ಇಂಡಿಯನ್‌ ವೆಲ್ಸ್‌ ಟೆನಿಸ್‌: ಸೆರೆನಾ ವಿಲಿಯಮ್ಸ್‌ ಗೆ ಗೆಲುವು

ಇಂಡಿಯನ್‌ ವೆಲ್ಸ್‌: ಗರ್ಭಿಣಿಯಾಗಿದ್ದರಿಂದ 15 ತಿಂಗಳ ದೀರ್ಘ‌ ಸಮಯದ ಬಳಿಕ ಟೆನಿಸ್‌ ಅಂಗಣಕ್ಕೆ ಮರಳಿದ ಸೆರೆನಾ ವಿಲಿಯಮ್ಸ್‌ ಅವರು ಡಬ್ಲ್ಯುಟಿಎ ಇಂಡಿಯನ್‌ ವೆಲ್ಸ್‌ ಟೆನಿಸ್‌ ಕೂಟದಲ್ಲಿ ಮೊದಲ ಗೆಲುವು ಕಂಡರು. 

ಈ ಕೂಟದ ಮೊದಲ ಸುತ್ತಿನಲ್ಲಿ ಸೆರೆನಾ ಅವರು ಝರಿನಾ ಡಿಯಾಸ್‌ ಅವರನ್ನು 7-5, 6-3 ಸೆಟ್‌ಗಳಿಂದ ಸೋಲಿಸಿದರು. 2017ರ ಆಸ್ಟ್ರೇಲಿಯನ್‌ ಓಪನ್‌ ಗೆದ್ದ ವೇಳೆ ಸೆರೆನಾ ವಿಶ್ವದ ನಂಬರ್‌ ವನ್‌ ಆಟಗಾರ್ತಿಯಾಗಿದ್ದರು. ಆಬಳಿಕ ಅವರು ಟೆನಿಸ್‌ನಿಂದ ದೂರ ಉಳಿದಿದ್ದರು ಮತ್ತು ಕಳೆದ ಸೆಪ್ಟಂಬರ್‌ನಲ್ಲಿ ಪುತ್ರಿ ಅಲೆಕ್ಸಿಸ್‌ ಒಲಿಂಪಿಯಾ ಅವರಿಗೆ ಜನ್ಮವಿತ್ತಿದ್ದರು. ಗುರುವಾರ ರಾತ್ರಿ ಮತ್ತೆ ಟೆನಿಸ್‌ ಅಂಗಣಕ್ಕೆ ಸೆರೆನಾ ಮರಳಿದಾಗ ಅರ್ಧ ತುಂಬಿದ್ದ ಕ್ರೀಡಾಂಗಣದ ಪ್ರೇಕ್ಷಕರು ಎದ್ದು ನಿಂತು ಮತ್ತು ಭಾರೀ ಕರತಾಡನದ ಮೂಲಕ ಅವರನ್ನು ಸ್ವಾಗತಿಸಿದರು. ಕಳೆದ 17 ವರ್ಷಗಳಲ್ಲಿ ಅವರು ಇಲ್ಲಿ ಆಡುತ್ತಿರುವುದು ಇದು ಕೇವಲ ಮೂರನೇ ಸಲವಾಗಿದೆ. 

36ರ ಹರೆಯದ ಸೆರೆನಾ ಇಂಡಿಯನ್ಸ್‌ ವೆಲ್ಸ್‌ನಲ್ಲಿ  ಆಕ ರ್ಷಣೆಯ ತಾರೆಯಾಗಿದ್ದಾರೆ. 23 ಬಾರಿಯ ಗ್ರ್ಯಾನ್‌ ಸ್ಲಾಮ್‌ ವಿಜೇತೆ ಸೆರೆನಾ ಉತ್ತಮವಾಗಿ ಆಡಿ ಪಂದ್ಯ ಗೆದ್ದು ತನ್ನ ಪುನರಾಗಮನ ಸಾರಿದರು. ದ್ವಿತೀಯ ಸುತ್ತಿನಲ್ಲಿ ಅವರು 29ನೇ ಶ್ರೇಯಾಂಕದ ಕಿಕಿ ಬೆರ್ಟೆನ್ಸ್‌ ಅವರನ್ನು ಎದುರಿಸಲಿದ್ದಾರೆ.