ಅಜ್ಜಾವರ: ಪಾರ್ಕ್‌ ಮಾಡಿದ್ದಲ್ಲೇ ಶಾಲಾ ಬಸ್‌ ಭಸ್ಮ

ಸುಳ್ಯ: ಅಜ್ಜಾವರ ಗ್ರಾಮದ ಕರ್ಲಪ್ಪಾಡಿಯಲ್ಲಿ  ಶಾಲಾ ಬಸ್ಸೊಂದು ಬೆಂಕಿಗಾಹುತಿಯಾದ ಘಟನೆ ಗುರುವಾರ ಮುಂಜಾನೆ ಸಂಭವಿಸಿದೆ.

ಬುಧವಾರ ಸಂಜೆ ಬಸ್ಸನ್ನು ಪಾರ್ಕ್‌ ಮಾಡಲಾಗಿದ್ದು, ನಿಂತಿದ್ದ ಸ್ಥಳದಲ್ಲಿಯೇ ಈ ಘಟನೆ ಸಂಭವಿಸಿದೆ. ಸುಮಾರು 5 ಲಕ್ಷ ರೂ. ನಷ್ಟ  ಅಂದಾಜಿಸಲಾಗಿದೆ.

ಸುಳ್ಯದ ಕೆವಿಜಿ ವಿದ್ಯಾಸಂಸ್ಥೆಗೆ ಸೇರಿದ ಈ  ಬಸ್‌ ಅನ್ನು ಕರ್ಲಪ್ಪಾಡಿ ದೇವಾಲಯದ ಸಮೀಪ ನಿಲ್ಲಿಸಲಾಗುತ್ತಿತ್ತು. ಮಂಡೆಕೋಲು, ಅಜ್ಜಾವರ ಪರಿಸರದ ವಿದ್ಯಾರ್ಥಿಗಳ ಓಡಾಟಕ್ಕಾಗಿ ಇದನ್ನು ನಿಯೋಜಿಸಲಾಗಿತ್ತು. ಬುಧವಾರ  ಸಂಜೆ ಚಾಲಕ ಗಣೇಶ್‌  ಮಕ್ಕಳನ್ನು ಬಿಟ್ಟು ಎಂದಿನಂತೆ ನಿಗದಿತ ಸ್ಥಳದಲ್ಲಿ ಬಸ್‌ ನಿಲ್ಲಿಸಿದ್ದರು.

ಗುರುವಾರ ಮುಂಜಾನೆ 5.30ಕ್ಕೆ ಸ್ಥಳೀಯರೊಬ್ಬರು ಬಸ್‌ನಲ್ಲಿ ಹೊಗೆ ಏಳುತ್ತಿರುವುದನ್ನು ಕಂಡು ಸ್ಥಳೀಯರಿಗೆ ಮಾಹಿತಿ ನೀಡಿದ್ದಾರೆ. ಅನಂತರ ಸುಳ್ಯ ಅಗ್ನಿಶಾಮಕ ದಳದ ಸಿಬಂದಿ ಸ್ಥಳಕ್ಕೆ ಆಗಮಿಸಿದ್ದು, ಆ ವೇಳೆಗಾಗಲೇ ಬಸ್‌ ಸಂಪೂರ್ಣ ಸುಟ್ಟು ಹೋಗಿತ್ತು.  

ಬುಧವಾರ ಸಂಜೆ ಸುರಿದ ಮಳೆಯಿಂದಾಗಿ ಎಂಜಿನ್‌ನೊಳಗೆ ನೀರು ಹೋಗಿ ಶಾರ್ಟ್‌ ಸರ್ಕ್ನೂಟ್‌ ಸಂಭವಿಸಿ ಬೆಂಕಿ ಹಿಡಿದಿರಬಹುದು ಎಂದು ಶಂಕಿಸಲಾಗಿದೆ. ಸುಳ್ಯ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.