ಕ್ಯಾಚ್‌ ಪಡೆದು ಲಕ್ಷಾಧಿಪತಿಯಾದ ವೀಕ್ಷಕ!

ಆಕ್ಲೆಂಡ್‌: ಆಸ್ಟ್ರೇಲಿಯಾ-ನ್ಯೂಜಿಲ್ಯಾಂಡ್‌ ತಂಡಗಳ ನಡುವಿನ ಕ್ರಿಕೆಟ್‌ ಪಂದ್ಯ ವೀಕ್ಷಿಸಲು ಬಂದ ಕ್ರಿಕೆಟ್‌ ಅಭಿಮಾನಿಯೊಬ್ಬ ಕ್ರೀಡಾಂಗಣದಿಂದ ಹೊರಬರುವಾಗ ಲಕ್ಷಾಧಿಪತಿಯಾಗಿದ್ದಾನೆ!

ಇದು ಆಕ್ಲೆಂಡ್‌ನ‌ “ಈಡನ್‌ ಪಾರ್ಕ್‌’ ಕ್ರೀಡಾಂಗಣದಲ್ಲಿ ಶುಕ್ರವಾರದ ಟಿ20 ಪಂದ್ಯದ ವೇಳೆ ನಡೆದ ಘಟನೆ. ಹೌದು, ಕಿವೀಸ್‌-ಆಸೀಸ್‌ ನಡುವಿನ ತ್ರಿಕೋನ ಸರಣಿಯ ಪಂದ್ಯ ವೀಕ್ಷಿಸಲು ಮಿಚೆಲ್‌ ಗ್ರಿಮ್ಸ್‌ಟೋನ್‌ ತನ್ನ ಸ್ನೇಹಿತರೊಂದಿಗೆ ಸ್ಟೇಡಿಯಂಗೆ ಆಗಮಿಸಿದ್ದ. ಪಂದ್ಯದ ವೇಳೆ ಕಿವೀಸ್‌ ಬ್ಯಾಟ್ಸ್‌ಮನ್‌ ರಾಸ್‌ ಟಯ್ಲರ್‌ ಸ್ಕ್ವೇರ್‌ ಲೆಗ್‌ ಮೂಲಕ ಚೆಂಡನ್ನು ಸಿಕ್ಸರ್‌ಗೆ ಬಾರಿಸಿದರು. ಚೆಂಡು ಪ್ರೇಕ್ಷಕರ ಗ್ಯಾಲರಿ ಬಳಿ ನುಗ್ಗಿ ಬಂತು. ಈ ವೇಳೆ ಮಿಚೆಲ್‌ ಒಂದೇ ಕೈನಲ್ಲಿ ಕ್ಯಾಚ್‌ ಪಡೆಯುವಲ್ಲಿ ಸಫ‌ಲರಾಗಿದ್ದಾರೆ. ಕೂಡಲೇ ಹತ್ತಿರವಿದ್ದ ಕ್ರಿಕೆಟ್‌ ಅಭಿಮಾನಿಗಳೆಲ್ಲ ಮಿಚೆಲ್‌ಗೆ ಅಭಿನಂದನೆ ಸಲ್ಲಿಸಿದರು. ಬಳಿಕ ನ್ಯೂಜಿಲ್ಯಾಂಡ್‌ ಕ್ರಿಕೆಟ್‌ ಮಂಡಳಿ ಮಿಚೆಲ್‌ಗೆ 24 ಲಕ್ಷ ರೂ. ನೀಡಿತು.

ಪಂದ್ಯದ ಆರಂಭಕ್ಕೂ ಮೊದಲೇ ನ್ಯೂಜಿಲ್ಯಾಂಡ್‌ ಕ್ರಿಕೆಟ್‌ ಮಂಡಳಿ ಕ್ಯಾಚ್‌ ಪಡೆಯುವ ಪ್ರೇಕ್ಷಕರಿಗೆ 24 ಲಕ್ಷ ರೂ. ಬಹುಮಾನ ಘೋಷಿಸಿತ್ತು. ಅದರಂತೆ ಮಿಚಲ್‌ಗೆ ಅದೃಷ್ಟ ಒಲಿದು ಬಂತು ಎನ್ನುವುದು ವಿಶೇಷ!