ಧನ್ಯವಾದವನ್ನು ಸಲ್ಲಿಸಿದೆ.

ಬ್ಯಾಕ್‌ ಟು ಬ್ಯಾಕ್‌ ಎರಡು ಬಿಗ್‌ ಹಿಟ್‌ ಗಳನ್ನು ನೀಡಿದ ಬಳಿಕ ಇದೀಗ ಶಾರುಖ್‌ ಖಾನ್‌ ತಮ್ಮ ಮುಂದಿನ ಚಿತ್ರದತ್ತ ಗಮನ ಹರಿಸಿದ್ದಾರೆ. ಶಾರುಖ್‌ ಖಾನ್‌ ರಾಜ್‌ಕುಮಾರ್ ಹಿರಾನಿ ಅವರ ʼಡಂಕಿʼ ಸಿನಿಮಾದಲ್ಲಿ ಕಾಣಿಸಿಕೊಳ್ಳಲಿರುವುದು ಗೊತ್ತಿರುವ ವಿಚಾರ. ಈ ಸಿನಿಮಾದ ಬಗ್ಗೆ ಬಹು ನಿರೀಕ್ಷೆಯನ್ನಿಟ್ಟುಕೊಳ್ಳಲಾಗಿದೆ.

ಸಿನಿಮಾ ಇದೇ ವರ್ಷದ ಕೊನೆಯಲ್ಲಿ ರಿಲೀಸ್‌ ಆಗಲಿದೆ ಎನ್ನಲಾಗಿತ್ತು. ಇದೀಗ ಸಿನಿಮಾದ ರಿಲೀಸ್‌ ಡೇಟ್‌ ನ್ನು ಶಾರುಖ್‌ ಖಾನ್‌ ಆಧಿಕೃತಗೊಳಿಸಿದ್ದಾರೆ. ಡಿಸೆಂಬರ್‌ 22 ರಂದು ಸಿನಿಮಾ ರಿಲೀಸ್‌ ಆಗಲಿದೆ ಎನ್ನಲಾಗಿತ್ತು. ಇದೀಗ ಈ ದಿನಾಂಕವನ್ನು ಶಾರುಖ್‌ ಖಾನ್‌ ಅಧಿಕೃತಗೊಳಿಸಿದ್ದಾರೆ.

ಸಕ್ಸಸ್‌ ಮೀಟ್‌ ನಲ್ಲಿ ಮಾತನಾಡಿದ ಅವರು, “ನಾವು ಗಣರಾಜ್ಯೋತ್ಸವದ ಜನವರಿ 26 ರಂದು ಚಿತ್ರವನ್ನು ರಿಲೀಸ್‌ ಮಾಡಿದ್ದೇವೆ. (ಪಠಾಣ್‌ ಸಿನಿಮಾ) ಆ ಬಳಿಕ ಶ್ರೀಕೃಷ್ಣನ ಜನ್ಮಾಷ್ಟಮಿಯಂದು ʼಜವಾನ್‌ʼ ಸಿನಿಮಾವನ್ನು ಬಿಡುಗಡೆ ಮಾಡಿದ್ದೇವೆ. ಮುಂದೆ ಕ್ರಿಸ್ಮಸ್‌ ಹಬ್ಬಕ್ಕೆ “ಡಂಕಿ” ಸಿನಿಮಾವನ್ನು ತರಲಿದ್ದೇವೆ. ರಾಷ್ಟ್ರೀಯ ಏಕೀಕರಣವನ್ನು ಇಡುತ್ತೇನೆ. ಯಾವಾಗಲೂ ನನ್ನ ಸಿನಿಮಾ ಬಿಡುಗಡೆಯ ವೇಳೆ ಹಬ್ಬವೇ ಇರುತ್ತದೆ” ಎಂದು ಶಾರುಖ್‌ ಹೇಳಿದರು.

ʼಜವಾನ್‌ ʼ ಸಿನಿಮಾದ ಬಳಿಕ ಶಾರುಖ್‌ ಖಾನ್‌ ಅವರ ʼಡಂಕಿʼ ರಿಲೀಸ್‌ ಆಗಲಿದೆ. ಈ ಸಿನಿಮಾದಲ್ಲಿ ತಾಪ್ಸಿ ಪನ್ನು ಅವರು ಕಾಣಿಸಿಕೊಳ್ಳಲಿದ್ದಾರೆ. ನಿರ್ದೇಶಕ ರಾಜ್‌ಕುಮಾರ್ ಹಿರಾನಿ ಅವರ ಜೊತೆ ಶಾರುಖ್‌ ʼಡಂಕಿʼ ಬಗ್ಗೆ ಮಾತನಾಡುವ ವಿಡಿಯೋ ಸೋಶಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗಿತ್ತು.