ಚಿತ್ರಮಂದಿರಗಳಲ್ಲಿ ಚಿತ್ರ ನೋಡಿ

ಬಿ.ಸಿ. ಪಾಟೀಲ್‌ ಬಹಳ ವರ್ಷಗಳ ನಂತರ ತಮ್ಮ ಬ್ಯಾನರ್‌ನಿಂದ ನಿರ್ಮಿಸಿದ “ಹ್ಯಾಪಿ ನ್ಯೂ ಇಯರ್‌’ ಚಿತ್ರ ಕಳೆದ ತಿಂಗಳು ಬಿಡುಗಡೆಯಾಗಿತ್ತು. ಆದರೆ, ಚಿತ್ರವು ನಿರೀಕ್ಷೆಯಷ್ಟು ಯಶಸ್ವಿಯಾಗಲಿಲ್ಲ. ಚಿತ್ರದ ಬಗ್ಗೆ ಒಳ್ಳೆಯ ಪ್ರತಿಕ್ರಿಯೆ ಸಿಕ್ಕರೂ, ಜನ ಚಿತ್ರಮಂದಿರಕ್ಕೆ ಬಂದು, ಚಿತ್ರ ನೋಡದಿರುವ ಬಗ್ಗೆ ಪಾಟೀಲರಿಗೆ ಬೇಸರವಿದ್ದಂತಿದೆ. ಆ ಬೇಸರವನ್ನು ಇತ್ತೀಚೆಗೆ ಅವರು “ರಾಜ-ಹಂಸ’ ಚಿತ್ರದ ಆಡಿಯೋ ಬಿಡುಗಡೆ ಸಮಾರಂಭದಲ್ಲಿ ಹೇಳಿಕೊಂಡರು.

“ಎಲ್ಲಿಗೆ ಹೋದರೂ ಜನ ಬಂದು ನಿಮ್ಮ ಫೋಟೋನ ಪೇಪರ್‌ನಲ್ಲಿ ನೋಡಿದ್ವಿ, ನಿಮ್ಮ ಕಾರ್ಯಕ್ರಮನ “ಮಜಾ ಟಾಕೀಸ್‌’ನಲ್ಲಿ ನೋಡಿದ್ವಿ ಅಂತಾರೆ. ನಮ್ಮನ್ನ ಟಿವಿಯಲ್ಲಿ, ಪೇಪರ್‌ನಲ್ಲಿ ನೋಡುತ್ತಿದ್ದಾರೆಯೇ ಹೊರತು, ಚಿತ್ರಮಂದಿರಕ್ಕೆ ಬಂದು ಚಿತ್ರ ನೋಡುತ್ತಿಲ್ಲ. ಹೀಗಾದರೆ ಆಗುವುದಿಲ್ಲ. ಜನ ಚಿತ್ರಮಂದಿರಕ್ಕೆ ಬಂದು ಚಿತ್ರ ನೋಡಿದರಷ್ಟೇ, ನಿರ್ಮಾಪಕನಿಗೆ ಒಂದಿಷ್ಟು ದುಡ್ಡು ಬರೋಕೆ ಸಾಧ್ಯ.

ನಿರ್ಮಾಪಕರು ಹಾಗೆ ದುಡ್ಡು ನೋಡಿದಾಗಲಷ್ಟೇ ಇನ್ನಷ್ಟು ಸಿನಿಮಾಗಳು ಬರುವುದಕ್ಕೆ ಸಾಧ್ಯ. ಬರೀ ಟಿವಿ, ಪೇಪರ್‌ನಲ್ಲಿ ನೋಡಿದರೆ ಆಗದು, ಚಿತ್ರಮಂದಿರಕ್ಕೂ ಜನ ಬರಬೇಕು’ ಎಂದರು ಬಿ.ಸಿ. ಪಾಟೀಲ್‌. ಪಾಟೀಲರ ಮನವಿಯನ್ನು ಪುರಸ್ಕರಿಸಿ, ಜನ ಚಿತ್ರಮಂದಿರಕ್ಕೆ ಬಂದು ಚಿತ್ರ ನೋಡುತ್ತಾರಾ ಎಂದು ಇನ್ನಾದರೂ ನೋಡಬೇಕು.