ಪ್ರೊ ಕಬಡ್ಡಿಯಲ್ಲಿ ಸೆಹ್ರಾವತ್‌ ಬಿರುಗಾಳಿ

ಪ್ರೊ ಕಬಡ್ಡಿ ಏಳನೇ ಆವೃತ್ತಿಯಲ್ಲಿ ಎಲ್ಲರ ನಾಲಗೆ ತುದಿಯಲ್ಲಿ ಕುಣಿದಾಡುತ್ತಿರುವುದು ಒಂದೇ ಹೆಸರು, ಅದು ಪವನ್‌ ಸೆಹ್ರಾವತ್‌ ಎಂಬ ಬೆಂಕಿ ಬಿರುಗಾಳಿಯ ಹೆಸರು. ಬೆಂಗಳೂರು ಬುಲ್ಸ್‌ ತಂಡದ ಪವನ್‌ ಸೆಹ್ರಾವತ್‌ಗೆ ಸರಿಸಾಟಿ ಯಾರೂ ಇಲ್ಲ, ಆತ ನಡೆದದ್ದೇ ದಾರಿ, ಪ್ರತಿ ಪಂದ್ಯದಲ್ಲೂ ಪವನ್‌ ಸರ್ವಶ್ರೇಷ್ಠ ಆಟದಿಂದಲೇ ಅಬ್ಬರಿಸುತ್ತಿದ್ದಾರೆ. ಎದುರಾಳಿ ಆಟಗಾರರು ಹೆದರಿ ಬೆವರುತ್ತಿದ್ದಾರೆ.

ಪವನ್‌ ಗರ್ಜನೆಯಿಂದಲೇ ಬೆಂಗಳೂರು ಪ್ಲೇಆಫ್ ಹಾದಿಗೆ ಹತ್ತಿರವಾಗಿದೆ. ನವದೆಹಲಿ ಕಬಡ್ಡಿ ತಾರೆಗೆ 3ನೇ ಆವೃತ್ತಿಯಲ್ಲಿ ಬೆಂಗಳೂರು ಬುಲ್ಸ್‌ ತಂಡ ಅವಕಾಶ ಮಾಡಿಕೊಟ್ಟಿತ್ತು. ಹಂತಹಂತವಾಗಿ ಬೆಳೆದ ಪವನ್‌ ಸೆಹ್ರಾವತ್‌ ಇದೀಗ ಪ್ರೊ ಕಬಡ್ಡಿಯ ತಾರಾ ರೈಡರ್‌ ಎನಿಸಿಕೊಂಡಿದ್ದಾರೆ. ಸದ್ಯ 7ನೇ ಆವೃತ್ತಿಯಲ್ಲಿ 326 ರೈಡಿಂಗ್‌ ಅಂಕ ಪಡೆದಿರುವ ಪವನ್‌ ಸೆಹ್ರಾವತ್‌ ಒಟ್ಟಾರೆ 868 ಅಂಕ ಪಡೆದಿದ್ದಾರೆ.

ಇನ್ನೇನು 132 ಅಂಕಗಳಿಸಿದರೆ ಅವರು ಒಟ್ಟಾರೆ ಕೂಟದಲ್ಲಿ ಸಾವಿರ ಅಂಕಗಳ ಸರದಾರರಾಗಲಿದ್ದಾರೆ. ಹಾಲಿ ಚಾಂಪಿಯನ್‌ ಬೆಂಗಳೂರು 6ನೇ ಆವೃತ್ತಿಯಲ್ಲಿ ಫೈನಲ್‌ಗೇರಿತ್ತು. ಆಗ ಬೆಂಗಳೂರು ಬುಲ್ಸ್‌ ತಂಡದ ಪರವಾಗಿ ಫೈನಲ್‌ನಲ್ಲಿ 22 ರೈಡಿಂಗ್‌ ಅಂಕ ಪಡೆದ ಮೊದಲ ರೈಡರ್‌ ಎನಿಸಿಕೊಂಡಿದ್ದಾರೆ ಪವನ್‌ ಸೆಹ್ರಾವತ್‌.