ಗುರುತಿನ ಚೀಟಿ ನೀಡದಿದ್ದರೆ ಮಲ ಸುರಿದುಕೊಂಡು ಹೋರಾಟ

ರಾಯಚೂರು: ನಗರದಲ್ಲಿ ವಾಸಿಸುತ್ತಿರುವ ಸಫಾಯಿ ಕರ್ಮಚಾರಿಗಳಿಗೆ ಗುರುತಿನ ಚೀಟಿ ನೀಡದೆ ಸತಾಯಿಸುತ್ತಿದ್ದು, ಅಧಿಕಾರಿಗಳ ನಡೆ ಖಂಡಿಸಿ ಫೆ.22ರಂದು ಡಿಸಿ ಕಚೇರಿ ಎದುರು ಮಲ ಸುರಿದುಕೊಂಡು ಹೋರಾಟ ನಡೆಸುವುದಾಗಿ ಸಮಾಜದ ಗೀತಾಸಿಂಗ್‌ ತಿಳಿಸಿದರು.

ಶನಿವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಗಾರೆ ಕೆಲಸ ಮಾಡುವವರಿಗೆ, ಕೂಲಿ ಕಾರ್ಮಿಕರಿಗೆ ಗುರುತಿನ ಚೀಟಿ ನೀಡುತ್ತಿದ್ದಾರೆ. ಆದರೆ, ಇಂದಿಗೂ ಮನೆ-ಮನೆಗೆ ಹೋಗಿ ಟಾಯ್ಲೆಟ್‌ ತೊಳೆಯುವ ನಮ್ಮನ್ನು  ಗುರುತಿಸುತ್ತಿಲ್ಲ. ಅಧಿ ಕಾರಿಗಳು ನಮ್ಮನ್ನು ಅಲೆಸುತ್ತಿದ್ದು, ಸಾಕಾಗಿ ಹೋಗಿದೆ. ಹೀಗಾಗಿ ಡಿಸಿ ಕಚೇರಿ ಎದುರೇ ಮಲ ಮೈಮೇಲೆ ಸುರಿದುಕೊಂಡು ಹೋರಾಟ ಮಾಡಲು ನಿರ್ಧರಿಸಲಾಗಿದೆ ಎಂದರು. ನಗರದಲ್ಲಿ  ಸಫಾಯಿ ಕರ್ಮಚಾರಿಗಳ 200 ಮನೆಗಳಿವೆ. ಅದರಲ್ಲಿ ಕೇವಲ 6 ಜನರಿಗೆ ಮಾತ್ರ ಗುರುತಿನ ಚೀಟಿ ನೀಡಲಾಗಿದೆ. 174 ಅರ್ಜಿಗಳನ್ನು ತಿರಸ್ಕರಿಸಲಾಗಿದೆ. ಅಧಿಕಾರಿಗಳ ನಡೆಗೆ ಬೇಸತ್ತು ಈ ನಿರ್ಧಾರ ಕೈಗೊಂಡಿದ್ದು, ಹೋರಾಟ ಕೈ ಬಿಡುವ ಪ್ರಶ್ನೆಯೇ ಇಲ್ಲ ಎಂದು ಎಚ್ಚರಿಸಿದರು.