ಉಡುಪಿ: ಕಡಲ್ಕೊರೆತ ತೀವ್ರ

ಉಡುಪಿ ಜು. 15: ಜಿಲ್ಲೆಯ ಕಾಪು, ಉದ್ಯಾವರ, ಮಲ್ಪೆ ಭಾಗಗಳಲ್ಲಿ ಕಡಲ್ಕೊರೆತ ರವಿವಾರವೂ ತೀವ್ರವಾಗಿತ್ತು. ಕಾಪುವಿನ ಕೈಪುಂಜಾಲಿನಲ್ಲಿ ಜ್ವಾಲಿ ಬೀಚ್‌ ಸಮೀಪದ ಖಾಸಗಿ ಅತಿಥಿ ಗೃಹದ ಆವರಣ ಗೋಡೆಗೆ ಹಾನಿಯಾಗಿದೆ.  ಉಡುಪಿ ಅಪರ ಜಿಲ್ಲಾಧಿಕಾರಿ ಅನುರಾಧಾ ಜಿ., ಕಾಪು ತಹಶಿಲ್ದಾರ್‌ ಗುರುಸಿದ್ಧಯ್ಯ, ಪುರಸಭಾ ಸದಸ್ಯ ಕಿರಣ್‌ ಆಳ್ವ ಸ್ಥಳಕ್ಕೆ ಭೇಟಿ ನೀಡಿದ್ದಾರೆ. ಇನ್ನು ಮಲ್ಪೆ ಬೀಚ್‌ನಲ್ಲಿ 70 ಮೀ.ನಷ್ಟು ಭೂಭಾಗ ಸಮುದ್ರ ಪಾಲಾಗಿದೆ. ಗಾಳಿಗೆ ಹಟ್‌ಗಳು ಹಾಳಾಗಿವೆ. ಉದ್ಯಾವರದ ಕನಕೋಡ ವ್ಯಾಪ್ತಿಯಲ್ಲಿ ಕಡಲಾರ್ಭಟವಿದ್ದು ಇಲ್ಲಿನ ಕಾಂಕ್ರೀಟ್‌ ರಸ್ತೆಗೆ ಹಾನಿಯಾಗಿದೆ. ಇದಕ್ಕಾಗಿ ಕಡಲ ತೀರದಲ್ಲಿ ಕಲ್ಲುಹಾಕಿ ರಸ್ತೆ ಉಳಿಸುವ ಪ್ರಯತ್ನ ಸಾಗಿದೆ.